વડાપ્રધાન નરેન્દ્ર મોદીએ ગુરુવારે ક્વાડ સમિટમાં હાજરી આપી હતી. આ વર્ચ્યુઅલ સમિટમાં યુએસ પ્રમુખ જો બિડેન, ઓસ્ટ્રેલિયાના વડા પ્રધાન સ્કોટ મોરિસન અને જાપાનના વડા પ્રધાન ફ્યુમિયો કિશિદાએ પણ હાજરી આપી હતી.બેઠકમાં યુક્રેન મુદ્દે પણ ચર્ચા થઈ હતી. આ દરમિયાન વડા પ્રધાન મોદીએ સંવાદ અને કૂટનીતિના માર્ગ પર પાછા ફરવાની જરૂરિયાત પર ભાર મૂક્યો હતો. તેમણે કહ્યું કે દરેક મુદ્દાને વાતચીત દ્વારા ઉકેલી શકાય છે. આવી સ્થિતિમાં આપણે હિંસાનો માર્ગ છોડીને વાતચીત અને કૂટનીતિ દ્વારા સંકટનો અંત લાવવો જોઈએ.
મીટિંગમાં સપ્ટેમ્બર 2021માં યોજાયેલી ક્વાડ સમિટમાં નક્કી કરવામાં આવેલા મુદ્દાઓની સમીક્ષા કરવામાં આવી હતી. આ દરમિયાન ચારેય દેશોના નેતાઓએ નક્કર પરિણામો હાંસલ કરવાની દિશામાં કામ કરવું જોઈએ અને આ વર્ષના અંતમાં જાપાનમાં યોજાનારી સમિટ પહેલા પરસ્પર સહયોગને વધુ ગાઢ બનાવવો જોઈએ.
વડા પ્રધાન મોદીએ ભારપૂર્વક જણાવ્યું હતું કે ક્વાડે ઈન્ડો-પેસિફિક ક્ષેત્રમાં શાંતિ, સ્થિરતા અને સમૃદ્ધિને પ્રોત્સાહન આપવાના તેના મુખ્ય ઉદ્દેશ્ય પર ધ્યાન કેન્દ્રિત કરવું જોઈએ. તેમણે માનવતાવાદી અને આપત્તિ રાહત, ધિરાણ સ્થિરતા, પુરવઠા શૃંખલા, સ્વચ્છ ઉર્જા, કનેક્ટિવિટી અને ક્ષમતા નિર્માણ જેવા ક્ષેત્રોમાં સહકારના નક્કર અને વ્યવહારુ પગલાઓનું આહ્વાન કર્યું હતું.
બેઠક દરમિયાન નેતાઓએ અન્ય મુદ્દાઓ પર પણ ચર્ચા કરી હતી. તેમાં દક્ષિણપૂર્વ એશિયા, હિંદ મહાસાગર ક્ષેત્ર અને પેસિફિક ટાપુઓની સ્થિતિ અંગે ચર્ચા કરવામાં આવી હતી. પ્રધાનમંત્રીએ યુનાઈટેડ નેશન્સ ચાર્ટર, આંતરરાષ્ટ્રીય કાયદા અને સાર્વભૌમત્વ અને પ્રાદેશિક અખંડિતતાનું સન્માન કરવાના મહત્વનો પુનરોચ્ચાર કર્યો હતો. નેતાઓ પરસ્પર સહકાર જાળવવા અને જાપાનમાં આગામી નેતાઓની સમિટ માટે મહત્વાકાંક્ષી કાર્યસૂચિ તરફ કામ કરવા સંમત થાય છે.
