Gandhinagar News: ગુજરાતમાં ચોમાસાએ ફરી એકવાર રૌદ્ર સ્વરૂપ ધારણ કર્યું છે. રાજ્યમાં એકસાથે પાંચ હવામાન પ્રણાલીઓ સક્રિય થતાં આગામી 48 કલાક દરમિયાન ભારેથી અતિભારે વરસાદ (Rain)ની આગાહી કરવામાં આવી છે. હવામાન વિભાગે આજે 10 જિલ્લામાં રેડ એલર્ટ જાહેર કર્યું છે, જ્યારે અનેક જિલ્લાઓમાં ઓરેન્જ એલર્ટ પણ આપવામાં આવ્યું છે. ભારે વરસાદની સાથે 41થી 61 કિમી પ્રતિ કલાકની ઝડપે પવન ફૂંકાવા અને વીજળીના કડાકા-ભડાકાની પણ શક્યતા વ્યક્ત કરવામાં આવી છે. માછીમારોને આગામી ત્રણ દિવસ સુધી દરિયો ન ખેડવાની કડક સૂચના આપવામાં આવી છે.

ડીપ ડિપ્રેશન નબળું પડ્યું, છતાં વરસાદ (Rain)નું જોખમ યથાવત

હવામાન વિભાગ (IMD)ના જણાવ્યા મુજબ, રાજ્યને અસર કરતી ડીપ ડિપ્રેશન સિસ્ટમ હવે ડિપ્રેશનમાં પરિવર્તિત થઈ પશ્ચિમ-ઉત્તર પશ્ચિમ દિશામાં આગળ વધી રહી છે. આગામી સમયમાં તે ‘વેલ માર્ક્ડ લો પ્રેશર’માં ફેરવાશે. જોકે તેની તીવ્રતા ઘટી હોવા છતાં રાજ્યમાં વરસાદનું જોખમ યથાવત છે. ડિપ્રેશન ઉપરાંત વેસ્ટર્ન ડિસ્ટર્બન્સ, શીયર ઝોન અને મોન્સૂન ટ્રફ સહિત પાંચ હવામાન સિસ્ટમ સક્રિય હોવાથી વ્યાપક વરસાદની સ્થિતિ સર્જાઈ છે.

10 જિલ્લામાં રેડ એલર્ટ

હવામાન વિભાગે અમદાવાદ, ગાંધીનગર, બનાસકાંઠા, પાટણ, મહેસાણા, સાબરકાંઠા, અરવલ્લી, ખેડા, આણંદ, મહિસાગર, પંચમહાલ, દાહોદ, વડોદરા અને છોટાઉદેપુર સહિત મધ્ય અને ઉત્તર ગુજરાતના અનેક વિસ્તારોમાં ભારેથી અતિભારે વરસાદ (Red Alert)ની ચેતવણી આપી છે. દક્ષિણ ગુજરાતમાં નર્મદા, ભરૂચ, સુરત, તાપી, ડાંગ, નવસારી અને વલસાડમાં પણ ભારે વરસાદની શક્યતા છે. સુરત અને નર્મદા જિલ્લામાં અસામાન્ય ભારે વરસાદ પડવાની સંભાવના વ્યક્ત કરવામાં આવી છે.

સૌરાષ્ટ્ર અને કચ્છમાં પણ એલર્ટ

સૌરાષ્ટ્રના રાજકોટ, અમરેલી, ભાવનગર, બોટાદ અને સુરેન્દ્રનગર જિલ્લામાં ભારે વરસાદ (Heavy Rain)ની આગાહી છે. જ્યારે કચ્છ, મોરબી, જામનગર, દેવભૂમિ દ્વારકા, પોરબંદર, જૂનાગઢ, ગીર સોમનાથ અને દીવમાં ઓરેન્જ એલર્ટ જાહેર કરવામાં આવ્યું છે. નીચાણવાળા વિસ્તારોમાં જળભરાવ અને નદીઓના જળસ્તરમાં વધારો થવાની શક્યતા હોવાથી સ્થાનિક તંત્રને સતર્ક રહેવા સૂચના આપવામાં આવી છે.

અંબાલાલ પટેલની આગાહી

હવામાન નિષ્ણાંત અંબાલાલ પટેલના જણાવ્યા અનુસાર, 3 ઓગસ્ટ સુધી રાજ્યમાં ભારે વરસાદનો વધુ એક રાઉન્ડ જોવા મળી શકે છે. ખાસ કરીને દક્ષિણ ગુજરાત, મધ્ય ગુજરાત અને સૌરાષ્ટ્રના કેટલાક વિસ્તારોમાં 8થી 10 ઇંચ સુધી વરસાદ નોંધાઈ શકે છે, જ્યારે કેટલાક સંવેદનશીલ વિસ્તારોમાં વધુ વરસાદની શક્યતા પણ વ્યક્ત કરવામાં આવી છે.

માછીમારો અને નાગરિકોને તાકીદ

દરિયામાં ઊંચા મોજા અને તોફાની પવનની સંભાવનાને ધ્યાનમાં રાખીને માછીમારોને આગામી ત્રણ દિવસ સુધી દરિયો ન ખેડવા સૂચના આપવામાં આવી છે. સાથે જ નાગરિકોને પણ બિનજરૂરી મુસાફરી ટાળવા, નદી-નાળાઓથી દૂર રહેવા અને સ્થાનિક વહીવટી તંત્ર તથા હવામાન વિભાગની સૂચનાઓનું પાલન કરવાની અપીલ કરવામાં આવી છે.

આ પણ વાંચો: ગુજરાતમાં આગામી 3 કલાક માટે નાઉકાસ્ટ એલર્ટ, અમદાવાદ સહિત 12 જિલ્લાઓમાં ભારે વરસાદની આગાહી

આ પણ વાંચો: દેશના 19 રાજ્યોમાં ભારે વરસાદ અને વાવાઝોડાની આગાહી, આગામી 24 કલાક રહેશે ભારે

આ પણ વાંચો: મહેસાણામાં ભારે વરસાદની આગાહીને પગલે 1 ઓગસ્ટે તમામ શાળાઓમાં રજા જાહેર