સંસદના ચોમાસુ સત્રના એક દિવસ પહેલા રવિવારે સર્વપક્ષીય બેઠક મળી હતી. પીએમએ સર્વપક્ષીય બેઠકમાં કહ્યું કે વિપક્ષના સૂચન મહત્વપૂર્ણ છે. વાદ-વિવાદ ખૂબ મહત્વનો છે અને ત્યાં અર્થપૂર્ણ અને સ્વસ્થ ચર્ચા થવી જોઈએ. પ્રધાનમંત્રીએ કહ્યું કે તેઓ નિયમ મુજબ દરેક મુદ્દા પર ચર્ચા કરવા તૈયાર છે. સંસદીય બાબતોના પ્રધાન પ્રહલાદ જોશીએ બેઠક બાદ જણાવ્યું હતું કે ચોમાસુ સત્રને ધ્યાનમાં રાખીને 33 પક્ષોના ગૃહના નેતાઓએ બેઠકમાં ભાગ લીધો હતો અને કુલ 40 થી વધુ નેતાઓ તેમાં હાજર રહ્યા હતા. ઘણા નેતાઓએ મહત્વપૂર્ણ મુદ્દાઓ પર ચર્ચા કરવા તેમના સૂચનો આપ્યા છે.
આ બેઠકમાં સરકારે ચોમાસું સત્ર સરળતાથી ચલાવવામાં વિરોધી પક્ષોનો સહયોગ માંગ્યો હતો. કેન્દ્રીય સંસદીય બાબતોના પ્રધાન પ્રહલાદ જોશીએ આ બેઠક માટે તમામ પક્ષોને આમંત્રણ આપ્યું હતું. આજની બેઠક માટે રાજનાથ સિંહ, પિયુષ ગોયલ, પ્રહલાદ જોશી, મલ્લિકાર્જુન ખડગે, અધિર રંજન ચૌધરી, આનંદ શર્મા, સંજય રાઉત, પશુપતિ પારસ, અનુપ્રિયા પટેલ, રામ ગોપાલ યાદવ, ત્રુચી શિવા, ટીઆર બાલુ, હરસિમરત કૌર બાદલ, ડેરેક ઓ. બ્રાયન, સુદિપ બંદિયોપાધ્યાય, સંજય સિંહ આવી પહોંચ્યા છે.
સોમવારે શરૂ થયેલું સત્ર 13 ઓગસ્ટ સુધી ચાલશે. આ દરમિયાન વિપક્ષ મોંઘવારી, તેલના ભાવમાં વધારો, કોરોના રસીનો અભાવ, ખેડૂત આંદોલન, રફાલ સોદો, ભ્રષ્ટાચાર અને રાષ્ટ્રીય સુરક્ષા જેવા મુદ્દાઓ પર સરકારને ઘેરી લેવાનો પ્રયાસ કરશે. તે જ સમયે, સરકાર આ સત્રમાં પસાર થયેલા ત્રણ વટહુકમો સહિત કુલ 23 બિલ પાસ કરાવવાની કોશિશ કરશે. તેમાંથી 17 નવા બીલ છે.
