Godhra Accident News : નિયમોનું ઉલ્લંઘન કરીને બેફામ ડ્રાઇવિંગ કરનારાઓ માર્ગો પર કેવી રીતે નિર્દોષોના કાળ બનીને ફરી રહ્યા છે, તેનો વધુ એક રુંવાડા ઊભા કરી દે તેવો કિસ્સો ગોધરા-દાહોદ હાઈવે પરથી સામે આવ્યો છે. વાવડી ટોલનાકા નજીક એક પૂરપાટ આવતી સ્કોર્પિયો કારે રોંગ સાઈડમાં ઘૂસીને એક બાઈકને એવી ભયાનક ટક્કર મારી કે બાઈક પર સવાર ત્રણેય યુવાનોએ ઘટનાસ્થળે જ પોતાના પ્રાણ ત્યાગી દીધા.

Godhra : યમદૂત બનીને આવી સ્કોર્પિયો કાર

આજે વહેલી સવારે જ્યારે આ ત્રણ યુવાનો પોતાના બાઈક પર પસાર થઈ રહ્યા હતા, ત્યારે તેમને કલ્પના પણ નહીં હોય કે સામેથી તેમનો કાળ આવી રહ્યો છે. સ્કોર્પિયો કારના ચાલકે ટ્રાફિકના નિયમોના લીરેલીરા ઉડાડીને વાહન રોંગ સાઈડમાં હંકાર્યું હતું. કારની સ્પીડ એટલી બેફામ હતી કે તેણે સામેથી આવતા બાઈકને ધડાકાભેર અડફેટે લીધું હતું. અકસ્માત એટલો પ્રચંડ હતો કે બાઈકના ફુરચા ઉડી ગયા હતા અને ત્રણેય યુવાનો હવામાં ફંગોળાઈને લોહીલુહાણ હાલતમાં રસ્તા પર પટકાયા હતા. ગંભીર ઈજાઓને પગલે ત્રણેયે સ્થળ પર જ દમ તોડી દીધો હતો.

દરુનિયા ગામમાં શોકનું મોજું 

આ ગોઝારી ઘટનામાં જીવ ગુમાવનાર ત્રણ યુવાનોમાંથી બે યુવાનો પંચમહાલના દરુનિયા ગામના વતની હોવાનું ખૂલ્યું છે. સવાર-સવારમાં જ ગામના બે આશાસ્પદ યુવાનોના મોતના અહેવાલ પહોંચતા જ આખું દરુનિયા ગામ હિબકે ચઢ્યું હતું. પરિવારો પર તો જાણે આભ તૂટી પડ્યું છે. યુવાનોના મૃતદેહો હોસ્પિટલ પહોંચતા જ પરિવારજનોના હૈયાફાટ રુદન અને આક્રંદથી સમગ્ર હોસ્પિટલ માં ગમગીની છવાઈ ગઈ હતી.

પોલીસે હાલ તો સ્કોર્પિયો કારના ચાલક વિરુદ્ધ ગુનો દાખલ કરીને આગળની તપાસનો ધમધમાટ શરૂ કર્યો છે, પરંતુ આ ઘટનાએ માર્ગ સલામતી અને રોંગ સાઈડ ડ્રાઇવિંગના જોખમ પર ફરી એકવાર ગંભીર સવાલો ઊભા કર્યા છે.

આ પણ વાંચો: ગોધરામાં દુ:ખદ અગ્નિકાંડ: પુત્રની સગાઈ પહેલાં દોશી પરિવારના 4 સભ્યોનાં મોત

આ પણ વાંચો: ગોધરામાં 1 કરોડના દારૂ સાથે 1.44 કરોડનો મુદ્દામાલ કબજે

આ પણ વાંચો: ગોધરામાં ટ્રક પાછળ બુલેટ ઘુસતા બે યુવકના મોત, અન્ય એક ઘાયલ યુવકને વડોદરા ખસેડાયો