Sports News: ભારતીય ક્રિકેટ ટીમના સ્ટાર ઓલરાઉન્ડર હાર્દિક પંડ્યા (Hardik Pandya) ફરી એકવાર ચર્ચામાં છે. જોકે આ વખતે તેનું કારણ ક્રિકેટ નહીં પરંતુ તેનો નવો લુક અને આધ્યાત્મિક યાત્રા છે. હાર્દિકે તિરુમલાના શ્રી વેંકટેશ્વર સ્વામી મંદિરમાં દર્શન કરી મુંડન કરાવેલા નવા અવતારમાં ચાહકોનું ધ્યાન ખેંચ્યું છે. સોશિયલ મીડિયા પર તેની તસવીરો અને વીડિયો ઝડપથી વાયરલ થઈ રહ્યા છે. ઈજામાંથી વાપસીની તૈયારી કરી રહેલા હાર્દિક માટે આ મુલાકાત ખાસ માનવામાં આવી રહી છે.
Hardik Pandya તિરુપતિમાં નવા લુકમાં જોવા મળ્યો
ભારતીય ટીમના સ્ટાર ઓલરાઉન્ડર હાર્દિક પંડ્યા તિરુમલાના પ્રસિદ્ધ શ્રી વેંકટેશ્વર સ્વામી મંદિરમાં દર્શન કરવા પહોંચ્યો હતો. મંદિરમાં તે સંપૂર્ણ મુંડન કરાવેલા નવા લુકમાં જોવા મળ્યો હતો. હાર્દિક સાથે તેની ગર્લફ્રેન્ડ માહિકા શર્મા પણ હાજર હતી. બંનેએ ભગવાનના દર્શન કર્યા અને વિશેષ પૂજામાં ભાગ લીધો. સામાન્ય રીતે સ્ટાઇલિશ હેરસ્ટાઇલ માટે જાણીતા હાર્દિકનો આ સાદગીભર્યો અંદાજ ચાહકોમાં ચર્ચાનો વિષય બન્યો છે.
તિરુમલા મંદિરની પરંપરા મુજબ કરાવ્યું મુંડન
હાર્દિક પંડ્યાએ તિરુમલા મંદિરની સુપ્રભાતમ સેવામાં ભાગ લીધો હતો. તિરુપતિમાં ઘણા ભક્તો ભગવાન વેંકટેશ્વરને સમર્પણના પ્રતીક તરીકે પોતાના વાળ દાન કરે છે. માન્યતા છે કે આ પરંપરા અહંકારનો ત્યાગ અને ભક્તિનું પ્રતીક છે. હાર્દિકે પણ આ ધાર્મિક પરંપરાનું પાલન કર્યું હોવાનું માનવામાં આવી રહ્યું છે.
હાર્દિક પંડ્યા છેલ્લા કેટલાક સમયથી ઈજાના કારણે ભારતીય ટીમથી દૂર હતો. પીઠ અને જાંઘની ઈજાને કારણે તે અફઘાનિસ્તાન સામેની વનડે શ્રેણી, ઇંગ્લેન્ડ પ્રવાસ તેમજ ઝિમ્બાબ્વે સામેની ટી-20 શ્રેણીમાંથી બહાર રહ્યો હતો. હાલમાં તે સંપૂર્ણ ફિટનેસ મેળવવા માટે સતત મહેનત કરી રહ્યો છે.
