Gandhinagar News: ગાંધીનગર મહાનગરપાલિકાની ચૂંટણીનાં પરિણામો જાહેર થતાં ભાજપે ફરી સત્તા જાળવી રાખી (Gandhinagar Election Result 2026) છે. કુલ 44 બેઠકોમાંથી ભાજપે 38 બેઠકો પર જીત (BJP Wins 38 Seats) મેળવી છે, જ્યારે કોંગ્રેસને 5 બેઠકો મળી (Congress Wins 5 Seats) છે. એક બેઠક અપક્ષ ઉમેદવારના ફાળે ગઈ છે. બીજી તરફ, અગાઉની ચૂંટણીમાં એક બેઠક જીતનાર આમ આદમી પાર્ટી આ વખતે એકપણ બેઠક જીતી શકી નથી.

Gandhinagar Election Result 2026: કોંગ્રેસની બેઠકોમાં વધારો, આપને મોટો ફટકો

2021ની ચૂંટણીમાં (Gandhinagar Municipal Corporation Election) ભાજપે 41 બેઠકો જીતી હતી, જ્યારે કોંગ્રેસને 2 અને આમ આદમી પાર્ટીને 1 બેઠક મળી હતી. આ વખતે ભાજપની બેઠકો ઘટીને 38 થઈ છે, જ્યારે કોંગ્રેસે પોતાની બેઠકોની સંખ્યા વધારીને 5 કરી છે. આમ, કોંગ્રેસને અગાઉની ચૂંટણીની સરખામણીમાં 3 બેઠકોનો ફાયદો થયો છે. આપને આ વખતે એકપણ બેઠક મળી નથી.

વોર્ડ નંબર 6માં કોંગ્રેસની આખી પેનલનો વિજય

ચૂંટણીનાં પરિણામોમાં વોર્ડ નંબર 6 સૌથી વધુ ચર્ચામાં રહ્યો છે. અહીં કોંગ્રેસે ચારેય બેઠકો જીતીને આખી પેનલ પર કબજો કર્યો છે. બીજી તરફ, વોર્ડ નંબર 2માં ભાજપને 3 બેઠકો મળી છે, જ્યારે એક બેઠક અપક્ષ ઉમેદવાર દીપિકાબા વાઘેલાએ જીતી છે. વોર્ડ નંબર 7માં ભાજપે 3 બેઠકો અને કોંગ્રેસે એક બેઠક મેળવી છે.

આઠ વોર્ડમાં ભાજપની ક્લીન સ્વીપ

ગાંધીનગર મનપાના વોર્ડ નંબર 1, 3, 4, 5, 8, 9, 10 અને 11માં ભાજપે ચારેય બેઠકો જીતી છે. આમ, આઠ વોર્ડમાં ભાજપની આખી પેનલનો વિજય થયો છે. બીજી તરફ, વોર્ડ નંબર 6માં કોંગ્રેસની ચારેય બેઠકો પર જીત અને વોર્ડ નંબર 2માં અપક્ષની જીત નોંધપાત્ર રહી છે.

ગાંધીનગરમાં 59.25 ટકા મતદાન નોંધાયું

ગાંધીનગર મનપાની 44 બેઠકો માટે 11 વોર્ડમાં ચૂંટણી યોજાઈ હતી. કુલ 2,59,985 મતદારોમાંથી 1,54,045 મતદારોએ પોતાના મતાધિકારનો ઉપયોગ કર્યો હતો. આ સાથે કુલ મતદાન 59.25 ટકા નોંધાયું હતું.

કમલમ ખાતે જીતની ઉજવણી

ગાંધીનગર મનપામાં ભાજપને મળેલી જીત બાદ પક્ષના કાર્યકરોમાં ઉત્સાહ જોવા મળ્યો હતો. ભાજપના પ્રદેશ કાર્યાલય કમલમ ખાતે ઉજવણીનું આયોજન કરવામાં આવ્યું હતું. આ પ્રસંગે મુખ્યમંત્રી ભૂપેન્દ્ર પટેલ, નાયબ મુખ્યમંત્રી હર્ષ સંઘવી અને પ્રદેશ ભાજપ પ્રમુખ જગદીશ વિશ્વકર્મા પણ પહોંચ્યા હતા.

ગાંધીનગર મનપાની અગાઉની ચૂંટણીઓ પર એક નજર

2011ની પ્રથમ ચૂંટણીમાં કોંગ્રેસે 33માંથી 18 બેઠકો જીતી હતી, જ્યારે ભાજપને 15 બેઠકો મળી હતી. 2016માં ભાજપ અને કોંગ્રેસે 16-16 બેઠકો મેળવી હતી. ત્યારબાદ 2021ની ચૂંટણીમાં ભાજપે 44માંથી 41 બેઠકો જીતીને સ્પષ્ટ બહુમતી મેળવી હતી. હવે 2026ની ચૂંટણીમાં 38 બેઠકો સાથે ભાજપે ફરી મહાનગરપાલિકામાં સત્તા જાળવી રાખી છે.

આ પણ વાંચો: ગાંધીનગર ચૂંટણી: 59.25% મતદાન, 1 લાખ મતદારો ગેરહાજર

આ પણ વાંચો: ગાંધીનગરમાં ચૂંટણી પહેલાં જ ‘ખેલ’! કોંગ્રેસ-ભાજપ સામસામે

આ પણ વાંચો: ગાંધીનગર મનપા ચૂંટણીમાં કોંગ્રેસની સાવચેતી: ઉમેદવારોને સુરક્ષિત સ્થળે ખસેડાયા, નેતાઓએ ભાજપ પર લગાવ્યા આક્ષેપ