GPSC Exam Postponed: ગુજરાતમાં છેલ્લા કેટલાક દિવસોથી વરસી રહેલા ભારે વરસાદ અને અનેક વિસ્તારોમાં સર્જાયેલી પૂર જેવી સ્થિતિને ધ્યાનમાં રાખીને ગુજરાત જાહેર સેવા આયોગ (GPSC)એ મહત્વપૂર્ણ નિર્ણય લીધો છે. આગામી 26 જુલાઈએ યોજાનારી વર્ગ-1 અને વર્ગ-2ની કુલ 34 પ્રારંભિક ભરતી પરીક્ષાઓ હાલ પૂરતી મુલતવી રાખવામાં આવી છે. પરીક્ષાની નવી તારીખો બાદમાં સત્તાવાર રીતે જાહેર કરવામાં આવશે.
રાજ્યના અમદાવાદ, ખેડા, સુરત, સૌરાષ્ટ્ર સહિત અનેક જિલ્લાઓમાં ભારે વરસાદને કારણે માર્ગો પર પાણી ભરાયા છે અને વાહનવ્યવહાર પણ પ્રભાવિત થયો છે. આવી સ્થિતિમાં પરીક્ષા કેન્દ્ર સુધી પહોંચવામાં ઉમેદવારોને મુશ્કેલી પડી શકે તેવા સંજોગોને ધ્યાનમાં રાખીને GPSCએ આ નિર્ણય લીધો છે.
48 હજારથી વધુ ઉમેદવારોને મળશે રાહત
GPSCની આ પરીક્ષાઓ માટે રાજ્યભરમાં કુલ 48,620 ઉમેદવારોએ નોંધણી કરાવી હતી. પરીક્ષા સવારે 11 વાગ્યાથી બપોરે 12 વાગ્યા સુધી યોજાવાની હતી અને ઉમેદવારોના કોલ લેટર પણ અગાઉથી જ જાહેર કરી દેવામાં આવ્યા હતા. જોકે, ભારે વરસાદને કારણે ઉમેદવારો દ્વારા કરવામાં આવેલી રજૂઆતો બાદ આયોગે પરીક્ષાઓ મોકૂફ રાખવાનો નિર્ણય લીધો છે.
કયા વિભાગોની ભરતી પરીક્ષાઓ મુલતવી?
મુલતવી રાખવામાં આવેલી પરીક્ષાઓ વિવિધ સરકારી વિભાગોની ભરતી સાથે સંબંધિત છે. તેમાં મુખ્યત્વે નીચેના વિભાગોનો સમાવેશ થાય છે:
* પશુપાલન વિભાગ
* માર્ગ અને મકાન વિભાગ
* ઉદ્યોગ અને ખાણકામ વિભાગ
* મહિલા અને બાળ વિકાસ વિભાગ
* ગુજરાત મેરીટાઇમ બોર્ડ (GMB)
* ગુજરાત પાણી પુરવઠા અને ગટર વ્યવસ્થા બોર્ડ (GWSSB)
* વિવિધ મ્યુનિસિપલ કોર્પોરેશનો
* ઔદ્યોગિક સલામતી અને આરોગ્ય વિભાગ
* ગુજરાત શિક્ષણ સેવા
કઈ-કઈ પોસ્ટ માટે પરીક્ષા મોકૂફ?
વર્ગ-2ની મુખ્ય પોસ્ટો
* પશુચિકિત્સા અધિકારી (Veterinary Officer)
* નર્સિંગ અધિકારી
* નર્સિંગ સુપરિન્ટેન્ડેન્ટ
* મદદનીશ ઇજનેર (મિકેનિકલ અને સિવિલ)
* ગ્રેજ્યુએટ એન્જિનિયર ટ્રેઇની
* સિનિયર ડ્રગ ઇન્સ્પેક્ટર
* એસ્ટેટ અધિકારી
* કાનૂની અધિકારી
* ઔદ્યોગિક આરોગ્ય અને સલામતી અધિકારી
વર્ગ-1ની મુખ્ય પોસ્ટો
* ડેપ્યુટી ડાયરેક્ટર ઓફ હોર્ટિકલ્ચર
* ગુજરાત મેરીટાઇમ બોર્ડના જનરલ મેનેજર અને ડેપ્યુટી જનરલ મેનેજર
* પ્રિન્સિપાલ (ગુજરાત નર્સિંગ સર્વિસ)
* ડેપ્યુટી ડાયરેક્ટર (ઔદ્યોગિક સલામતી અને આરોગ્ય)
* સંયુક્ત કૃષિ નિયામક
* ગુજરાત શિક્ષણ સેવા સહિત અન્ય વિવિધ પોસ્ટો
GPSCએ શું કહ્યું?
GPSCએ શુક્રવારે જાહેર કરેલી સત્તાવાર સૂચનામાં જણાવ્યું છે કે રાજ્યમાં ભારે વરસાદ, જળબંબાકાર અને માર્ગ પરિવહનમાં સર્જાયેલી મુશ્કેલીઓને કારણે પરીક્ષાઓ આગામી આદેશ સુધી મુલતવી રાખવામાં આવે છે. ઉમેદવારોના હિતને ધ્યાનમાં રાખીને આ નિર્ણય લેવામાં આવ્યો છે.
આયોગે વધુમાં જણાવ્યું છે કે તમામ મુલતવી રાખવામાં આવેલી પરીક્ષાઓની નવી તારીખો અને અન્ય જરૂરી માહિતી ટૂંક સમયમાં GPSCની સત્તાવાર વેબસાઇટ પર જાહેર કરવામાં આવશે.
ઉમેદવારો માટે મહત્વની સૂચના
GPSCએ તમામ ઉમેદવારોને અપીલ કરી છે કે તેઓ પરીક્ષાની નવી તારીખ, સુધારેલા સમયપત્રક અને અન્ય મહત્વપૂર્ણ સૂચનાઓ માટે નિયમિતપણે GPSCની સત્તાવાર વેબસાઇટ તપાસતા રહે.
