Valsad News : વલસાડ (Valsad) જિલ્લાના ડુમલાવ ગામમાં છેલ્લા ઘણા દિવસોથી જોવા મળતા દીપડા (Leopard)ને આખરે વનવિભાગની ટીમે પાંજરે પુરવામાં સફળતા મેળવી છે. દીપડાના સતત આંટાફેરાને કારણે સ્થાનિક ગ્રામજનોમાં ભયનો માહોલ સર્જાયો હતો. દીપડો પકડાતા ગ્રામજનોએ રાહતનો શ્વાસ લીધો છે.
મળતી માહિતી મુજબ, ડુમલાવ ગામ અને આસપાસના વિસ્તારમાં છેલ્લા કેટલાક દિવસથી દીપડો જોવા મળતો હતો. રહેણાંક વિસ્તારની નજીક દીપડાની અવરજવરથી ગ્રામજનોમાં ભય ફેલાયો હતો. સ્થાનિકો દ્વારા વનવિભાગને જાણ કરવામાં આવતા ટીમે સમગ્ર વિસ્તારમાં નજર રાખી હતી.
દીપડાને પકડવા માટે વનવિભાગ (Forest Department)દ્વારા યોગ્ય સ્થળે પાંજરું ગોઠવવામાં આવ્યું હતું. સતત દેખરેખ બાદ દીપડો પાંજરામાં ફસાતા વનવિભાગની ટીમે તેને સુરક્ષિત રીતે ઝડપી પાડ્યો હતો.
હવે દીપડાનું તબીબી પરીક્ષણ કરવામાં આવશે. તેની શારીરિક સ્થિતિ અને સ્વાસ્થ્યની તપાસ કર્યા બાદ જરૂરી સારવાર આપવામાં આવશે. ત્યારબાદ વનવિભાગ દ્વારા યોગ્ય પ્રક્રિયા પૂર્ણ કરીને દીપડાને જંગલ વિસ્તારમાં છોડવામાં આવશે.
દીપડો પાંજરે પુરાતા ડુમલાવ ગામના રહેવાસીઓએ રાહત અનુભવી છે. છેલ્લા કેટલાક દિવસથી રહેલો ભયનો માહોલ પણ હવે હળવો થયો છે.
