Vadodara News: વડોદરા શહેરમાં નશાની હાલતમાં વાહન હંકારતા એક નબીરાએ કાયદાનો ભંગ કરી ભારે હંગામો સર્જ્યો હતો. ઘટનામાં નબીરાએ પોતાની મોંઘીદાટ કાર લઈને યુવતીને ટક્કર મારી દીધી હતી. અકસ્માત બાદ ઘટના સ્થળે હાજર ટ્રાફિક હેડ કોન્સ્ટેબલ સાથે પણ તેણે ઝપાઝપી કરી હતી. આ બનાવ વડોદરાના ભવન્સ સ્કૂલ સર્કલ નજીક બન્યો હતો.
મળતી માહિતી મુજબ, આ નબીરો નશાની મસ્તીમાં કાર ચલાવી રહ્યો હતો. કાર ચાલકે રોંગ સાઈડમાંથી વળાંક લીધો હતો જેના કારણે પ્રથમ એક બાઈકને ટક્કર મારી હતી અને ત્યારબાદ આગળ જતા યુવતીને પણ કારથી અથડાવી દીધી હતી. બનાવ બાદ ટ્રાફિક પોલીસ કર્મચારીએ તેને રોકવાનો પ્રયાસ કર્યો તો નશામાં ચૂર નબીરાએ પોલીસ સાથે જ જાહેર રસ્તા પર ઝપાઝપી શરૂ કરી દીધી.
સ્થળ પર હાજર લોકોએ આખો બનાવ પોતાના મોબાઈલમાં કેદ કર્યો હતો અને થોડા જ કલાકોમાં તેનો વિડિયો સોશિયલ મીડિયા પર વાયરલ થઈ ગયો હતો. વિડિયો વાયરલ થતાં જ સમગ્ર શહેરમાં આ બનાવ ચર્ચાનો વિષય બની ગયો છે. નશેડી નબીરાની હરકતોને લઈને લોકોમાં ભારે આક્રોશ જોવા મળ્યો છે.
પોલીસે તરત જ કાર્યવાહી હાથ ધરી અને કાર સાથે યુવકને ઝડપી લીધો. હાલ તેની સામે ગુનો નોંધાયો છે અને વધુ તપાસ હાથ ધરાઈ છે. પોલીસે નબીરાની કાર કબજે કરી છે અને તેની નશાની તપાસ માટે બ્લડ સેમ્પલ લેવામાં આવ્યા છે.
પ્રાથમિક માહિતી મુજબ, આરોપી પ્રતાપનગર તરફ જઈ રહ્યો હતો અને રસ્તામાં જ ટ્રાફિક નિયમોનું ઉલ્લંઘન કરતો હતો. ટ્રાફિક પોલીસ જવાનોએ રોકવાનો પ્રયાસ કર્યો ત્યારે પણ તેણે નિયમોનો ભંગ કર્યો હતો. આ દરમિયાન થયેલી ઝપાઝપીમાં પોલીસ જવાનને પણ ઈજા પહોંચી હોવાનું જાણવા મળ્યું છે.
આ બનાવને લઈને લોકોમાં ભારે રોષ છે. નશામાં ધૂત થઈને જાહેર રસ્તાઓ પર મોંઘી કાર હંકારતા નબીરાઓએ સામાન્ય જનતાનું જીવન જોખમમાં મૂકી દીધું છે. ખાસ કરીને ટ્રાફિક પોલીસ સાથે જાહેર રસ્તા પર થયેલી ઝપાઝપી કાયદા પ્રત્યેનો નિર્લજ્જ વલણ દર્શાવે છે.
કાયદા નિષ્ણાતોનું કહેવું છે કે આવા બનાવોમાં કડક કાર્યવાહી જરૂરી છે જેથી અન્ય નશેડીઓને કડક સંદેશો મળે. વડોદરા પોલીસ પણ આ કેસને ગંભીરતાથી લઈ રહી છે અને આરોપી સામે કાયદેસરની કાર્યવાહી હાથ ધરાઈ રહી છે.
શહેરમાં નશાની હાલતમાં વાહન ચલાવવાના બનાવો સતત વધી રહ્યા છે. આવા બનાવોને રોકવા માટે ટ્રાફિક વિભાગ દ્વારા અભિયાન ચલાવવામાં આવી રહ્યું છે. છતાંય આવા નબીરાઓ કાયદાનો ભંગ કરતા અટકતા નથી. આ બનાવે ફરી એકવાર લોકોને ચિંતા અને ગુસ્સામાં મૂકી દીધા છે.
આ પણ વાંચો:મંજૂરી માટે શહેરમાં 66 ગરબા આયોજકોએ અરજી કરી, એકપણ આયોજકને પોલીસે મંજૂરી આપી નથી
આ પણ વાંચો:કેમ યુવાનોમાં વધ્યું ‘OG મંડલી’નું આકર્ષણ?, પારંપારિક ગરબામાં..
આ પણ વાંચો:વડોદરામાં સગીરા પર દુષ્કર્મ, વિધર્મીએ 12 સાયન્સની વિદ્યાર્થીનીને ગરબા રમવા કર્યું દબાણ
