MADHYA PRADESH NEWS :મધ્યપ્રદેશના બેતુલમાં મતદાન કર્મચારીઓને પરત લાવવાની બસમાં આગ લાગી હતી. બસ મતદાન સામગ્રી (EVM અને VVPAT) અને છ મતદાન મથકોના કર્મચારીઓને લઈને બેતુલ જિલ્લા મુખ્યાલય આવી રહી હતી, ત્યારે આ ઘટના બની. આ અકસ્માતમાં તમામ મતદાન કર્મચારીઓ સુરક્ષિત છે. મતદાન સામગ્રી અંગેની સ્થિતિ હજુ સ્પષ્ટ નથી. ડ્રાઇવરે સળગતી બસમાંથી છલાંગ લગાવી હતી. ચૂંટણી પૂર્ણ કરીને પરત ફરી રહેલા મતદાન કર્મચારીઓએ પણ સળગતી બસમાંથી કૂદીને મુશ્કેલીથી પોતાનો જીવ બચાવ્યો હતો.
આ અકસ્માત સાઈખેડા પોલીસ સ્ટેશન વિસ્તારના બિસનૂર અને પૌની ગૌલા ગામ વચ્ચે થયો હતો, જેની માહિતી મળતાં જ પોલીસ અધિકારીઓ ઘટનાસ્થળે પહોંચી ગયા હતા. બેતુલ, મુલતાઈ અને આથનેરથી ફાયર બ્રિગેડને બોલાવવામાં આવી હતી. ફાયર ફાઈટરોએ બસની આગને કાબુમાં લીધી હતી અને અંદર રાખેલી મતદાન સામગ્રીને બહાર કાઢી હતી. મતદાન કર્મચારીઓ અને EVM-VVPAT મશીનો લાવવા માટે બીજી બસની વ્યવસ્થા કરવામાં આવી હતી. લોકસભા ચૂંટણી 2024 ના ત્રીજા તબક્કા હેઠળ, 7 મેના રોજ, મધ્યપ્રદેશની 9 બેઠકો પર મતદાન થયું – મોરેના, ભિંડ (SC- અનામત), ગ્વાલિયર, ગુના, સાગર, વિદિશા, ભોપાલ, રાજગઢ અને બેતુલ (ST- અનામત).
ચૂંટણી પંચના જણાવ્યા અનુસાર, સાંજે 6 વાગ્યા સુધી રાજ્યમાં 66.12 ટકા મતદાન નોંધાયું હતું અને ક્યાંયથી કોઈ અપ્રિય ઘટના નોંધાઈ નથી. ચૂંટણી પંચ આવતીકાલે મતદાનની અંતિમ ટકાવારી જાહેર કરશે. આ તબક્કામાં રાજ્યના બે પૂર્વ મુખ્યમંત્રી શિવરાજ સિંહ ચૌહાણ (BJP)અને દિગ્વિજય સિંહ (Congress), કેન્દ્રીય મંત્રી જ્યોતિરાદિત્ય સિંધિયા સહિત કુલ 127 ઉમેદવારો મેદાનમાં હતા. છેલ્લી લોકસભા ચૂંટણીમાં આ બેઠકો પર 66.63% મતદાન નોંધાયું હતું. રાજ્યની કુલ 29 બેઠકોમાંથી 12 બેઠકો માટે 19 અને 26 એપ્રિલના રોજ બે તબક્કામાં મતદાન થયું હતું, ત્રીજા તબક્કામાં 7 મેના રોજ 9 બેઠકો માટે મતદાન થયું હતું અને ચોથા તબક્કામાં બાકીની આઠ બેઠકો માટે મેના રોજ મતદાન થયું હતું.
મધ્યપ્રદેશની નવ બેઠકોમાંથી જ્યાં મતદાન થયું હતું, તેમાં સૌથી વધુ મતદાન રાજગઢ મતવિસ્તારમાં 72.99 ટકા અને સૌથી ઓછું 52.91 ટકા ભીંડમાં નોંધાયું હતું. બેતુલ સીટ પર 69.68 ટકા, ભોપાલમાં 60.99 ટકા, ગુનામાં 69.34 ટકા, ગ્વાલિયરમાં 58.86 ટકા, મોરેનામાં 55.77 ટકા, સાગરમાં 62.06 ટકા અને વિદિશામાં 70.35 ટકા મતદાન નોંધાયું હતું. તમને જણાવી દઈએ કે આ વખતે જ્યોતિરાદિત્ય સિંધિયાએ તેમના ગૃહ ક્ષેત્ર ગુનાથી ચૂંટણી લડી હતી. શિવરાજ સિંહ ચૌહાણ અને દિગ્વિજય સિંહ અનુક્રમે વિદિશા અને રાજગઢ બેઠક પરથી ચૂંટણી લડ્યા હતા.
આ પણ વાંચો:વિશ્વાસ જ ગુમાવી દેશે લોકો; બંગાળના શિક્ષક ભરતી કૌભાંડ પર બોલ્યા ચીફ જસ્ટિસ ડીવાય ચંદ્રચુડ
આ પણ વાંચો:કોરોના દરેક સામે કારગર All-in-One રસી આવશે….
