DGP KLN Rao Kutch Visit: ગુજરાતના રાજ્ય પોલીસ વડા (DGP) ડૉ. કે.એલ.એન. રાવનો કચ્છ જિલ્લાનો બે દિવસીય મહત્વપૂર્ણ પ્રવાસ પૂર્ણ થયો છે. 21 અને 22 ફેબ્રુઆરી દરમિયાન હાથ ધરાયેલી આ મુલાકાતનો મુખ્ય ઉદ્દેશ્ય સરહદી સુરક્ષાને સઘન બનાવવાનો અને વિવિધ એજન્સીઓ વચ્ચે સંકલન સાધવાનો હતો. આ પ્રવાસ દરમિયાન DGPએ સુરક્ષા વ્યવસ્થાની સમીક્ષા કરવાની સાથે જવાનોનું મનોબળ પણ વધાર્યું હતું.
નલિયા પોલીસ સ્ટેશનને DGP KLN Raoએ લીધું દત્તક
આ મુલાકાતની સૌથી મોટી જાહેરાત નલિયા પોલીસ સ્ટેશન ખાતે કરવામાં આવી હતી. ડૉ. કે.એલ.એન. રાવે નલિયા પોલીસ સ્ટેશનને દત્તક લેવાની જાહેરાત કરી છે. પોલીસ સ્ટેશનના આધુનિકીકરણ અને જવાનો માટે વધુ સુવિધાઓ ઊભી કરવા માટે તેમણે રૂપિયા 5 લાખની ગ્રાન્ટ પણ જાહેર કરી છે. આ ઉપરાંત, તેમણે પોલીસ જવાનો અને સ્થાનિક નાગરિકો સાથે ‘બડા ખાના’ યોજીને સીધો સંવાદ કર્યો હતો.
જખૌમાં ધ્વજવંદન અને સંયુક્ત પેટ્રોલિંગ
દરિયાઈ સુરક્ષાની સજ્જતા ચકાસવા માટે DGP જખૌ દરિયાકાંઠે પહોંચ્યા હતા. ત્યાં તેમણે ધ્વજવંદન કરી સુરક્ષા જવાનોનું અભિવાદન કર્યું હતું. મહત્વની વાત એ છે કે, તેમણે ભારતીય કોસ્ટ ગાર્ડ, BSF અને ગુજરાત પોલીસના જવાનો સાથે દરિયામાં સંયુક્ત પેટ્રોલિંગ કર્યું હતું. છેવાડાની પિંગલેશ્વર આઉટપોસ્ટની મુલાકાત લઈને તેમણે દરિયાઈ પટ્ટી પર સતર્કતા રાખવા કડક સૂચનાઓ આપી હતી.
હાઈ-લેવલ ક્રાઈમ કોન્ફરન્સ અને એજન્સીઓનું સંકલન
ભુજ ખાતે યોજાયેલી હાઈ-લેવલ બેઠકમાં DGPએ BSF, વાયુસેના, કોસ્ટ ગાર્ડ, IB અને NTRO જેવી મહત્વની એજન્સીઓના ઉચ્ચ અધિકારીઓ સાથે સુરક્ષા બાબતે સઘન ચર્ચા કરી હતી. આ બેઠકમાં મુખ્યત્વે તમામ એજન્સીઓ વચ્ચે ઈન્ટેલિજન્સ શેરિંગ એટલે કે માહિતીની ઝડપી આપ-લે કરવા પર વિશેષ ભાર મૂકવામાં આવ્યો હતો. ખાસ કરીને સમુદ્રી માર્ગે થતી નશાની હેરાફેરી અટકાવવા માટે ડ્રગ્સ વિરોધી અભિયાન તેજ કરવા અને પાકિસ્તાન સરહદે ઘૂસણખોરી રોકવા સતર્કતા વધારવા અંગે નિર્ણય લેવાયો હતો. વધુમાં, NCORD બેઠક અંતર્ગત ડ્રગ્સ કંટ્રોલ માટે નેશનલ કોર્ડિનેશન સેન્ટરની કામગીરીની પણ વિસ્તૃત સમીક્ષા કરવામાં આવી હતી.
આધુનિક ટેકનોલોજી અને ડ્રોન સિસ્ટમ પર ભાર
કચ્છની સંવેદનશીલ ભૌગોલિક સ્થિતિને જોતા DGPએ જમીની અને દરિયાઈ સરહદ પર દેખરેખ રાખવા માટે આધુનિક ટેકનોલોજી અને ડ્રોન જેવી સિસ્ટમનો ઉપયોગ વધારવા માર્ગદર્શન આપ્યું હતું. આ મુલાકાતથી કચ્છની સુરક્ષા વ્યવસ્થામાં નવી ઉર્જાનો સંચાર થયો છે.
આ પણ વાંચો:કચ્છ સરહદ પરથી એક સાથે દસ પાકિસ્તાની બોટ અને ખલાસીઓ પકડાયા
આ પણ વાંચો:કચ્છ સરહદે ઘૂસણખોરી કરતા પાકિસ્તાની નાગરિક ઝડપાયો
આ પણ વાંચો:કચ્છ સરહદ પાસેથી પાકિસ્તાની ઘૂસણખોર ઝડપાયો, પોલિસને હવાલે કરાયો
