Mumbai News: વિમલ (Vimal Elaichi)ની જાહેરાતને લઈને બોલિવૂડના ત્રણ મોટા કલાકારો શાહરુખ ખાન, અજય દેવગન અને ટાઇગર શ્રોફ મુશ્કેલીમાં આવ્યા છે. મહારાષ્ટ્ર Food and Drug Administration (FDA)એ ત્રણેયને કારણદર્શક નોટિસ પાઠવી હતી. FDA કમિશનર તુકારામ મુંઢેએ સ્પષ્ટ કર્યું છે કે સેલિબ્રિટી હોવાના કારણે કાયદાથી છૂટ મળી શકતી નથી. તાજા અહેવાલો અનુસાર ત્રણમાંથી બે કલાકારોએ નોટિસનો જવાબ આપ્યો છે, જ્યારે એક કલાકાર તરફથી જવાબ ન મળતાં કાયદેસરની કાર્યવાહી આગળ વધી રહી છે.

Vimal Elaichi ની જાહેરાત પર કેમ ઉઠ્યો સવાલ?

મહારાષ્ટ્ર FDAએ 11 ઓગસ્ટે શાહરુખ ખાન (Shah Rukh Khan), અજય દેવગન અને ટાઇગર શ્રોફને કારણદર્શક નોટિસ આપી હતી. FDAનો પ્રાથમિક વાંધો એ છે કે Vimal Elaichi (Vimal Elaichi)ના નામે કરવામાં આવેલી જાહેરાતથી વિમલ પાન મસાલાનું પરોક્ષ અથવા સરોગેટ પ્રમોશન થઈ શકે છે.

FDAના જણાવ્યા પ્રમાણે જાહેરાતમાં ઉપયોગમાં લેવાતી બ્રાન્ડ ઓળખ વિમલ પાન મસાલા (Vimal Pan Masala) સાથે જોડાયેલી હોવાથી ગ્રાહકોમાં બંને ઉત્પાદનો વચ્ચે સીધો સંબંધ ઊભો થઈ શકે છે. મહારાષ્ટ્રમાં 13 જુલાઈ 2026થી એક વર્ષ માટે વિમલ પાન મસાલાના ઉત્પાદન, સંગ્રહ, પરિવહન, વિતરણ અને વેચાણ પર પ્રતિબંધ મૂકવામાં આવ્યો છે.

FDA એ કલાકારોને શું કહ્યું?

FDAની નોટિસમાં ત્રણેય કલાકારોને 15 દિવસમાં જવાબ આપવા જણાવાયું હતું. સાથે જ જાહેરાતમાં ભાગ લેવાનું બંધ કરવા અને તેમના સત્તાવાર સોશિયલ મીડિયા ખાતાં, વેબસાઇટ તથા અન્ય ડિજિટલ માધ્યમો પરથી સંબંધિત પ્રમોશનલ સામગ્રી દૂર કરવા સૂચના આપવામાં આવી હતી.

અભિનેતાઓ પાસેથી એન્ડોર્સમેન્ટ કરાર, જાહેરાતની વિગતો, પ્રોડક્ટ અંગેની માહિતી અને જાહેરાત સાથે જોડાયેલી અન્ય વિગતો પણ માગવામાં આવી હતી. FDAએ આ જાહેરાતને પ્રથમ નજરે પ્રતિબંધિત પાન મસાલા અને તમાકુ સંબંધિત ઉત્પાદનોના પ્રત્યક્ષ (Direct)અથવા પરોક્ષ (indirect)પ્રચાર તરીકે ગણાવી હતી.

અભિનેતાઓનો જવાબ

સપ્ટેમ્બર 2026ના અહેવાલ મુજબ અજય દેવગન (Ajay Devgn) અને ટાઇગર શ્રોફે (Tiger Shroff) FDAની નોટિસનો જવાબ રજૂ કર્યો છે, જ્યારે શાહરુખ ખાનનો જવાબ મળવાનો બાકી હોવાનું અગાઉ અહેવાલાયું હતું. જોકે, 18 સપ્ટેમ્બરના તાજા નિવેદનમાં FDA કમિશનર તુકારામ મુંઢેએ જણાવ્યું કે ત્રણમાંથી એક અભિનેતાએ નોટિસનો જવાબ ન આપતા તેની સામે કાર્યવાહી શરૂ કરવામાં આવી છે. FDAએ સત્તાવાર રીતે તે અભિનેતાનું નામ જાહેર કર્યું નથી.

આ મામલે તુકારામ મુંઢે (Tukaram Mundhe)એ સેલિબ્રિટી સ્ટેટસ અંગે પણ સ્પષ્ટતા કરી છે. તેમના જણાવ્યા પ્રમાણે કોઈ વ્યક્તિ જાહેરાતમાં પ્રોડક્ટનું પ્રમોશન કરે છે તો તેની પણ જવાબદારી નક્કી થઈ શકે છે. એટલે કે કંપની અથવા ઉત્પાદકની સાથે જાહેરાતમાં જોડાયેલા લોકોની ભૂમિકા પણ નિયમનકારી તપાસના દાયરામાં આવી શકે છે.

Tukaram Mundhe એ કહ્યું- કાયદો બધા માટે સરખો

મહારાષ્ટ્ર FDA કમિશનર તુકારામ મુંઢેએ કહ્યું છે કે FDAની કાર્યવાહી કોઈ સેલિબ્રિટીને નિશાન બનાવવા માટે નથી. તેમના જણાવ્યા પ્રમાણે Food Safety and Standards (Advertising and Claims) Regulations, 2018 હેઠળ પ્રોડક્ટનું સમર્થન અને જાહેરાત કરનારની જવાબદારી અંગે જોગવાઈ છે.

હવે સમગ્ર મામલે નજર એ વાત પર છે કે નોટિસનો જવાબ ન આપનાર અભિનેતા સામે FDAની કાર્યવાહી કઈ દિશામાં આગળ વધે છે અને અન્ય બે કલાકારો દ્વારા આપવામાં આવેલા જવાબ પર વિભાગ શું નિર્ણય લે છે.

આ પણ વાંચો: શાહરૂખ ખાન, અજય દેવગન અને ટાઈગર શ્રોફની વધી મુશ્કેલીઓ: પાન મસાલા એડ મામલે FDA ફટકારી શકે છે દંડ!

આ પણ વાંચો: ગુટખા અને પાન મસાલાની એડ માટે કેટલી ફી લે છે શાહરૂખ, અજય અને ટાઈગર? FDA ની નોટિસ બાદ મોટો ખુલાસો

આ પણ વાંચો: સિગારેટ પછી, હવે પાન મસાલાના આ લોકપ્રિય બ્રાન્ડ્સ થઇ શકે છે વધુ મોંઘા