Ahmedabad News : અમદાવાદ મ્યુનિસિપલ કોર્પોરેશન (AMC) હવે સોશિયલ મીડિયા મારફતે પોતાની કામગીરીનો પ્રચાર-પ્રસાર (Social Media Promotion)કરવા કરોડો રૂપિયા ખર્ચવાની તૈયારી કરી રહ્યું છે. મ્યુનિ. તંત્રના Instagram, Facebook, X અને YouTube એકાઉન્ટને વધુ સક્રિય બનાવવા તેમજ યુવા વર્ગ સુધી પહોંચવા માટે એજન્સીની નિમણૂક કરવાની દરખાસ્ત રજૂ કરવામાં આવી છે. આ કામગીરી પાછળ બે વર્ષમાં GST સહિતનો ખર્ચ અલગ રાખીને અંદાજે ₹2.16 કરોડ ખર્ચવાની (AMC Spending)યોજના છે.
સોશિયલ મીડિયા પ્રચાર પાછળ ₹2.16 કરોડનો ખર્ચ
AMC દ્વારા સોશિયલ મીડિયા મેનેજમેન્ટ અને ડિજિટલ પ્રચાર માટે બે વર્ષના કોન્ટ્રાક્ટની દરખાસ્ત સ્ટેન્ડિંગ કમિટી સમક્ષ મૂકવામાં આવી છે. આ કામગીરી ‘ઈવીએમ કન્સલ્ટન્સી’ને સોંપવાની યોજના છે. એજન્સી મ્યુનિ.ના વિવિધ સોશિયલ મીડિયા પ્લેટફોર્મ પર પોસ્ટ, વીડિયો અને રીલ્સ તૈયાર કરીને મૂકશે, જેથી કોર્પોરેશનના ફોલોઅર્સ વધે અને તેની કામગીરી વધુ લોકો સુધી પહોંચે.
ખર્ચનો અંદાજ ₹60 લાખથી વધીને ₹1.08 કરોડ
આ દરખાસ્તને લઈને ખર્ચમાં થયેલો વધારો પણ ચર્ચાનો વિષય બન્યો છે. થોડા મહિના અગાઉ સોશિયલ મીડિયા મેનેજમેન્ટ માટે વાર્ષિક ₹60થી 70 લાખનો અંદાજ રાખવામાં આવ્યો હતો. જોકે, તે સમયે કોઈ એજન્સી કામ કરવા તૈયાર ન થતાં રિ-ટેન્ડર પ્રક્રિયા હાથ ધરવામાં આવી હતી. હવે નવા ટેન્ડર (AMC Tender)બાદ વાર્ષિક ખર્ચ વધારીને ₹1.08 કરોડ કરવામાં આવ્યો છે. બે વર્ષનો કુલ ખર્ચ ₹2.16 કરોડ થશે, જ્યારે GST અલગથી ચૂકવવાનો રહેશે.
દરરોજ ત્રણ પોસ્ટ અને રીલ મૂકવાની જવાબદારી
નવી વ્યવસ્થા હેઠળ એજન્સીએ AMCના સોશિયલ મીડિયા એકાઉન્ટ પર દરરોજ ઓછામાં ઓછી ત્રણ પોસ્ટ અથવા રીલ મૂકવાની રહેશે. તેમાં મ્યુનિ.ની વિકાસ કામગીરી, વિવિધ પ્રોજેક્ટ, નાગરિક સુવિધાઓ અને અન્ય પ્રવૃત્તિઓને ડિજિટલ માધ્યમથી રજૂ કરવામાં આવશે. યુવા પેઢી ખાસ કરીને Gen Z સુધી પહોંચવા માટે વીડિયો અને રીલ્સ આધારિત પ્રચાર પર ભાર મૂકવામાં આવશે.
હોર્ડિંગ્સથી સોશિયલ મીડિયા સુધી પ્રચારની પદ્ધતિ બદલાઈ
અત્યાર સુધી AMC દ્વારા મોટા હોર્ડિંગ્સ, બેનરો અને પત્રિકાઓ મારફતે પ્રચાર કરવામાં આવતો હતો. હવે ડિજિટલ યુગમાં સોશિયલ મીડિયા વધુ અસરકારક માધ્યમ બન્યું હોવાથી કોર્પોરેશન પણ ઓનલાઈન પ્રચાર તરફ વળી રહ્યું છે. જોકે, જાહેર નાણાંમાંથી આટલો મોટો ખર્ચ સોશિયલ મીડિયા પ્રચાર પાછળ કરવામાં આવનાર હોવાથી દરખાસ્ત ચર્ચામાં આવી છે.
આ પણ વાંચો: અમદાવાદ મ્યુનિસિપલ કોર્પોરેશનમાં હવે ‘વહીવટદાર શાસન’, મુકેશ કુમારની એડમિનિસ્ટ્રેટર તરીકે નિમણૂક
આ પણ વાંચો: અમદાવાદ મ્યુનિસિપલ કોર્પોરેશન ઇંધણ બચાવવા ડિજિટલ મીટિંગ કરશે
આ પણ વાંચો: અમદાવાદ મ્યુનિસિપલ કોર્પોરેશન માં BU વગરની નવ હોસ્પિટલ સીલ
