Rajkot Dhoraji Bhadar River Pollution: સૌરાષ્ટ્રની જીવાદોરી સમાન ભાદર નદી હવે ‘ઝેર’ સમાન બની રહી છે. રાજકોટ જિલ્લાના ધોરાજી પંથકમાં કેમિકલ માફિયાઓને કાયદાનો કોઈ ડર રહ્યો નથી. શુક્રવારની મોડી રાત્રે અંધારાનો લાભ ઉઠાવીને ટેન્કરો દ્વારા ભાદર નદીમાં હજારો લીટર કેમિકલયુક્ત ઝેરી પાણી ઠાલવવામાં આવતા પર્યાવરણપ્રેમીઓમાં રોષ ફાટી નીકળ્યો છે.
વેગડી પુલ નીચે Bhadar River બની ‘લીલીછમ્મ’
ઘટનાની વિગત એવી છે કે, ધોરાજીના વેગડી પુલ પરથી પસાર થતા કેટલાક જાગૃત નાગરિકોને નદીમાંથી અસહ્ય દુર્ગંધ આવતા તેઓ ચોંકી ઉઠ્યા હતા. નીચે જોયું તો નદીનું પાણી કુદરતી હોવાને બદલે કેમિકલને કારણે લીલુંછમ્મ બની ગયું હતું. માફિયાઓ જાણે તંત્રને ‘રોકી શકો તો રોકી લો’ તેવી ખુલ્લી ચેલેન્જ આપી રહ્યા હોય તેમ લાગી રહ્યું છે.
“અધિકારીઓની મિલીભગત વગર આ શક્ય નથી”
આ ગંભીર ઘટનાની જાણ થતાં જ ધોરાજી કોંગ્રેસના અગ્રણી નેતા દિનેશ વોરા તાત્કાલિક અસરથી ઘટનાસ્થળે દોડી આવ્યા હતા. તેમણે તંત્ર અને સરકારની કામગીરી સામે આકરા પ્રહારો કરતા રોષભેર જણાવ્યું હતું કે, પ્રદૂષણ નિયંત્રણ બોર્ડ (GPCB) જાણે કુંભકર્ણની નિદ્રામાં પોઢી રહ્યું છે. તેમણે સીધો આક્ષેપ કરતા કહ્યું હતું કે, આટલા મોટા પાયે ખુલ્લેઆમ ઝેરી કેમિકલ ઠલવાય છે, તે અધિકારીઓ અને નેતાઓની મિલીભગત કે સાઠગાંઠ વગર ક્યારેય શક્ય જ નથી. સરકાર ભલે નદી શુદ્ધિકરણની મોટી વાતો કરતી હોય, પરંતુ અહીંની જમીની હકીકત અને વાસ્તવિકતા કંઈક અલગ જ ચિત્ર રજૂ કરી રહી છે.
લોકોના સ્વાસ્થ્ય સાથે ગંભીર ચેડાં
ભાદર નદી અને ભાદર-2 ડેમનું પાણી લાખો લોકો પીવા માટે અને ખેડૂતો સિંચાઈ માટે ઉપયોગમાં લે છે. આ ઝેરી રસાયણો પાણીમાં ભળવાથી કેન્સર અને ચામડીના રોગો થવાની શક્યતા વધી જાય છે. તેમ છતાં તંત્ર દ્વારા કોઈ નક્કર પગલાં લેવામાં આવતા નથી. દિનેશ વોરાએ ચીમકી ઉચ્ચારી છે કે જો આ દૂષણ તાત્કાલિક બંધ નહીં થાય તો આગામી દિવસોમાં ઉગ્ર આંદોલન કરવામાં આવશે.
આ પણ વાંચો: NGTએ જારી કર્યો આદેશ, કહ્યું ભાદર નદીના પ્રદૂષણને તાત્કાલિક રોકો
આ પણ વાંચો: જેતપુરમાં ભાદર નદી કાંઠાના 4 ગામોના ખેડૂતોએ પ્રદૂષિત પાણી છોડવા મુદ્દે નોંધાવ્યો વિરોધ
આ પણ વાંચો: જેતપુરમાં પ્રદૂષણ માફિયા બન્યા બેફામ! ભાદર નદીમાં ઠાલવ્યું ઝેરી કેમિકલ, GPCB મૌન
