Valsad News: વલસાડ જિલ્લામાં છેલ્લા ત્રણ દિવસથી વરસાદી (Valsad Rain) માહોલ યથાવત્ રહ્યો છે. લાંબા વિરામ બાદ મેઘરાજાએ ફરી મહેર કરી છે. વહેલી સવારથી વાદળછાયું વાતાવરણ જોવા મળ્યું હતું અને જિલ્લાના અનેક વિસ્તારોમાં ધીમીધારે વરસાદથી લઈને ભારે ઝાપટાં પડ્યાં હતાં. વરસાદના કારણે વાતાવરણમાં ઠંડક પ્રસરી જતાં લોકોને ગરમી અને ઉકળાટમાંથી રાહત મળી છે. જિલ્લાની સાથે આસપાસના સંઘ પ્રદેશ દમણ અને દાદરા-નગર હવેલીમાં પણ હવામાનમાં પલટો આવ્યો છે. સતત વરસાદને પગલે ગ્રામ્ય વિસ્તારોમાં કેટલાક નીચાણવાળા રસ્તાઓ અને કોઝવે પર પાણી ફરી વળ્યાં છે.
કપરાડામાં 103 મીમી વરસાદ, લો-લેવલ કોઝવે પાણીમાં
વલસાડના ડુંગરાળ અને સીમાવર્તી તાલુકા કપરાડામાં છેલ્લા 24 કલાક દરમિયાન 103 મીમી એટલે કે 4 ઇંચથી વધુ વરસાદ નોંધાયો છે. ભારે વરસાદને કારણે કરચોણથી દૂધની તરફ જતા માર્ગ પર આવેલો લો-લેવલ કોઝવે પાણીના પ્રવાહમાં ગરકાવ થયો છે. આ ઉપરાંત બુરલા ગામ નજીક કોલક નદી પર બનાવવામાં આવેલો પુલ પણ પાણીમાં ડૂબી ગયો છે. પરિણામે સ્થાનિક લોકોને અવરજવરમાં મુશ્કેલી પડી રહી છે.
Valsad Rain: પાણી ભરાયેલા માર્ગો વચ્ચે જોખમી અવરજવર
કપરાડા તાલુકાના ઉપરવાસમાં વરસાદ (Valsad Rain) પડતાં ગ્રામ્ય વિસ્તારોના કેટલાક માર્ગો પર પાણી ફરી વળ્યું છે. લો-લેવલ બ્રિજ અને કોઝવે પાણીમાં ગરકાવ હોવા છતાં કેટલાક સ્થાનિકો અને વાહનચાલકો જોખમ લઈને રસ્તો પાર કરતા જોવા મળી રહ્યા છે. સ્થાનિકોના જણાવ્યા પ્રમાણે ચોમાસા દરમિયાન સામાન્યથી વધુ વરસાદ પડતાં જ કપરાડાના કેટલાક કોઝવે અને નીચાણવાળા પુલો પર પાણી ફરી વળે છે. આ સ્થિતિના કારણે વરસાદી સિઝનમાં ગ્રામ્ય વિસ્તારના લોકોને અવરજવર માટે મુશ્કેલીનો સામનો કરવો પડે છે.
વરસાદથી ખેડૂતોમાં ખુશીની લહેર
લાંબા સમય સુધી વરસાદ ખેંચાતા ખેડૂતો ચિંતિત બન્યા હતા. જોકે, છેલ્લા બે-ત્રણ દિવસથી સતત વરસાદ થતાં ખેડૂતોમાં રાહત અને ખુશી જોવા મળી રહી છે. વરસાદના કારણે ખેતરોમાં ઉભેલા પાકને પણ ફાયદો થવાની આશા છે. સતત વરસાદ અને ઠંડા પવનના કારણે સમગ્ર જિલ્લામાં વાતાવરણ આહલાદક બન્યું છે. વરસાદથી લોકોને ઉકળાટમાંથી પણ રાહત મળી છે.
Valsad Rain: જિલ્લાના છેલ્લા 24 કલાકના વરસાદના આંકડા
જિલ્લાના વિવિધ તાલુકાઓમાં છેલ્લા 24 કલાક દરમિયાન નોંધાયેલો વરસાદ આ પ્રમાણે રહ્યો:
| તાલુકો | ગઈકાલ સુધીનો વરસાદ | છેલ્લા 24 કલાકનો વરસાદ | કુલ મોસમી વરસાદ | સરેરાશના ટકા |
|---|---|---|---|---|
| ધરમપુર | 612 મીમી | 94 મીમી | 706 મીમી | 86% |
| કપરાડા | 635 મીમી | 103 મીમી | 738 મીમી | 90% |
| પારડી | 615 મીમી | 95 મીમી | 710 મીમી | 87% |
| ઉમરગામ | 625 મીમી | 98 મીમી | 723 મીમી | 88% |
| વલસાડ | 628 મીમી | 100 મીમી | 728 મીમી | 89% |
જિલ્લામાં કુલ વરસાદ
વલસાડ જિલ્લામાં અત્યાર સુધીમાં 620 મીમી વરસાદ નોંધાયો હતો. છેલ્લા 24 કલાકમાં જિલ્લામાં 98 મીમી વરસાદ નોંધાતા કુલ મોસમી વરસાદ (Valsad Rain)નો આંકડો 718 મીમી થયો છે. જિલ્લામાં મોસમી સરેરાશની સામે વરસાદ 88 ટકા નોંધાયો છે. કપરાડામાં સૌથી વધુ 103 મીમી વરસાદ નોંધાયો છે, જ્યારે વલસાડ તાલુકામાં 100 મીમી, ઉમરગામમાં 98 મીમી, પારડીમાં 95 મીમી અને ધરમપુરમાં 94 મીમી વરસાદ નોંધાયો છે. હાલ વરસાદી માહોલ વચ્ચે પાણી ભરાયેલા કોઝવે અને લો-લેવલ પુલ પરથી પસાર થતી વખતે સાવચેતી રાખવી જરૂરી બની છે.
આ પણ વાંચો:ગુજરાતમાં મેઘરાજાની ધમાકેદાર એન્ટ્રી, 240 તાલુકામાં વરસાદ; વલસાડ-ભરૂચમાં સૌથી વધુ અસર
આ પણ વાંચો:વરસાદથી વલસાડ પાણી-પાણી, કપરાડા સહિત અનેક તાલુકામાં ધોધમાર વરસાદ
આ પણ વાંચો:વલસાડમાં પોણા ચાર ઇંચ વરસાદ,આગામી 7 દિવસ વરસાદની આગાહી
