Israel News : ઇઝરાયલની ચૂંટણી (Israel Election)માં બેન્જામિન નેતન્યાહૂ (Benjamin Netanyahu) માટે સત્તા જાળવી રાખવાનો પડકાર ઊભો થયો હોવાનો દાવો કરવામાં આવી રહ્યો છે. છ ઓપિનિયન પોલમાંથી ચાર પોલમાં ભૂતપૂર્વ સેનાપ્રમુખ ગાદી આઇઝનકોટ (Gadi Eisenkot))ના ગઠબંધનને વધુ બેઠકો મળવાની સંભાવના વ્યક્ત કરવામાં આવી છે. જોકે, અન્ય બે પોલમાં નેતન્યાહૂ (Benjamin Netanyahu)ના ગઠબંધનની સ્થિતિ મજબૂત દર્શાવવામાં આવી છે. આથી ચૂંટણીના પરિણામો ઇઝરાયલના રાજકારણની દિશા નક્કી કરવામાં નિર્ણાયક બની શકે છે.
ઇઝરાયલ ચૂંટણીમાં સત્તાની જંગ, 61 બેઠકોનો આંકડો મહત્ત્વનો
ઇઝરાયલની સંસદમાં કુલ 120 બેઠકો છે. સરકાર બનાવવા માટે કોઈ પક્ષ કે ગઠબંધનને ઓછામાં ઓછી 61 બેઠકોની જરૂર પડે છે. ઇઝરાયલની ચૂંટણી (Israel Election)વ્યવસ્થામાં મતદારો સીધા વડાપ્રધાનને બદલે રાજકીય પક્ષને મત આપે છે. પક્ષને મળેલા કુલ મતોના પ્રમાણ પ્રમાણે સંસદમાં બેઠકો ફાળવવામાં આવે છે.
કોઈ રાજકીય પક્ષને સંસદમાં પ્રવેશ મેળવવા માટે કુલ માન્ય મતોમાંથી ઓછામાં ઓછા 3.25 ટકા મત મેળવવા જરૂરી છે. ત્યાર બાદ પક્ષની ઉમેદવારોની યાદીમાં સ્થાનના આધારે સાંસદોની પસંદગી થાય છે. આ વ્યવસ્થાને કારણે સરકારની રચનામાં નાના પક્ષો અને ગઠબંધનો પણ મહત્ત્વની ભૂમિકા ભજવી શકે છે.
ગાદી આઇઝનકોટ કોણ છે? નેતન્યાહૂ સામે મજબૂત પડકાર
ગાદી આઇઝનકોટ (Gadi Eisenkot) ઇઝરાયલના ભૂતપૂર્વ સેનાપ્રમુખ છે. તેમણે 1978માં ગોલાની બ્રિગેડમાં સૈનિક તરીકે પોતાની કારકિર્દીની શરૂઆત કરી હતી. લાંબી સૈન્ય સેવા બાદ તેઓ 2015માં ઇઝરાયલના સેનાપ્રમુખ બન્યા અને 2019 સુધી આ જવાબદારી સંભાળી હતી.
આઇઝનકોટની રાજકીય છબી સુરક્ષા અને સૈન્ય અનુભવ સાથે જોડાયેલી છે. ચૂંટણીમાં તેમનું ગઠબંધન મજબૂત પ્રદર્શન કરે તો નેતન્યાહૂના લાંબા રાજકીય પ્રભુત્વ સામે નવો પડકાર ઊભો થઈ શકે છે. જોકે, ઓપિનિયન પોલ માત્ર મતદારોના વલણનો અંદાજ આપે છે; તે અંતિમ પરિણામની ખાતરી આપતા નથી.
હમાસ હુમલો અને સુરક્ષા નીતિ ચૂંટણીના મુખ્ય મુદ્દા
ઇઝરાયલની ચૂંટણી (Israel Election)માં 7 ઑક્ટોબર, 2023ના હમાસ હુમલા બાદ સુરક્ષા વ્યવસ્થાની સમીક્ષા મહત્ત્વનો મુદ્દો બન્યો છે. હુમલાને રોકવામાં સુરક્ષા એજન્સીઓ કેવી રીતે નિષ્ફળ રહી અને જવાબદારી કોની છે, તે અંગે રાજકીય ચર્ચા ચાલી રહી છે.
આ ઉપરાંત, સેનામાં ફરજિયાત ભરતી અને હરેિડી યહૂદી સમુદાયને મળતી છૂટ પણ વિવાદનો વિષય છે. એક તરફ અન્ય સમુદાયો સમાન જવાબદારીની માગ કરે છે, જ્યારે બીજી તરફ ધાર્મિક અભ્યાસ માટેની પરંપરાગત છૂટ જાળવવાનો મુદ્દો છે.
સુપ્રીમ કોર્ટની સત્તા અને યુદ્ધનો અંત પણ મહત્ત્વના મુદ્દા
નેતન્યાહૂ સરકાર દ્વારા ન્યાયતંત્રની સત્તામાં ફેરફાર કરવાના પ્રયાસો અગાઉથી રાજકીય વિવાદનું કારણ બન્યા છે. સુપ્રીમ કોર્ટની સત્તા અને સરકારના અધિકારો વચ્ચેનું સંતુલન પણ ચૂંટણીમાં ચર્ચાનો વિષય બની શકે છે.
બીજી તરફ, ગાઝામાં યુદ્ધ, હમાસની સ્થિતિ અને લેબનોનમાં હિઝબુલ્લાહ સાથેનો સંઘર્ષ ઇઝરાયલની સુરક્ષા નીતિ માટે મહત્ત્વના પડકારો છે. મતદારો માટે દેશની સુરક્ષા, યુદ્ધનો અંત અને ભવિષ્યની સૈન્ય નીતિ જેવા મુદ્દા નિર્ણાયક બની શકે છે.
આ ચૂંટણીનું પરિણામ માત્ર વડાપ્રધાન પદ પૂરતું મર્યાદિત નહીં રહે, પરંતુ ઇઝરાયલની સુરક્ષા, ન્યાયતંત્ર અને રાજકીય ગઠબંધનોની દિશા પર પણ અસર કરી શકે છે.
