National News : પોતાના નિવેદનોને કારણે વિવાદોમાં રહેતા સામ પિત્રોડા ફરી એકવાર મુશ્કેલીમાં મુકાયા છે. ભાજપના એક નેતાએ સામ પિત્રોડા પર વન વિભાગના અધિકારીઓ સહિત 5 વરિષ્ઠ સરકારી અધિકારીઓની મદદથી બેંગલુરુના યેલહંકા ખાતે 150 કરોડ રૂપિયાની 12.35 એકર સરકારી જમીન ગેરકાયદેસર રીતે હસ્તગત કરવાનો આરોપ લગાવ્યો છે. ભાજપના નેતાએ આ મામલે સામ પિત્રોડા વિરુદ્ધ એન્ફોર્સમેન્ટ ડિરેક્ટોરેટ (ED) અને કર્ણાટક લોકાયુક્તમાં ફરિયાદ નોંધાવી છે.

ફરિયાદમાં શું કહેવામાં આવ્યું હતું ?

બ્રુહત બેંગલુરુ મહાનગર પાલિકે (BBMP) ના ભૂતપૂર્વ કાઉન્સિલર એન આર રમેશે પોતાની ફરિયાદમાં આરોપ લગાવ્યો છે કે સામ પિત્રોડા ઉર્ફે સત્યનારાયણ ગંગારામ પિત્રોડાએ દાયકાઓ પહેલા 23 ઓક્ટોબર, 1993 ના રોજ મુંબઈમાં સહકારી મંડળીઓના રજિસ્ટ્રારની ઓફિસમાં ‘ફાઉન્ડેશન ફોર રિવાઇટલાઇઝેશન ઓફ લોકલ હેલ્થ ટ્રેડિશન્સ (FRLHT)’ નામની સંસ્થાની નોંધણી કરાવી હતી. આ પછી પિત્રોડાની વિનંતી પર વર્ષ 2010 માં મુંબઈમાં FRLHTનું રજીસ્ટ્રેશન રદ કરવામાં આવ્યું. “બાદમાં, 2008 માં, તેમણે (પિત્રોડાએ) ફરીથી બેંગલુરુમાં બ્યાતરાયણપુરા સબ-રજિસ્ટ્રાર ઓફિસમાં ‘ફાઉન્ડેશન ફોર રિવાઇટલાઇઝેશન ઓફ લોકલ હેલ્થ ટ્રેડિશન’ ના નામે ‘ટ્રસ્ટ ડીડ’ નોંધાવી,” ભાજપ નેતાએ જણાવ્યું. ફરિયાદ મુજબ રમેશે આરોપ લગાવ્યો કે આ દરમિયાન, સામ પિત્રોડાએ કર્ણાટક રાજ્ય વન વિભાગને ઔષધીય વનસ્પતિઓના સંરક્ષણ અને સંશોધન માટે લીઝ પર અનામત વન વિસ્તાર ફાળવવા વિનંતી કરી.

1996માં 12.35 એકર જમીન ફાળવવામાં આવી હતી

ભાજપના નેતાની ફરિયાદમાં દાવો કરવામાં આવ્યો છે કે સામ પિત્રોડાની વિનંતી પર 1996માં કર્ણાટક રાજ્ય વન વિભાગ દ્વારા બેંગલુરુમાં યેલહંકા નજીક જરકાબંદે કવલના ‘બી’ બ્લોકમાં 5 હેક્ટર (12.35 એકર) અનામત વન જમીન 5 વર્ષના લીઝ પર ફાળવવામાં આવી હતી. ભાજપના નેતા રમેશના જણાવ્યા મુજબ, FRLHT ને આપવામાં આવેલી શરૂઆતની 5 વર્ષની લીઝ 2001 માં સમાપ્ત થઈ ગઈ હોવાથી, કર્ણાટક રાજ્ય વન વિભાગે તેને બીજા 10 વર્ષ માટે લંબાવી. ભાજપના નેતાના જણાવ્યા મુજબ, સામ પિત્રોડાની મુંબઈ સ્થિત FRLHT ની લીઝ અવધિ 2 ડિસેમ્બર, 2011 ના રોજ સમાપ્ત થઈ ગઈ હતી અને તેને લંબાવવામાં આવી ન હતી.

જમીનની કિંમત 150 કરોડ રૂપિયાથી વધુ

ભાજપના નેતા રમેશે પોતાની ફરિયાદમાં કહ્યું છે કે લીઝની મુદત પૂરી થયા પછી રાજ્યના વન વિભાગને 12.35 એકર સરકારી જમીન પાછી મેળવવી પડી હતી. આ જમીનની કિંમત હવે 150 કરોડ રૂપિયાથી વધુ છે. ભાજપના નેતાએ આરોપ લગાવ્યો છે કે વન વિભાગના અધિકારીઓએ છેલ્લા 14 વર્ષથી આ જમીન પાછી મેળવવા માટે કોઈ પ્રયાસ કર્યા નથી.

જનતા દળ સેક્યુલરે પ્રશ્ન ઉઠાવ્યો

ભાજપના નેતા દ્વારા ED અને લોકાયુક્તને કરવામાં આવેલી ફરિયાદ અને આરોપો અંગે સામ પિત્રોડાએ હજુ સુધી કોઈ પ્રતિક્રિયા આપી નથી. જોકે, બીજી તરફ, જનતા દળ સેક્યુલરના નેતા નિખિલ કુમારસ્વામીએ X પર આ મુદ્દો ઉઠાવ્યો છે. તેમણે પ્રશ્ન કર્યો છે કે શું કર્ણાટકના વનમંત્રી ઈશ્વર ખંડેરે પિત્રોડા સામે કાર્યવાહી કરશે ?

આ પણ વાંચો: ચીન પરના નિવેદનથી ઘેરાયેલા સામ પિત્રોડા, કોંગ્રેસે પણ પોતાને દૂર રાખી, જયરામ રમેશે કહ્યું- આ પાર્ટીના વિચારો નથી

આ પણ વાંચો: ‘સામ પિત્રોડાએ આપ્યું વાહિયાત નિવેદન’, રોબર્ટ વાડ્રાએ કહ્યું- લોકો ઈચ્છે છે કે હું સક્રિય રાજનીતિનો ભાગ બનું

આ પણ વાંચો: સામ પિત્રોડાએ ઈન્ડિયન ઓવરસીઝ કોંગ્રેસના પ્રમુખ પદેથી સ્વેચ્છાએ આપ્યું રાજીનામું