West Bengal Gas Leak: પશ્ચિમ બંગાળના ઉત્તર 24 પરગણા જિલ્લામાં અમોનિયા ગેસ લીક થવાની ઘટનાથી અફરાતફરી મચી ગઈ હતી. હાડોઆ પોલીસ સ્ટેશન હદના શાપુકુર વિસ્તારમાં આવેલી એક બરફની ફેક્ટરીમાંથી રવિવારની રાત્રે ગેસ લીક થતાં બાળકો અને મહિલાઓ સહિત ઓછામાં ઓછા 25 લોકો બીમાર પડ્યા હતા.
મળતી માહિતી મુજબ, રાત્રે આશરે 9:30 વાગ્યાની આસપાસ ફેક્ટરીમાંથી અચાનક અમોનિયા ગેસ બહાર આવવા લાગ્યો હતો. થોડી જ વારમાં ગેસ આસપાસના રહેણાંક વિસ્તારમાં ફેલાઈ જતાં સ્થાનિક લોકોને શ્વાસ લેવામાં તકલીફ સહિતની સમસ્યાઓ થવા લાગી હતી.
ગેસની અસર થતાં અનેક ગ્રામજનોની તબિયત બગડી હતી. અસરગ્રસ્ત લોકોને તાત્કાલિક હાડોઆ ગ્રામીણ હોસ્પિટલમાં લઈ જવામાં આવ્યા હતા, જ્યાં તેમની સારવાર ચાલી રહી છે.
ઘટનાની જાણ થતાં પોલીસ અને ફાયર બ્રિગેડની ટીમ પણ તાત્કાલિક સ્થળ પર પહોંચી હતી. ફાયર વિભાગની ટીમે પરિસ્થિતિને નિયંત્રણમાં લેવાના પ્રયાસો કર્યા હતા. સાથે જ ગેસ લીક થવાનું ચોક્કસ કારણ જાણવા તપાસ શરૂ કરવામાં આવી છે.
ફેક્ટરી સામે ગ્રામજનોમાં રોષ
ઘટના બાદ સ્થાનિકોમાં ફેક્ટરી સંચાલકો સામે ભારે રોષ જોવા મળ્યો હતો. ગ્રામજનોએ ફેક્ટરી બંધ કરવાની માંગ સાથે બેડાચાંપા-હાડોઆ માર્ગ પર વિરોધ પ્રદર્શન કર્યું હતું. કેટલાક લોકોએ રસ્તા પર ટાયર સળગાવી માર્ગ અવરોધ્યો હતો.
સ્થાનિકોના આક્ષેપ મુજબ, આ ફેક્ટરીમાંથી અગાઉ પણ ગેસ લીક થવાની ઘટનાઓ બની ચૂકી છે. આવી ઘટનાઓને કારણે આસપાસના વિસ્તારમાં રહેતા લોકોના જીવને જોખમ ઊભું થઈ રહ્યું હોવાનો ગ્રામજનોએ દાવો કર્યો છે.
સ્થાનિકોએ પ્રશાસન પાસે ફેક્ટરી સામે કડક કાર્યવાહી કરવાની અને તેને બંધ કરાવવાની માંગ કરી છે, જેથી ભવિષ્યમાં આવી ઘટના ફરી ન બને.
આ પણ વાંચો: તમિલનાડુની સીફૂડ ફેક્ટરીમાં ઝેરી એમોનિયા ગેસ લીક થતાં 7 મહિલાઓના મોત, 65 હોસ્પિટલમાં દાખલ
આ પણ વાંચો: મહારાષ્ટ્રના પાલઘરમાં ઓલિયમ ગેસ લીકેજથી ભયનો માહોલ, 2,000 લોકોને સુરક્ષિત સ્થળે ખસેડવામાં આવ્યા
આ પણ વાંચો: ખંભાતમાં કથિત ગેસ લીકેજથી હાહાકાર: 200 બબ્લર પક્ષીઓનાં મોત, 500 વીઘા પાકને નુકસાનનો આક્ષેપ
