Gujarat Weather Update: ગુજરાતમાં ફરી એકવાર વરસાદી માહોલ જામવાનો છે. હવામાન વિભાગની આગાહી મુજબ જુલાઈના અંતિમ દિવસો અને ઓગસ્ટના પ્રારંભમાં રાજ્યમાં વધુ એક વરસાદી રાઉન્ડ શરૂ થવાની શક્યતા છે. રાજ્યમાં સક્રિય થયેલી ત્રણ વરસાદી સિસ્ટમના કારણે અનેક વિસ્તારોમાં સાર્વત્રિક વરસાદ નોંધાઈ શકે છે.

આગાહી મુજબ ઉત્તર ગુજરાત અને દક્ષિણ ગુજરાતના અનેક જિલ્લાઓમાં ભારે વરસાદ વરસી શકે છે. જ્યારે મધ્ય ગુજરાત અને સૌરાષ્ટ્રના વિસ્તારોમાં સામાન્યથી મધ્યમ વરસાદની શક્યતા વ્યક્ત કરવામાં આવી છે. કેટલાક વિસ્તારોમાં ગાજવીજ સાથે વરસાદ પડવાની પણ આગાહી કરવામાં આવી છે.

હવામાન વિભાગે જણાવ્યું છે કે વરસાદી માહોલ દરમિયાન 40થી 50 કિલોમીટર પ્રતિ કલાકની ઝડપે પવન ફૂંકાઈ શકે છે. આ પરિસ્થિતિને ધ્યાનમાં રાખીને માછીમારોને આગામી દિવસોમાં દરિયો ન ખેડવાની સૂચના આપવામાં આવી છે.

હવામાન વિભાગે લોકોને હવામાન અંગેની સત્તાવાર આગાહીઓ પર નજર રાખવા અને જરૂરી સાવચેતી રાખવાની અપીલ કરી છે.