Mumbai News: મુંબઈમાં રવિવારે ઉદ્ધવ ઠાકરે અને રાજ ઠાકરેના નેતૃત્વમાં ‘ગર્જના મોરચો’ નીકળ્યો હતો. મંચ પરથી ચૂંટણી પંચ અને SIR (સ્પેશિયલ ઇન્ટેન્સિવ રિવિઝન) સામે આકરા પ્રહારો કરાયા હતા. ઉદ્ધવ ઠાકરેએ દેશભરમાંથી 13 કરોડ મતદારોનાં નામ હટાવાયાનો દાવો કર્યો હતો. બંને નેતાઓએ SIR રદ કરી બેલેટ પેપરથી ચૂંટણી યોજવાની માંગ કરી હતી.

ગર્જના મોરચામાં હજારો લોકો ઉમટ્યા

મળતી માહિતી મુજબ, શિવસેના (UBT)ના પ્રમુખ ઉદ્ધવ ઠાકરે (Uddhav Thackeray)અને MNSના પ્રમુખ રાજ ઠાકરે (Raj Thackeray)ના નેતૃત્વમાં નીકળેલા ગર્જના મોરચા (Garjana Morcha)માં હજારો લોકો જોડાયા હતા. મોરચામાં કોંગ્રેસ અને NCP સહિત વિપક્ષના અનેક નેતાઓ પણ નજરે પડ્યા હતા. આ માર્ચનું મુખ્ય ફોકસ SIR અને ચૂંટણી પંચની કામગીરી પર રહ્યું હતું.

ઉદ્ધવ ઠાકરેનો 13 કરોડ નામ હટાવવાનો દાવો

ઉદ્ધવ ઠાકરેએ ભાષણમાં દાવો કર્યો કે દેશભરમાંથી લગભગ 13 કરોડ મતદારોનાં નામ મતદાર યાદીમાંથી હટાવી દેવાયાં છે. તેમણે આને મતદાનના અધિકાર સાથે જોડાયેલો ગંભીર મુદ્દો ગણાવ્યો હતો. ઉદ્ધવના જણાવ્યા મુજબ પશ્ચિમ બંગાળમાં લગભગ 30 લાખ અને તમિલનાડુમાં લગભગ 70 લાખ નામ હટાવાયાં છે. આ આંકડા ઉદ્ધવ ઠાકરેએ ભાષણમાં કરેલા દાવા છે.

બંગાળના મતદારો અને સુપ્રીમ કોર્ટનો ઉલ્લેખ

ઉદ્ધવ ઠાકરેએ પશ્ચિમ બંગાળના એવા મતદારોનો પણ ઉલ્લેખ કર્યો, જેમનાં નામ હટાવાયા બાદ ફરી સામેલ કરવા અરજીઓ કરાઈ છે. તેમણે કહ્યું કે કેટલાક લોકોએ સુપ્રીમ કોર્ટનો દરવાજો ખટખટાવ્યો છે. કોર્ટનો નિર્ણય મતદારોની તરફેણમાં આવે, તો પણ શું તેઓ બીજા દિવસે યોજાનારી ચૂંટણીમાં મત આપી શકશે, એવો સવાલ તેમણે ઉઠાવ્યો હતો.

રાજ ઠાકરેએ SIR રદ કરવાની માંગ કરી

રાજ ઠાકરેએ કહ્યું કે તેઓ 2017થી ચૂંટણી પ્રક્રિયામાં ગડબડ અંગે સવાલો ઉઠાવી રહ્યા છે. તેમણે ચૂંટણી પંચ પર કબજો કરી લેવાયો હોવાનો આરોપ લગાવ્યો હતો. રાજે કહ્યું કે આજે ભાજપ સત્તામાં છે, પણ કાલે બીજી કોઈ પાર્ટી આવી શકે છે અને તેની અસર દરેક પર પડશે. તેમણે SIR સંપૂર્ણપણે રદ કરવા અને ચૂંટણી બેલેટ પેપરથી કરાવવાની માંગ કરી હતી.

જ્ઞાનેશ કુમાર પર નિશાન

ઉદ્ધવ ઠાકરે અને રાજ ઠાકરે બંનેએ મુખ્ય ચૂંટણી કમિશનર જ્ઞાનેશ કુમાર (Chief Election Commissioner Gyanesh Kumar)પર પ્રહારો કર્યા હતા. ઉદ્ધવે કહ્યું કે આ લડાઈ કોઈ એક પક્ષની નથી, દેશ અને આઝાદીની છે. તેમણે લોકોને મતના અધિકાર વિશે જાગૃત થવા અપીલ કરી હતી.

 આ પણ વાંચો:શિવસેનામાં ફરી ભંગાણ! સાંસદો શિંદે ભેગા થાય તે પહેલાં ઉદ્ધવ ઠાકરે દિલ્હી સુધી દોડાવી કાનૂની લડત

 આ પણ વાંચો:ઉદ્ધવ ઠાકરેને ઝટકો? UBTના 6 સાંસદો બળવાખોરીના મૂડમાં

 આ પણ વાંચો:ઉદ્ધવ ઠાકરેના નિવેદન પર ભડકી ગુજરાત BJP, પટેલ સમુદાય પર કરી હતી ટિપ્પણી….