અમેરિકામાં રાષ્ટ્રપતિની ચૂંટણીને લઇને ડોનાલ્ડ ટ્રમ્પ અને જો બાઇડેને પ્રચાર અભિયાન આગળ વધારી દીધો છે. બીજી તરફ, ફેસબુકનાં વાઇસ પ્રેસિડેન્ટ નિક ક્લેગએ જણાવ્યું હતું કે, ફેસબુક અને ઇન્સ્ટાગ્રામ પર 2.2 મિલિયન (22 લાખ) જાહેરાતો રદ કરવામાં આવી રહી છે.
ઉપરાંત, 1,20,000 પોસ્ટ્સ કે જે મતદાનમાં અવરોધ લાવી શકે છે તે દૂર કરવામાં આવી છે. ખોટી માહિતી આપવા માટે 150 મિલિયન પોસ્ટ્સ પર ચેતવણી પણ આપવામાં આવી છે. 2016 ની રાષ્ટ્રપતિની ચૂંટણીમાં ફેસબુક પર મતદારોને ગેરમાર્ગે દોરવાનો આરોપ મૂકવામાં આવ્યો હતો. તે ચૂંટણીમાં ડોનાલ્ડ ટ્રમ્પ રાષ્ટ્રપતિ તરીકે ચૂંટાયા હતા. જે બાદ ફેસબુક સતત સાવચેતી રાખી રહ્યું છે. વર્ષ 2016 માં બ્રિટનમાં લોકમત દરમિયાન આવી જ સમસ્યા જોવા મળી હતી.
નિક ક્લેગે કહ્યું, ‘35,000 કર્મચારીઓ અમારા પ્લેટફોર્મની સુરક્ષાની દેખરેખ માટે કામ કરી રહ્યા છે. તેઓ ચૂંટણીમાં પોતાની ભાગીદારી આપી રહ્યા છે. માહિતીનાં પુરાવા માટે, અમે 70 વિશેષ મીડિયા જૂથો સાથે ભાગીદારી કરી છે, જેમાંથી પાંચ ફ્રાન્સમાં છે.’
