Ahmedabad News: અમદાવાદના નારણપુરા વિસ્તારમાં આવેલા ગુજરાત હાઉસિંગ બોર્ડના સૂર્યા એપાર્ટમેન્ટને લઈને વિવાદ આગળ વધ્યો છે. આ વિવાદનો હાલમાં કોઈ ઉકેલ આવે તેમ લાગતું નથી. સૂર્યા એપાર્ટમેન્ટના પાર્ટ-2 માટે રિડેવલપમેન્ટની પ્રોસેસ ચાલી રહી છે, પરંતુ તેમાં વાંધા ઉઠાવાયા હોવાના કારણે ગુજરાત હાઈકોર્ટના જસ્ટિસ સંગીતા વિશેને રિડેવલપમેન્ટ પ્રક્રિયા સામેનો સ્ટે લંબાવ્યો છે.
ગુજરાત હાઉસિંગ બોર્ડ આ એપાર્ટમેન્ટને રિડેવલપ કરવા માગે છે અને તેનું કહેવું છે કે 75 ટકા મેમ્બર્સનો સપોર્ટ મળ્યો છે. કુલ 132માંથી 104 મેમ્બર રિડેવલપમેન્ટની તરફેણમાં હોવાનું કહેવાય છે. હવે આ અંગે ત્રીજી સપ્ટેમ્બરે હાઈકોર્ટમાં આગળ સુનાવણી થશે.
આ એપાર્ટમેન્ટના અસંતુષ્ટ સભ્યોએ રિડેવલપમેન્ટના નિર્ણયને ગુજરાત હાઉસિંગ બોર્ડના સીઓ (કોમ્પિટન્ટ ઓફિસર) સામે પડકાર્યો હતો, પરંતુ તેમની અરજી નકારી કાઢવામાં આવી છે. ત્યાર પછી તેઓ એપેલેટ ઓથોરિટી (AA) માં ગયા હતા અને તેણે પણ સીઓની ફેવરમાં ચુકાદો આપ્યો હતો. જીએચબીના એક્ટ હેઠળ જો સભ્યોને સંતોષ ન હોય તો તેમણે સિવિલ કોર્ટમાં જવાના બદલે CO અને AA સમક્ષ અરજી કરવી જોઈએ. એપેલેટ ઓથોરિટીએ પણ અરજી નકારી કાઢી ત્યાર પછી તેઓ હાઈકોર્ટમાં ગયા હતા.
નાગરિક સેવા સંગઠનના વિનોર ચૌહાણ કહે છે કે આ ફ્લેટ 99 વર્ષની લીઝ પર અપાયા હતા અને ગુજરાત હાઉસિંગ બોર્ડ લીગલ પ્રોસેસનું પાલન નથી કરતું. તેના કારણે હાઈ કોર્ટમાં પિટિશન ફાઈલ કરવામાં આવી છે.
ગુજરાત હાઉસિંગ બોર્ડે 75 ટકા રેસિડન્ટની મંજૂરી મેળવ્યા પછી સૂર્યા-2ના રિડેવલપમેન્ટની પ્રક્રિયા શરૂ કરી હતી. જોકે, કેટલાક રેસિડન્ટે લીગલ કારણોથી તેનો વિરોધ કર્યો હતો. તેમની દલીલ છે કે સરકારની રિડેવલપમેન્ટ પોલિસીમાં રેસિડન્ટને ટ્રાન્સફર ઓફ પ્રોપર્ટી એક્ટ અને રજિસ્ટ્રેશન એક્ટ હેઠળ મળતા અધિકારો નકારી શકાય નહીં.
તેમનું કહેવું છે કે તેમના અધિકારોનો ભંગ થાય છે, કારણ કે તેમને તે જ લોકેશન પર નવા ઘર નહીં મળે. તેમની દલીલ છે કે રિડેવલપમેન્ટ માટે 100 ટકા રેસિડન્ટની મંજૂરી હોવી જરૂરી છે. સોસાયટીની માલિકી રેસિડન્ટ્સની છે કારણ કે સૂર્યા -2 એસોસિયેશન અસ્તિત્વ ધરાવતું નથી. આ ફ્લેટ જીર્ણશીર્ણ હાલતમાં છે એવી ગુજરાત હાઉસિંગ બોર્ડની દલીલને પણ તેમણે સ્વીકારી નથી. તેમનું કહેવું છે કે ફ્લેટનું સ્ટ્રક્ચર મજબૂત છે.
ગુજરાત હાઉસિંગ બોર્ડ
ગુજરાત હાઉસિંગ બોર્ડનું કહેવું છે કે તેમને મેજોરિટી મેમ્બર્સની સહમતી મળી ગઈ છે અને એપાર્ટમેન્ટનું સ્ટ્રક્ચર પણ નબળું પડી ગયું છે જે ભૂકંપનો સામનો કરી શકે તેમ નથી. હાઉસિંગ બોર્ડની દલીલ પ્રમાણે સોસાયટી, બિલ્ડર અને બોર્ડ વચ્ચે ત્રિપક્ષીય કરાર થયેલા છે અને માઈનોરિટીના વાંધાના કારણે મોટા ભાગના લોકોના હિત જોખમાવા ન જોઈએ.
આ પણ વાંચો: મહેસાણામાં EVની બેટરીમાં થયો મોટો બ્લાસ્ટ થતા પરિવારનો અભૂતપુર્વ બચાવ
આ પણ વાંચો: પેટ્રોલ પંપ પર કામ કરતી મહિલાના ઘરે આવ્યું 20 લાખનું વીજળીનું બિલ અને પછી….
આ પણ વાંચો: “ફરજી” વેબસિરીઝ જોઈને સુરતના રત્નકાલાકારે કર્યો કાંડ
