Ahmedabad News: જમીન કૌભાંડ અને બનાવટી દસ્તાવેજોના કેસમાં દોષિત ઠરાવાયેલા પોપ્યુલર બિલ્ડરના રમણ પટેલ (Raman Patel)ને ગુજરાત હાઇકોર્ટમાંથી મોટો ઝટકો મળ્યો છે. હાઇકોર્ટે તેમની સજા રદ કરવા તેમજ ચુકાદા પર સ્ટે મૂકવાની માંગણી ફગાવી દીધી છે. પરિણામે સેશન્સ કોર્ટ દ્વારા ફટકારવામાં આવેલી ચાર વર્ષની સજા હાલ યથાવત રહેશે.
શું છે સમગ્ર મામલો?
સાણંદ તાલુકાના ચેખલા ગામમાં જમીન સંબંધિત એક વિવાદાસ્પદ કેસમાં રમણ પટેલ (Raman Patel) સામે ગંભીર આરોપો લાગ્યા હતા. તપાસ દરમિયાન સામે આવ્યું હતું કે નવી શરતની જમીનને જૂની શરતની દર્શાવવા માટે કથિત રીતે નકલી સરકારી દસ્તાવેજો તૈયાર કરવામાં આવ્યા હતા. આ દસ્તાવેજોના આધારે જમીન હડપવાનો પ્રયાસ કરવામાં આવ્યો હોવાનું ફરિયાદમાં જણાવાયું હતું.
Raman Patelને સેશન્સ કોર્ટે ફટકારી હતી 4 વર્ષની સજા
વર્ષ 2025માં સેશન્સ કોર્ટે રમણ પટેલ (Raman Patel)ને છેતરપિંડી, બનાવટી દસ્તાવેજો તૈયાર કરવા અને કાવતરું રચવાના ગુનામાં દોષિત ઠેરવી ચાર વર્ષની કેદ અને રૂ.1.50 લાખનો દંડ ફટકાર્યો હતો.
હાઇકોર્ટમાં સજા રદ કરવાની માંગ
સેશન્સ કોર્ટના આ ચુકાદા સામે રમણ પટેલે (Raman Patel) ગુજરાત હાઇકોર્ટ (Gujarat High Court)માં અરજી દાખલ કરી હતી. અરજીમાં પોતાની ઉંમર અને સ્વાસ્થ્યની સ્થિતિનો ઉલ્લેખ કરીને સજા પર સ્ટે અને સજા રદ કરવાની માંગણી કરવામાં આવી હતી.
સરકારનો કડક વિરોધ
રાજ્ય સરકાર તરફથી રજૂઆત દરમિયાન દલીલ કરવામાં આવી હતી કે આરોપી સામે જમીન સંબંધિત અનેક ગુનાઓ નોંધાયેલા છે અને ભૂતકાળમાં પણ વિવિધ ફરિયાદો થઈ ચૂકી છે. ઉપરાંત આરોપી પ્રભાવશાળી વ્યક્તિ હોવાથી સજા મોકૂફ રાખવા યોગ્ય નથી.
હાઇકોર્ટનો સ્પષ્ટ અભિપ્રાય
કોર્ટ સમક્ષ બંને પક્ષોની દલીલો સાંભળ્યા બાદ હાઇકોર્ટે સજા રદ કરવાની તેમજ ચુકાદા પર સ્ટે આપવાની માંગણી સ્વીકારી નહોતી. કોર્ટના આ નિર્ણયથી રમણ પટેલને કાનૂની લડતમાં મોટો ફટકો પડ્યો છે.
અનેક કંપનીઓ અને ફરિયાદો ચર્ચામાં
તપાસ દરમિયાન રમણ પટેલ સાથે સંકળાયેલી અંદાજે 52 કંપનીઓ અંગે માહિતી સામે આવી હોવાનું કહેવાય છે. ઉપરાંત છેલ્લા ઘણા વર્ષોમાં જમીન વ્યવહારો સંબંધિત વિવિધ ફરિયાદો પણ નોંધાઈ હોવાનું સરકાર તરફથી રજૂ કરવામાં આવ્યું હતું. હાઇકોર્ટના નિર્ણય બાદ હવે આ કેસમાં આગામી કાનૂની પગલાં પર સૌની નજર રહેશે.
આ પણ વાંચો:પોપ્યુલર બિલ્ડરની મુશ્કેલીમાં વધારો, રમણ પટેલ અને બે પુત્રો સામે નોંધાઈ ફરિયાદ
આ પણ વાંચો:પોપ્યુલર બિલ્ડરના રમણ પટેલ ત્રણ વર્ષ પછી જામીન પર છૂટશે, પણ ગુજરાતમાં નહીં રહી શકે
આ પણ વાંચો:અમદાવાદ સીઆઇડી ક્રાઇમે પોપ્યુલર બિલ્ડર રમણ પટેલની કરી ધરપકડ
