AI and Virus News: આર્ટિફિશિયલ ઈન્ટેલિજન્સ હવે માત્ર તસવીરો, લખાણ કે કમ્પ્યુટર કોડ બનાવવા પૂરતું મર્યાદિત રહ્યું નથી. AIનો ઉપયોગ હવે જીવવિજ્ઞાનના ક્ષેત્રમાં પણ થઈ રહ્યો છે. અમેરિકાની સ્ટેનફોર્ડ યુનિવર્સિટી અને આર્ક ઇન્સ્ટિટ્યૂટના વૈજ્ઞાનિકોએ AIની મદદથી 16 નવા વાઈરસ બનાવ્યા છે.
આ સંશોધન પ્રતિષ્ઠિત જર્નલ Scienceમાં પ્રકાશિત થયું છે. સંશોધકોના જણાવ્યા અનુસાર, આ પ્રયોગ સિન્થેટિક બાયોલોજીના ક્ષેત્રમાં મહત્વપૂર્ણ સિદ્ધિ છે. જોકે, તેની સાથે બાયોસેફ્ટી અને બાયોસિક્યોરિટીને લઈને ચર્ચા પણ શરૂ થઈ છે.
AIએ તૈયાર કર્યા નવા વાઈરસના જિનોમ
સંશોધકોએ Evo 2 નામના જિનોમ લેન્ગ્વેજ મોડલને આશરે 20 લાખ બેક્ટેરિયોફેજના DNA ડેટા પર તાલીમ આપી હતી. ત્યારબાદ આર્ટિફિશિયલ ઈન્ટેલિજન્સએ અગાઉ કુદરતમાં જોવા ન મળેલા અનેક નવા જિનોમ ડિઝાઇન તૈયાર કર્યા.
આમાંથી 285 ડિઝાઇનને લેબોરેટરીમાં ચકાસવામાં આવી. સંશોધનમાં 16 એવા નવા વાઈરસ મળ્યા, જે જીવંત હતા અને બેક્ટેરિયાને સંક્રમિત કરીને તેનો નાશ કરવામાં સક્ષમ હતા.
આ વાઈરસ માણસોને સંક્રમિત કરતા નથી
અહીં મહત્વની વાત એ છે કે આ વાઈરસ માનવ, પ્રાણી કે છોડને સંક્રમિત કરતા નથી. આ બેક્ટેરિયોફેજ છે, એટલે કે એવા વાઈરસ જે ખાસ કરીને બેક્ટેરિયા પર હુમલો કરે છે.
વૈજ્ઞાનિકોનું માનવું છે કે ભવિષ્યમાં આવી ટેક્નોલોજીનો ઉપયોગ એન્ટિબાયોટિક સામે પ્રતિરોધક બેક્ટેરિયાના ચેપની સારવાર માટે થઈ શકે છે. વિશ્વભરમાં વધતી એન્ટિબાયોટિક રેઝિસ્ટન્સની સમસ્યા વચ્ચે આ સંશોધન ઉપયોગી સાબિત થઈ શકે છે.
આર્ટિફિશિયલ ઈન્ટેલિજન્સના દુરુપયોગને લઈને ચિંતા
બીજી તરફ, આર્ટિફિશિયલ ઈન્ટેલિજન્સની મદદથી નવા જૈવિક જીવો અથવા જિનોમ ડિઝાઇન કરવાની ક્ષમતા વધતા બાયોસેફ્ટીને લઈને ચિંતા પણ વધી છે. નિષ્ણાતોનું માનવું છે કે હાલના પ્રયોગમાં સુરક્ષિત બેક્ટેરિયોફેજનો ઉપયોગ થયો હોવા છતાં, ભવિષ્યમાં આવી ટેક્નોલોજીનો ખોટો ઉપયોગ થવાની સંભાવનાને નજરઅંદાજ કરી શકાય નહીં.
ખાસ કરીને આર્ટિફિશિયલ ઈન્ટેલિજન્સ અને DNA સિન્થેસિસ જેવી ઝડપથી વિકસતી ટેક્નોલોજી માટે મજબૂત નિયમન, સુરક્ષા ધોરણો અને વૈશ્વિક સ્તરે દેખરેખ જરૂરી હોવાનું નિષ્ણાતો જણાવી રહ્યા છે. આ રીતે, AI દ્વારા બનાવાયેલા આ નવા બેક્ટેરિયોફેજ એક તરફ નવી સારવારની શક્યતાઓ ઊભી કરે છે, તો બીજી તરફ ભવિષ્યની બાયોસિક્યોરિટી માટે નવા પડકારો પણ ઉભા કરે છે.
આ પણ વાંચો:દક્ષિણ કોરિયા નૌસેનાનો કમાલ; AI ટેકનિકથી સમુદ્રમાં માઇન શોધવામાં મળી સફળતા
આ પણ વાંચો:AIની મદદથી વૈજ્ઞાનિકોએ બનાવ્યા 16 નવા વાઈરસ, જાણો કેમ વધી બાયોસેફ્ટીની ચિંતા?
આ પણ વાંચો:AIથી હિન્દી બોલતી આફ્રિકન યુવતીનો મોટો ખેલ! રાજકોટના ખેડૂત સાથે લાખોની છેતરપિંડી
