World News : US પ્રમુખ ડોનાલ્ડ ટ્રમ્પે બુધવારે H-1B વિઝા પર ભારતીયો માટે મોટી રાહતની જાહેરાત કરી છે. NYT અનુસાર ટ્રમ્પે કહ્યું કે આ વિઝા બંધ કરવામાં આવશે નહીં. અમેરિકાને પ્રતિભાની જરૂર છે. તેમણે કહ્યું કે અમારે માત્ર એન્જિનિયર જ નથી જોઈતા, શ્રેષ્ઠ વ્યાવસાયિકો પણ અન્ય નોકરીઓ માટે આવવા જોઈએ. તેઓ અમેરિકનોને તાલીમ પણ આપશે.

H-1B પર ચાલી રહેલી ચર્ચા વિશે પૂછવામાં આવતા ટ્રમ્પે કહ્યું, ‘હું પક્ષ-વિપક્ષની દલીલો સાથે સહમત છું. અમેરિકાને અત્યારે જે ટેલેન્ટની જરૂર છે તે આ વિઝા પ્રોગ્રામ દ્વારા જ મળી શકે છે. અમેરિકામાં આ હાઈ સ્કીલ વિઝા મેળવનાર ભારતીયો પ્રથમ છે. 2024માં જારી કરાયેલા કુલ 2 લાખ 80 હજાર H-1Bમાંથી ભારતીયોને લગભગ 2 લાખ વિઝા મળ્યા હતા. તે જ સમયે ભારતના PM નરેન્દ્ર મોદી અને ટ્રમ્પ આવતા મહિને વોશિંગ્ટનમાં મુલાકાત કરી શકે છે. એક રિપોર્ટ અનુસાર ભારત અને અમેરિકાના રાજદ્વારીઓએ આ માટે દ્વિપક્ષીય તૈયારીઓ તેજ કરી દીધી છે, બેઠકોનો દોર ચાલી રહ્યો છે.

H-1B વિઝા શું છે ?

H-1B નોન-ઇમિગ્રન્ટ વિઝા છે જે અમેરિકન કંપનીઓને વિશિષ્ટ ટેકનિકલ કૌશલ્યની જરૂર હોય તેવા હોદ્દા માટે વિદેશી વ્યાવસાયિકોને નોકરી પર રાખવાની મંજૂરી આપે છે. આ વિઝા દ્વારા ટેક્નોલોજી ક્ષેત્રની કંપનીઓ દર વર્ષે ભારત અને ચીન જેવા દેશોમાંથી હજારો કામદારોની ભરતી કરે છે. H-1B વિઝા સામાન્ય રીતે એવા લોકોને આપવામાં આવે છે, જેઓ કોઈ ચોક્કસ વ્યવસાય સાથે સંકળાયેલા હોય છે (જેમ કે IT વ્યાવસાયિકો, આર્કિટેક્ચર, આરોગ્ય વ્યાવસાયિકો વગેરે). જે પ્રોફેશનલ્સને નોકરીની ઓફર કરવામાં આવે છે તેઓ જ આ વિઝા મેળવી શકે છે. તે સંપૂર્ણપણે એમ્પ્લોયર પર આધાર રાખે છે. તેનો અર્થ એ કે, જો એમ્પ્લોયર તમને નોકરીમાંથી કાઢી મૂકે અને અન્ય એમ્પ્લોયર તમને ઓફર ન કરે, તો વિઝા સમાપ્ત થઈ જશે.

H-1B વિઝા અંગે ટ્રમ્પ સમર્થકોના અભિપ્રાય પણ એકબીજામાં વહેંચાયેલા છે. લૌરા લૂમર, મેટ ગેટ્ઝ અને એન કુલ્ટર જેવા ટ્રમ્પ સમર્થકો આ વિઝાનો ખુલ્લેઆમ વિરોધ કરી રહ્યા છે. આ લોકોનું કહેવું છે કે H-1B વિઝા દ્વારા વિદેશી લોકોને અમેરિકામાં નોકરી મળશે અને અમેરિકન લોકો નોકરી ગુમાવશે. બીજી તરફ વિવેક રામાસ્વામી જેવા ટ્રમ્પ સમર્થકોએ તેનું સમર્થન કર્યું છે. તેમનું કહેવું છે કે અમેરિકાને આર્થિક રીતે મજબૂત કરવા માટે વિશ્વના ટોચના લોકોને હાયર કરવા જોઈએ.

ટ્રમ્પ સરકારમાં ડિપાર્ટમેન્ટ ઓફ ગવર્નમેન્ટ એફિશિયન્સી (DoGE)ના વડા એવા એલોન મસ્કે આ પ્રોગ્રામને ડેડ ગણાવ્યો છે અને તેને મોટા પાયે સુધારવાની વાત કરી છે. અમેરિકા દર વર્ષે 65,000 લોકોને H-1B વિઝા આપે છે . તેની સમય મર્યાદા 3 વર્ષની છે. જો જરૂરી હોય તો, તેને વધુ 3 વર્ષ માટે લંબાવી શકાય છે. ભારતીય લોકોને અમેરિકામાં 10માંથી 7 H-1B વિઝા મળે છે. આ પછી ચીન, કેનેડા અને દક્ષિણ કોરિયા આવે છે.

આ પણ વાંચો: 7 લાખ ભારતીયોનું ટેન્શન વધ્યું! જાણો ઇમિગ્રન્ટ્સ અંગે ડોનાલ્ડ ટ્રમ્પની જાહેરાતથી અમેરિકામાં શું સ્થિતિ છે? .

આ પણ વાંચો: હું ઈચ્છું છું કે ફક્ત ખૂબ સક્ષમ લોકો જ આપણા દેશમાં આવે: રાષ્ટ્રપતિ ટ્રમ્પ

આ પણ વાંચો: અમેરિકાના 22 રાજ્યોએ જન્મ અધિકાર નાગરિકતા મુદ્દે ટ્રમ્પ વિરુદ્ધ દાવો દાખલ કર્યો