ભરૂચમાં કાર્યરત રાઈફલ ઍસોસિએશનમાં તાલીમ મેળવતા સ્પર્ધકો એ અમદાવાદ ખાતે યોજાયેલી રાજ્યકક્ષાની શૂટર સ્પર્ધામાં ભાગ લેતા ભરૂચનાં ત્રણ શૂટરો વિજેતા થતા ભરૂચનું નામ રોશન કર્યું છે. ત્યારે જીત મેળવનારા શૂટરોએ પણ આજની યુવા પેઢીઓને આ એકેડમી માં લાભ લેવા માટે અપીલ કરી છે.
ભરૂચ જિલ્લા રાઇફલ એસોસિએશનમાં તાલીમ મેળવતા શૂટરોએ રાજ્યકક્ષાની સ્પર્ધામાં મેડલ મેળવ્યો છે. અમદાવાદમાં હાલમાં જ રમાયેલ કે.જી.પ્રભુ શૂટિંગ ચેમ્પિયનશિપમાં પાર્થસિંહ રાજાવતે ૦.૧૭૭ એર પિસ્તોલ અંડર ૧૨ કેટેગરીમાં ગોલ્ડ મેડલ મેળવેલ છે. જ્યારે ખુશી ચુડાસમાએ ૦.૧૭૭ એર રાઈફલમાં અંન્ડર-19 માં સિલ્વર મેડલ મેળવેલ છે. ખુશી ચુડાસમાએ એક મહિનાનાં ખૂબ જ ઓછા સમયમાં પ્રેક્ટિસ કરી મેડલ પ્રાપ્ત કર્યો છે. જ્યારે અંડર-૧૨ કેટેગરીમાં ઉત્કર્ષ રાજેશ પાંડેએ બ્રોન્ઝ મેડલ મેળવ્યો છે. ઉત્કર્ષ પાંડે છેલ્લા ત્રણ વર્ષથી રાઇફલ શૂટિંગનો અભ્યાસ કરે છે અને તે નેશનલ પ્લેયર છે.
આ ત્રણે શૂટરોએ આખા ગુજરાત રાજ્યની ડિસ્ટ્રિક્ટ લેવલની રાઇફલ શૂટિંગ સ્પર્ધામાં મેડલ મેળવી, ગન શૂટિંગ એકેડમી અંકલેશ્વર અને ભરૂચ ડિસ્ટ્રિક્ટ રાઇફલ એસોસિએશનનું નામ ઉજ્જવળ કર્યુ છે.