New Delhi News : કોકરોચ જનતા પાર્ટીના નેતાઓ (CJP Leaders)સૌરવ દાસ અને આશુતોષ રાંકાને આઠ દિવસ બાદ કોર્ટમાંથી જામીન મળતાં જેલમાંથી મુક્તિ મળી છે. બંને નેતાઓની કસ્ટડી વધુ ત્રણ દિવસ લંબાવવાની દિલ્હી પોલીસની માગણી કોર્ટે ફગાવી દીધી હતી. કસ્ટડીની મુદત પૂર્ણ થતાં બંનેને સુનાવણી માટે કોર્ટ સમક્ષ રજૂ કરવામાં આવ્યા હતા, જ્યાંથી તેમને રાહત મળી હતી.
CJP નેતાઓને જામીન, દિલ્હી પોલીસની માગણી ફગાવાઈ
સૌરવ દાસ (Saurav Das)અને આશુતોષ રાંકા (Ashutosh Ranka)છેલ્લા આઠ દિવસથી ન્યાયિક કસ્ટડીમાં હતા. દિલ્હી પોલીસે (Delhi Police)તપાસ માટે બંનેની કસ્ટડી વધુ ત્રણ દિવસ વધારવાની માગણી કરી હતી. જોકે, કોર્ટે આ માગણી સ્વીકારી નહોતી અને બંને નેતાઓને જામીન આપ્યા હતા. આ નિર્ણયથી બંનેને જેલમાંથી બહાર આવવાનો માર્ગ મોકળો થયો છે.
સીધા હાઇકોર્ટ પહોંચવા બદલ કોર્ટના સવાલો
આ કેસની સુનાવણી દરમિયાન હાઇકોર્ટે બંને નેતાઓ દ્વારા સીધા અદાલતનો સંપર્ક કરવાના નિર્ણય અંગે સવાલો ઉઠાવ્યા હતા. જ્યારે કાયદા હેઠળ અપીલ સહિતના અન્ય વિકલ્પો ઉપલબ્ધ હોય, ત્યારે બંધારણના આર્ટિકલ 226 હેઠળ સીધા હાઇકોર્ટમાં અરજી કેમ કરવામાં આવી, તેવો સવાલ કોર્ટે કર્યો હતો.
આ ઉપરાંત, બોન્ડની શરતોના કથિત ભંગ, જામીનદારોને નકારવા અને મેજિસ્ટ્રેટની સત્તા સંબંધિત કાનૂની મુદ્દાઓ પર પણ ચર્ચા થઈ હતી. સુનાવણી દરમિયાન કોર્ટે અરજદારોના કાનૂની અભિગમ અંગે સ્પષ્ટતા માગી હતી.
‘તમે Gen Z નથી’: નેતાઓની ઉંમર પર ટિપ્પણી
સુનાવણી દરમિયાન બંને નેતાઓની ઉંમરનો મુદ્દો પણ ચર્ચામાં આવ્યો હતો. તેમના વકીલે કોર્ટને જણાવ્યું હતું કે સૌરવ દાસની ઉંમર 27 વર્ષ અને આશુતોષ રાંકાની ઉંમર 31 વર્ષ છે. આ અંગે કોર્ટે ટિપ્પણી કરી હતી કે બંનેને Gen Zની શ્રેણીમાં ગણાવી શકાય નહીં.
કોર્ટે પ્રદર્શનમાં બાળકોની હાજરીનો ઉલ્લેખ કરતાં એમ પણ નોંધ્યું હતું કે સમય જતાં સમગ્ર મામલાનો મુદ્દો બદલાઈ ગયો છે. લોકો એ જ હોવા છતાં વિરોધનો મૂળ મુદ્દો બદલાયો હોવા અંગે અદાલતે સવાલ ઉઠાવ્યો હતો.
બે FIRમાં વિવિધ કલમો હેઠળ કાર્યવાહી
સૌરવ દાસ (Saurav Das)અને આશુતોષ રાંકા (Ashutosh Ranka)સામે કનોટ પ્લેસ પોલીસ સ્ટેશનમાં નોંધાયેલી FIRમાં ભારતીય ન્યાય સંહિતા (BNS)ની કલમ 223A, 332 અને 61(2)નો ઉલ્લેખ કરવામાં આવ્યો છે. આ કલમો હેઠળ સરકારી આદેશના ભંગ, ગુનાહિત પ્રવેશ સંબંધિત જોગવાઈઓ અને ગુનાહિત ષડયંત્રના મુદ્દાઓનો સમાવેશ થાય છે.
બીજી તરફ, સંસદ માર્ગ પોલીસ સ્ટેશનમાં નોંધાયેલી FIRમાં કલમ 221, 115(2), 132, 121(1) અને 3(5) હેઠળ કાર્યવાહી કરવામાં આવી છે. આ જોગવાઈઓ જાહેર સેવકની ફરજમાં અવરોધ, ઈજા પહોંચાડવી, ફરજ બજાવતા કર્મચારી સામે હુમલો કે બળપ્રયોગ અને સામાન્ય ઇરાદા સાથે ગુનો કરવા સંબંધિત છે.
જોકે, બંને નેતાઓને જામીન મળ્યા હોવાનો અર્થ કેસમાંથી સંપૂર્ણ મુક્તિ મળવી એવો નથી. કેસની આગળની કાનૂની કાર્યવાહી અને તપાસ દરમિયાન હવે શું થાય છે તેના પર નજર રહેશે.
