Ahmedabad AMC Election: ગુજરાતમાં સ્થાનિક સ્વરાજ્યની ચૂંટણીઓનો ધમધમાટ શરૂ થઈ ગયો છે. સત્તાધારી પક્ષ ભારતીય જનતા પાર્ટી (BJP) એ અમદાવાદ મહાનગરપાલિકામાં ફરી એકવાર સત્તા કબ્જે કરવા માટે પોતાની રણનીતિ ઘડવાનું શરૂ કરી દીધું છે. આજે 8 એપ્રિલ અને આવતીકાલે 9 એપ્રિલ એમ બે દિવસ સુધી મહાનગરપાલિકાની બેઠકો માટે પાર્લામેન્ટરી બોર્ડમાં મહામંથન ચાલશે. સૂત્રોના જણાવ્યા અનુસાર, ભાજપ આ વખતે ‘નો રિપીટ’ અને ‘ક્લીન ઈમેજ’ થિયરી અપનાવીને અમદાવાદના વર્તમાન 70 ટકા જેટલા (આશરે 140) કોર્પોરેટરોને ઘરભેગા કરવાની તૈયારીમાં છે.

ટિકિટ કાપવા માટે ભાજપે બનાવ્યા આકરા નિયમો

રાજ્ય ચૂંટણી પંચની નવી મતદાર યાદી, અનામત રોટેશન અને બદલાયેલા જાતિગત સમીકરણોને ધ્યાનમાં રાખીને ભાજપે ઉમેદવાર પસંદગી માટે કડક માપદંડો નક્કી કર્યા છે. આ માપદંડો અંતર્ગત ઉંમર અને ટર્મના બાધ મુજબ 60 વર્ષથી વધુ ઉંમરના નેતાઓને ટિકિટ મળશે નહીં. આ ઉપરાંત, ત્રણ ટર્મના નિયમ અનુસાર સળંગ ત્રણ ટર્મથી ચૂંટણી લડીને કોર્પોરેટર બનતા નેતાઓના પણ પત્તા કપાશે. પાર્ટી દ્વારા સ્વચ્છ છબીને વિશેષ પ્રાધાન્ય આપવામાં આવ્યું છે, જેથી માત્ર બિનવિવાદાસ્પદ અને જનતા વચ્ચે સારી છબી ધરાવતા ઉમેદવારોને જ મેદાનમાં ઉતારવામાં આવશે.

AMC : કોણ-કોણ છે લિસ્ટમાં?

પોતાની ટર્મ દરમિયાન વિવિધ વિવાદોમાં સપડાયેલા અને પાર્ટીની છબી ખરડનારા કોર્પોરેટરોને આ વખતે ટિકિટથી વંચિત રાખવામાં આવશે. આ યાદીમાં ખોખરા વોર્ડના ચેતન પરમારનો સમાવેશ થાય છે, જેઓ સતત વિદેશમાં રહેતા હતા અને ડિસ્ક્વોલિફાય ન થાય તે માટે માત્ર ચોથી સામાન્ય સભામાં સહી કરવા આવતા હતા. આ ઉપરાંત, નવરંગપુરા વોર્ડના નીરવ કવિ કે જેઓ ધર્મ અને જાતિ આધારિત નિવેદનો કરીને મોટા વિવાદમાં ફસાયા હતા, અને રામોલ-હાથીજણના સિદ્ધાર્થ પરમાર કે જેમની સામે પોલીસ ફરિયાદ નોંધાઈ ચૂકી છે,

તેમના પણ પત્તા કપાશે. વધુમાં, નવા વાડજના લલીતા મકવાણા કે જેમની સામે ચૂંટણીમાં ખોટું એફિડેવિટ (સોગંદનામું) રજૂ કરવા બદલ ફરિયાદ થઈ હતી, તેમજ વિરાટનગરના સંગીતા કોરાટ અને સુરેશ ખાચર કે જેઓ બાંધકામ સંબંધિત વિવાદોમાં સપડાયા હતા અને જેમની ફરિયાદો છેક હાઈકમાન્ડ સુધી પહોંચી હતી, તેમને પણ આ વખતે ટિકિટથી વંચિત રાખવામાં આવશે.

એક્ટિવ હોદ્દેદારો અને કમિટી મેમ્બર્સને મળશે ઈનામ

એક તરફ વિવાદિત નેતાઓ પર કાતર ફરશે, તો બીજી તરફ જે કોર્પોરેટરોએ નિષ્ક્રિય કમિટીઓને જાગૃત કરી સારી કામગીરી કરી છે, તેમને પાર્ટી ફરીથી તક આપશે. રેવન્યુ કમિટીના જૈનિક વકીલ અને પ્રદીપ દવે, લીગલ કમિટીના પ્રકાશ ગુર્જર, રિક્રિએશન કમિટીના જયેશ ત્રિવેદી અને સ્નેહાબા પરમાર તેમજ હાઉસિંગ કમિટીના અશ્વિન પેથાણી અને મુકેશ પટેલને તેમની એક્ટિવ કામગીરીના આધારે રિપીટ કરવામાં આવી શકે છે.

આ 12 વોર્ડમાં જોવા મળશે આખી નવી પેનલ

કોંગ્રેસના પ્રભુત્વવાળી બેઠકો, વિવાદોથી ઘેરાયેલા વોર્ડ અને નવા રોટેશનને ધ્યાનમાં રાખીને ભાજપ શહેરના 12 વોર્ડમાં ચારેય ઉમેદવારો (આખી પેનલ) બદલવા જઈ રહી છે. આ વોર્ડમાં જૂના એક પણ ઉમેદવારને રિપીટ કરાશે નહીં, જેમાં ઘાટલોડિયા, નવા વાડજ, કુબેરનગર, શાહપુર, ઠક્કરબાપાનગર, સૈજપુર બોઘા, દરિયાપુર, સરસપુર-રખિયાલ, જમાલપુર, ગોમતીપુર, મકતમપુરા અને બહેરામપુરાનો સમાવેશ થાય છે. આ સિવાયના બાકીના તમામ વોર્ડમાં વધુમાં વધુ બે જ વર્તમાન ઉમેદવારોને રિપીટ કરવામાં આવી શકે છે.

આ પણ વાંચો : સ્થાનિક ચૂંટણી પહેલા AAPમાં જોડાયા પદ્મિનીબા

આ પણ વાંચો : અમદાવાદમાં ભાજપના 70% કોર્પોરેટરોની ટિકિટ કપાશે, AAP-કોંગ્રેસની નવી યાદી

આ પણ વાંચો : સ્થાનિક સ્વરાજ્યની ચુંટણીના માહોલ વચ્ચે અમિત શાહ આજે ગુજરાતના પ્રવાસે