કેન્દ્રીય મંત્રી રામદાસ આઠવલેએ સોમવારે કહ્યું હતું કે જો ભાજપ ઉદ્વવ ઠાકરેના નેતૃત્વવાળી પાર્ટીને સંપૂર્ણ પાંચ વર્ષની મુદત માટે મુખ્યમંત્રી પદ આપવા માટે સંમત થાય તો ભાજપ અને શિવસેના એકસાથે આવી શકે છે. પુણેમાં મીડિયા સાથે વાત કરતાં આઠવલેએ કહ્યું કે આ બે ભૂતપૂર્વ સાથી પક્ષોનું સાથે આવવું એ કોઈ મોટી વાત નથી, હું ભાજપને આ યોજના પર વિચાર કરવા વિનંતી કરીશ.
આઠવલેએ કહ્યું, “મારો પ્રસ્તાવ એ છે કે એવી સંભાવના પર વિચાર કરવો જોઈએ કે જો ભાજપ શિવસેનાને મુખ્યમંત્રી પદ આપે છે, તો બંને પક્ષો સાથે આવી શકે છે.” આ બંને પક્ષોનું એકસાથે આવવું કોઈ મોટી વાત નહીં હોય. શિવસૈનિકોને પણ લાગે છે કે આ બંને પક્ષોએ સાથે આવવું જોઈએ. કેન્દ્રીય મંત્રીએ કહ્યું કે જો બંને પક્ષ ફરી એકવાર સાથે આવે તો રાજ્ય માટે સારું રહેશે.
ઉત્તર પ્રદેશમાં આવતા વર્ષે યોજાનારી વિધાનસભાની ચૂંટણીને લઈને, રિપબ્લિકન પાર્ટી ઓફ ઈન્ડિયા (RPI)ના પ્રમુખ આઠવલેએ કહ્યું કે યુપીમાં સત્તારૂઢ ભાજપે ગઠબંધનના ભાગરૂપે આરપીઆઈને પાંચથી છ બેઠકો આપવી જોઈએ. તેમણે કહ્યું કે આરપીઆઈના યુપીમાં સમર્થકો છે અને આવી વ્યવસ્થાથી ભાજપને ફાયદો થશે અને પાર્ટી ઉત્તર પ્રદેશમાં 300થી વધુ બેઠકો જીતી શકે છે.
