કાળઝાળ ગરમીનો પ્રકોપ હવે શાળાએ જતા નાના બાળકોને હેરાન કરી રહ્યો છે. આંધ્રપ્રદેશ, ઓડિશા બાદ હવે પશ્ચિમ બંગાળમાં ગરમીના પ્રકોપને જોતા શાળા બંધ કરવાનો નિર્ણય લેવામાં આવ્યો છે. રાજ્ય સરકારે તમામ સરકારી શાળાઓને ઉનાળુ વેકેશનની તૈયારી કરવાનો નિર્દેશ આપ્યો છે. ખાનગી શાળાઓ પણ આ સૂચન અપનાવી શકે છે. સૂચના મુજબ, ઉનાળાના વેકેશન માટે સોમવાર 02 મેથી શાળાઓ બંધ રહેશે.
રાજ્યમાં વધતી જતી ગરમીને ધ્યાનમાં રાખીને, પશ્ચિમ બંગાળના મુખ્ય પ્રધાન મમતા બેનર્જીએ આજે ઉચ્ચ અધિકારીઓ સાથેની ઉચ્ચ સ્તરીય બેઠકમાં નિર્ણય લીધો હતો કે શાળાના બાળકોને ગરમીથી રાહત આપવા માટે ઉનાળુ વેકેશન અગાઉથી શરૂ કરવું જોઈએ. આ નિયમ સરકારી શાળાઓ માટે જારી કરવામાં આવ્યો છે પરંતુ ખાનગી શાળાઓને પણ આવું કરવાનું સૂચન કરવામાં આવ્યું છે.
હવામાન વિભાગે આગામી દિવસોમાં બંગાળના ઘણા જિલ્લાઓમાં હીટવેવની ચેતવણી આપી છે. મંગળવારે રાજ્યના મોટાભાગના જિલ્લાઓમાં સરેરાશ તાપમાન 40 ડિગ્રી સેલ્સિયસથી ઉપર માપવામાં આવ્યું હતું.
જણાવી દઈએ કે ચાલી રહેલી બોર્ડ પરીક્ષાઓ માટે પશ્ચિમ બંગાળ બોર્ડે તમામ શાળાઓને વીજળી, પીવાના પાણી, ORS અને તબીબી સુવિધાઓ માટે સંપૂર્ણ સમયની તૈયારી રાખવાનો નિર્દેશ આપ્યો છે. આ પહેલા આંધ્રપ્રદેશ અને ઓડિશામાં ગરમી અને હિટ વેવ વધવાની ચેતવણીને ધ્યાનમાં રાખીને શાળાઓ બંધ કરવામાં આવી છે. ઝારખંડમાં બાળકોને ગરમીના પ્રકોપથી બચાવવા માટે શાળાના સમયમાં પણ ફેરફાર કરવામાં આવ્યો છે. હવે શાળાઓ સવારે 6 થી સવારે 10 વાગ્યા સુધી જ ચાલશે. જોકે બોર્ડની પરીક્ષાઓ સમયપત્રક મુજબ ચાલુ રહેશે.
આ પણ વાંચો: fuel prices / ટેક્સમાં ઘટાડો કરીને તમામ સામાન્ય નાગરિકને લાભ આપ્યો છે: અનુરાગ ઠાકુર
આ પણ વાંચો: Terrorist / બલૂચના શિક્ષિત યુવાનો આતંકવાદી બનવા માટે છે તૈયાર, જાણો કેમ
