ગુજરાતનો દરિયા કિનારો ડ્રગની હેરફેરી માટે કુખ્યાત બની રહ્યો છે. અવાર નવાર ગુજરાતના દરિયા કિનારેથી ડ્રગ મળી આવી રહ્યું છે. ત્યારે ફરી એકવાર ગુજરાત ATS અને DRI એ સંયુક્ત ઓપરેશનમાં 90 કિલો હેરોઈન જપ્ત કર્યું હતું. આંતરરાષ્ટ્રીય બજારમાં તેની કિંમત લગભગ 450 કરોડ રૂપિયા હોવાનું કહેવાય છે. રાજ્યના ડીજીપીના જણાવ્યા અનુસાર આ કન્ટેનર ઈરાનથી આવ્યું હતું. ,
દાણચોરોએ ડ્રગની હેરફેરી માટે નવી યુક્તિ અજમાવી હતી. તસ્કરો દ્વારા જાડા દોરડામાં પ્રવાહી સ્વરૂપે હેરોઈન છુપાવ્યું હતું. આ પ્રવાહી હેરોઈન બાદમાં સુકાઈ ગયું હતું. બાદમાં તેને પેક કરીને નિકાસ માટે મોકલવામાં આવ્યો હતો. ગુજરાતના ડીજીપી આશિષ ભાટિયાએ આ માહિતી આપી હતી.
આ દરમિયાન 395 કિલો દોરડાની ગાંસડીઓમાં લગભગ 90 કિલો હેરોઈન છુપાવવામાં આવ્યું હોવાનું જાણવા મળ્યું હતું. શરૂઆતમાં, પોલીસને ત્યાં દોરડા હોવાની શંકા નહોતી. સોમવારે કચ્છ નજીકથી 280 કરોડ રૂપિયાના હેરોઈન સાથે 9 લોકો સાથે પાકિસ્તાની બોટ ઝડપાઈ હતી. ‘અલ હજ’ નામની આ બોટ કરાચી થઈને ગુજરાતના દરિયાકાંઠે પહોંચી હતી. પરંતુ, આ દરમિયાન તેઓ તૈયાર ભારતીય કોસ્ટ ગાર્ડ્સ દ્વારા પકડાઈ ગયા હતા.
ગુજરાતના દરિયાઈ માર્ગ પર ડ્રગ માફિયાઓની નજર છે
અત્યાર સુધી કાશ્મીર અને પંજાબની સરહદેથી ભારતમાં ડ્રગ્સની દાણચોરી થતી હતી. પરંતુ, આ બંને સરહદો પર કડક તકેદારીના કારણે ડ્રગ્સ માફિયાઓની નજર ગુજરાતની દરિયાઈ સરહદ પર છે. જેના કારણે છેલ્લા કેટલાક સમયથી ગુજરાતના દરિયાકિનારા પરથી ડ્રગ્સનો મોટો જથ્થો જપ્ત કરવામાં આવ્યો છે.