Ahmedabad News: કેન્દ્રીય પ્રત્યક્ષ કર બોર્ડ (CBDT) એ કરદાતાઓ અને TDS-TCS કપાતકર્તાઓને મોટી રાહત આપતો નિર્ણય જાહેર કર્યો છે. આ નિર્ણય મુજબ, આધાર કાર્ડ અને પરમેનન્ટ એકાઉન્ટ નંબર (PAN) લિંક કરવાની અંતિમ તારીખ 30 સપ્ટેમ્બર, 2025 સુધી લંબાવવામાં આવી છે. આ નિર્ણયથી લાખો કરદાતાઓ અને વ્યવસાયોને ઉંચા દરે TDS (ટેક્સ ડિડક્ટેડ એટ સોર્સ) અને TCS (ટેક્સ કલેક્ટેડ એટ સોર્સ)ની કપાતથી રાહત મળશે, જે નિષ્ક્રિય PANને કારણે લાગુ થતી હતી.
આવકવેરા વિભાગે સ્પષ્ટ કર્યું છે કે જો કોઈ વ્યક્તિનું PAN કાર્ડ 1 એપ્રિલ, 2024થી 31 જુલાઈ, 2025 વચ્ચેની ચુકવણીઓ માટે 30 સપ્ટેમ્બર, 2025 સુધીમાં આધાર સાથે લિંક થઈ જાય, તો તેની પાસેથી ઉંચા દરે TDS અથવા TCS કાપવામાં આવશે નહીં. આ ઉપરાંત, 1 ઓગસ્ટ, 2025 પછીની ચુકવણીઓ માટે, જો PAN કાર્ડ બે મહિનાની અંદર ફરીથી સક્રિય કરવામાં આવે, તો પણ ઉચ્ચ દર લાગુ થશે નહીં. આ નિર્ણયથી નિષ્ક્રિય PANને કારણે આવેલી નોટિસ અને માંગણીઓમાંથી કરદાતાઓને રાહત મળશે.
અગાઉ, જો PAN કાર્ડ આધાર સાથે લિંક ન હોય, તો તેને નિષ્ક્રિય ગણવામાં આવતું હતું. આવા કિસ્સાઓમાં, આવકવેરા કાયદાની કલમ 206AA અને 206CC હેઠળ ઉચ્ચ દરે TDS અથવા TCS કાપવામાં આવતો હતો. આના કારણે ઘણા કરદાતાઓને નોટિસ મળતી હતી અને વધારાની ટેક્સની માંગણી કરવામાં આવતી હતી. CBDTના આ નવા નિર્ણયથી આવી સમસ્યાઓનો અંત આવશે અને કરદાતાઓને નાણાકીય બોજમાંથી રાહત મળશે.
આ નિર્ણયથી TDS-TCS કપાત કરનારા વ્યવસાયો અને વસૂલાત એજન્ટોને પણ મોટી રાહત મળશે. અગાઉ, નિષ્ક્રિય PANને કારણે ઉચ્ચ દરે ટેક્સ કાપવાની ફરજ પડતી હતી, જેના કારણે વ્યવહારોમાં જટિલતા અને દંડની શક્યતા વધી જતી હતી. હવે, જો PAN પછીથી આધાર સાથે લિંક થઈને સક્રિય થઈ જાય, તો ઉચ્ચ દરે કાપવામાં આવેલો TDS/TCS નિયમિત દરે સમાયોજિત થઈ શકશે. આનાથી વ્યવસાયોને નાણાકીય અને વહીવટી બોજ ઘટશે.
આ પણ વાંચો: અમદાવાદ : ભાડજ-શીલજ કેનાલ પાસે ઝાડ પરથી યુવકનો મૃતદેહ મળ્યો
આ પણ વાંચો: મંતવ્ય ન્યૂઝના અહેવાલની અસર, અમદાવાદ સારંગપુરની જર્જરિત પાણીની ટાંકી બંધ
આ પણ વાંચો: અમદાવાદના બગોદરામાં એકજ પરિવારના પાંચ સભ્યોની સામૂહિક આત્મહત્યા
