Sabarkantha News: સાબરકાંઠા જિલ્લાના ઇડર તાલુકાના વસાઈ ગામમાં રહેણાક વિસ્તાર નજીકથી અર્ધબેભાન હાલતમાં દીપડો મળી આવતાં સ્થાનિકોમાં ચિંતા (Idar Leopard Rescue) ફેલાઈ છે. મહાકાળી મંદિર નજીક બેહાલ સ્થિતિમાં પડેલા દીપડાને ગ્રામજનોએ જોતાં તાત્કાલિક વન વિભાગને જાણ કરી હતી. ઘટનાની જાણ થતાં વન વિભાગની ટીમે સ્થળ પર પહોંચી દીપડાનું રેસ્ક્યૂ કર્યું હતું. પ્રાથમિક સારવાર બાદ પણ તેની તબિયતમાં અપેક્ષિત સુધારો ન થતાં વધુ સારવાર માટે અમદાવાદ ખસેડવામાં આવ્યો હતો. તપાસ દરમિયાન દીપડાની કરોડરજ્જુમાં ગંભીર ઈજા હોવાનું સામે આવ્યું છે.

Idar Leopard Rescue: મહાકાળી મંદિર નજીકથી મળી આવ્યો દીપડો

મળતી માહિતી મુજબ, ગુરુવારે બપોરે વસાઈ ગામની સીમમાં મહાકાળી મંદિર નજીક એક ગ્રામજન કીડિયારું પૂરવા ગયા હતા. આ દરમિયાન જંગલ વિસ્તાર પાસે દીપડો અર્ધબેભાન (Vasai Village Leopard) હાલતમાં પડેલો જોવા મળ્યો હતો. દીપડાની અસામાન્ય સ્થિતિ જોઈ ગ્રામજનોએ અન્ય લોકોને જાણ કરી હતી, જેના પગલે ઘટનાસ્થળે લોકો એકત્ર થયા હતા.

વન વિભાગે હાથ ધર્યું રેસ્ક્યૂ ઓપરેશન

દીપડો મળી આવ્યાની જાણ ઇડર વન વિભાગને (Gujarat Forest Department) કરવામાં આવતાં આર.એફ.ઓ. નરેશ ચૌધરી સહિતની ટીમ તાત્કાલિક ઘટનાસ્થળે પહોંચી હતી. સૌપ્રથમ વન વિભાગે લોકોને દીપડાથી સુરક્ષિત અંતરે ખસેડ્યા હતા. ત્યારબાદ જરૂરી સાવચેતી સાથે દીપડાને રેસ્ક્યૂ કરીને વન કચેરી ખાતે લઈ જવામાં આવ્યો હતો, જ્યાં તેને પ્રાથમિક સારવાર આપવામાં આવી હતી.

કરોડરજ્જુમાં ગંભીર ઈજા, અમદાવાદ ખસેડાયો

પ્રાથમિક તપાસ દરમિયાન દીપડાને શ્વાસ લેવામાં અને અવાજ કાઢવામાં મુશ્કેલી જણાઈ હોવાનું જાણવા મળ્યું હતું. તેની તબિયતમાં ખાસ સુધારો ન દેખાતાં વન વિભાગે વધુ સારવાર માટે તેને અમદાવાદ ખસેડવાનો નિર્ણય લીધો હતો. અમદાવાદ ખાતે કરવામાં આવેલી તપાસમાં દીપડાની કરોડરજ્જુમાં ગંભીર ઈજા (Leopard Spinal Injury) હોવાનું સામે આવ્યું હતું.

દીપડાને ઈજા કેવી રીતે થઈ તે અંગે તપાસ

વન વિભાગના અધિકારીઓના જણાવ્યા અનુસાર, ઊંચા ઝાડ અથવા પથ્થર પરથી પટકાવાને કારણે દીપડાને ઈજા થઈ હોવાની શક્યતા છે. જોકે, આ માત્ર પ્રાથમિક સંભાવના છે અને દીપડાને ઈજા થવાનું ચોક્કસ કારણ હજી સ્પષ્ટ થયું નથી. આ ઘટનાએ ફરી એકવાર વન્યજીવોની સુરક્ષા અને તેમની સમયસર સારવારના મહત્ત્વ તરફ ધ્યાન દોર્યું છે.

હાલ દીપડાને વધુ સારવાર માટે અમદાવાદ ખસેડવામાં આવ્યો છે. તેની તબિયતમાં સુધારો થાય તે માટે સારવાર ચાલુ છે, જ્યારે ઈજા પાછળનું ચોક્કસ કારણ જાણવા વન વિભાગની તપાસ મહત્ત્વપૂર્ણ રહેશે.

@દિપકસિંહ રાઠોડ,

આ પણ વાંચો: વલસાડના ડુમલાવ ગામે દીપડો પાંજરે પુરાયો, તબીબી તપાસ બાદ જંગલમાં છોડાશે

આ પણ વાંચો: સુરતનાં પલસાણામાં એના ગામે દીપડો CCTVમાં કેદ

આ પણ વાંચો: 5 દિવસનો આતંક ખતમ! માળીયા હાટીનામાં દીપડો આખરે પાંજરે પુરાયો