મધ્યપ્રદેશના ઉજ્જૈન જિલ્લામાં રવિવારે આવેલા જોરદાર વાવાઝોડાએ ભારે તબાહી મચાવી દીધી હતી. જેના કારણે જિલ્લામાં બે લોકોના મોત થયા હતા અને અન્ય ત્રણને ઇજા પહોંચી હતી. તે જ સમયે, “શ્રી મહાકાલ લોક” કોરિડોરમાં સ્થાપિત સાતમાંથી છ સપ્તર્ષિઓની મૂર્તિઓને પણ નુકસાન થયું હતું. આ સિવાય કેટલાક મકાનો પણ ધરાશાયી થયા હોવાના અહેવાલ છે.
રવિવારે સાંજે આ અંગે માહિતી આપતાં એક અધિકારીએ જણાવ્યું કે ઉજ્જૈનમાં સ્થિત પ્રસિદ્ધ મહાકાલેશ્વર મંદિરમાં ‘શ્રી મહાકાલ લોક’ કોરિડોરની છ સપ્તર્ષિ મૂર્તિઓ રવિવારે બપોરે જોરદાર વાવાઝોડાને કારણે પડી જતાં નુકસાન થયું હતું. તેમણે કહ્યું કે જ્યારે મૂર્તિઓ પડી ત્યારે કોરિડોર ભક્તોથી ભરેલો હતો, પરંતુ સદનસીબે કોઈને ઈજા થઈ ન હતી. તેમણે સ્વીકાર્યું કે મૂર્તિઓ અને કોરિડોરના કામ માટે ગુજરાતની કંપનીઓ રોકાયેલી છે.
વડાપ્રધાન નરેન્દ્ર મોદીએ થોડા મહિના પહેલા 900 મીટર લાંબા ‘શ્રી મહાકાલ લોક’ કોરિડોરના પ્રથમ તબક્કાનું ઉદ્ઘાટન કર્યું હતું. 856 કરોડ રૂપિયાના કુલ ખર્ચ સાથેના આ પ્રોજેક્ટના પ્રથમ તબક્કામાં 351 કરોડ રૂપિયાના ખર્ચે ‘શ્રી મહાકાલ લોક’ બનાવવામાં આવ્યું છે.
દેશના 12 જ્યોતિર્લિંગોમાંથી એક મહાકાલેશ્વરનું મંદિર ઉજ્જૈનમાં આવેલું છે. અહીં દેશ-વિદેશમાંથી મોટી સંખ્યામાં શ્રદ્ધાળુઓ આવે છે.
કોન્ટ્રાક્ટરો નવી મૂર્તિઓ સ્થાપિત કરશે
ઉજ્જૈનના ડીએમ કુમાર પુરુષોત્તમે કહ્યું, “શ્રી મહાકાલ લોક કોરિડોરમાં 160 મૂર્તિઓ છે, જેમાંથી છ મૂર્તિઓ રવિવારે બપોરે આવેલા જોરદાર વાવાઝોડાને કારણે પડી અને તૂટી ગઈ.” આ તૂટેલી મૂર્તિઓ ત્યાં સ્થાપિત સાત સપ્ત ઋષિઓની છે અને લગભગ 10 ફૂટ ઊંચી હતી. કોન્ટ્રાક્ટરો નવી મૂર્તિઓ સ્થાપિત કરશે, કારણ કે પાંચ વર્ષ સુધી તેમની જાળવણીની જવાબદારી પણ તેમની છે. અમે ભવિષ્ય માટે પણ નિયમો વધુ કડક બનાવી રહ્યા છીએ અને તેમની જવાબદારી નક્કી કરવા જઈ રહ્યા છીએ.
ડીએમએ સ્પષ્ટતા કરી, “આ પડી ગયેલી અને તૂટેલી મૂર્તિઓ મહાકાલ મંદિરની અંદર નહોતી. તે ‘શ્રી મહાકાલ લોક’ કોરિડોરમાં હતી.
તેમણે કહ્યું કે વાવાઝોડું ત્રાટક્યા બાદ કોરિડોર સાંજે 4 વાગ્યાની આસપાસ લોકો માટે બંધ કરી દેવામાં આવ્યો હતો. સાંજે સાત વાગ્યે તેને ફરીથી સામાન્ય લોકો માટે ખોલવામાં આવ્યું હતું અને આ દરમિયાન લગભગ એક લાખ લોકો ત્યાં ઉમટી પડ્યા હતા. તેમણે કહ્યું કે રવિવારે આવેલા જોરદાર વાવાઝોડાને કારણે ઉજ્જૈન જિલ્લામાં પણ બે લોકોના મોત થયા છે. આ ઉપરાંત જિલ્લામાં વાવાઝોડાને કારણે કેટલાક મકાનો પણ ધરાશાયી થયા હોવાના અહેવાલ છે.
આ પણ વાંચો:પાયલટ-ગેહલોત વચ્ચે બધુ ઠીક થશે? હાઈકમાન્ડ અપનાવશે આ ફોર્મ્યુલા
આ પણ વાંચો: નવી સંસદના ઉદ્ઘાટનના દિવસે ભાજપ અને કોંગ્રેસ વચ્ચે ઘમાસાન,નેહરુ અને મોદીની સરખામણી પર ટ્વિટર વોર
આ પણ વાંચો:શક્તિ પ્રદર્શનની તૈયારીમાં નીતિશ કુમાર, 12 જૂને પટનામાં વિપક્ષી પાર્ટીઓની મોટી બેઠક યોજાશે
આ પણ વાંચો: કુસ્તીબાજોની ધરપકડથી નીરજ ચોપરાનું દર્દ છલકાયું, ટ્વિટ કરીને કરી આ વાત..
આ પણ વાંચો:બાંદ્રા-વર્સોવા સી-લિંક ‘વીર સાવરકર સેતુ’ તરીકે ઓળખાશે, CM શિંદેએ કરી મોટી જાહેરાત
