યુક્રેન પર રશિયન રાષ્ટ્રપતિ વ્લાદિમીર પુતિનની હત્યાના પ્રયાસનો આરોપ લાગ્યા બાદ બંને દેશો વચ્ચે સંઘર્ષ વધી ગયો છે. આક્રમકતા વધતાં, રશિયન સૈન્યએ યુક્રેન પર હુમલા વધારી દીધા છે, ત્યારબાદ યુક્રેનની રાજધાની કિવથી ઓડેસા સુધી વિસ્ફોટો થયા છે. યુક્રેન પર રશિયાના આક્રમણના ચૌદ મહિનાથી વધુ સમય પછી પણ કટોકટી ઓછી થઈ રહી નથી. રશિયાના રાષ્ટ્રપતિ મહેલ પર ડ્રોન હુમલા બાદ રશિયાએ યુક્રેન પર રાષ્ટ્રપતિ વ્લાદિમીર પુતિનની હત્યાનો પ્રયાસ કરવાનો આરોપ લગાવ્યો હતો. આ પછી રશિયન સેનાની આક્રમકતા અચાનક વધી ગઈ છે.
યુક્રેનના પૂર્વ વિસ્તારમાં રશિયન સેનાની કાર્યવાહી તેજ થઈ ગઈ છે. ગુરુવારે સવારે પણ અહીંના લોકોએ વિસ્ફોટનો અવાજ સાંભળ્યો હતો. યુક્રેનના પ્રાદેશિક લશ્કરી વહીવટીતંત્રે જણાવ્યું હતું કે કિવમાં તમામ હવાઈ સંરક્ષણ પ્રણાલીઓ કામ કરી રહી છે અને સૈન્ય લોકોને બચાવવા માટે શ્રેષ્ઠ પ્રયાસો કરી રહી છે.
રશિયન સેનાએ ખેરસનમાં જોરદાર હુમલા કર્યા, જેમાં 21 લોકોના મોત થયા. યુક્રેનના રાષ્ટ્રપતિ વોલોદિમિર ઝેલેન્સકીએ પોતે માહિતી આપી કે આ હુમલાઓમાં 48 લોકો ઘાયલ પણ થયા છે. યુક્રેનના અધિકારીઓએ જણાવ્યું હતું કે શહેરમાં જ રશિયન હવાઈ હુમલામાં 12 લોકો માર્યા ગયા હતા, જ્યારે નજીકના ગામોમાં મૃતકોની શોધ ચાલુ હતી. અત્યાર સુધીમાં નવના મોતની પુષ્ટિ થઈ છે. આ હુમલાઓ વચ્ચે ખેરસનમાં કર્ફ્યુ ચાલુ છે. દરમિયાન, યુક્રેન દ્વારા કરવામાં આવેલા ડ્રોન હુમલાને કારણે દક્ષિણ રશિયામાં ઓઇલ રિફાઇનરીમાં આગ લાગી હતી. યુક્રેનિયન બાજુથી હુમલો ઇલ્સ્કી રિફાઇનરી નજીક થયો હતો, જે બ્લેક સી બંદરની નજીક નોવોરોસિસ્કમાં સ્થિત છે. એવો દાવો કરવામાં આવ્યો હતો કે તેલના મોટા સ્ટોરેજમાં આગ લાગી હતી.અગાઉ રશિયાના ક્રાસ્નોદર પ્રદેશમાં એક ફ્યુઅલ ડેપોમાં યુક્રેનના કથિત હુમલા દરમિયાન આગ લાગી હતી. આ વિસ્તાર રશિયા અને ક્રિમીઆને જોડતા પુલની ખૂબ નજીક છે.
