Talent Search Test Hall Ticket 2026: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા ધોરણ-9 ના વિદ્યાર્થીઓની શૈક્ષણિક પ્રતિભાને પ્રોત્સાહન આપવા માટે યોજાતી ‘પ્રખરતા શોધ કસોટી’ (Talent Search Test – 2026) ની તૈયારીઓ તેજ બની છે. બોર્ડ દ્વારા આ પરીક્ષા માટેની હોલટિકિટ (Hall Ticket) આજે એટલે કે 19 જાન્યુઆરી, 2026 થી ઓનલાઇન ઉપલબ્ધ કરાવી દેવામાં આવી છે.
28 જાન્યુઆરીએ યોજાશે પરીક્ષા
રાજ્યની તમામ માન્યતા પ્રાપ્ત માધ્યમિક શાળાઓમાં અભ્યાસ કરતા અને આ કસોટી માટે ફોર્મ ભરનારા વિદ્યાર્થીઓની પરીક્ષા આગામી 28 જાન્યુઆરી, 2026 ના રોજ લેવામાં આવશે. આ પરીક્ષા દ્વારા તેજસ્વી વિદ્યાર્થીઓની ઓળખ કરી તેમને પ્રોત્સાહિત કરવામાં આવે છે.
Hall Ticket ડાઉનલોડ પ્રક્રિયા શરૂ
જે વિદ્યાર્થીઓએ આ કસોટી માટે ફોર્મ ભર્યા છે, તેમની હોલટિકિટ આજ રોજ એટલે કે 19 જાન્યુઆરી 2026 થી બોર્ડની સત્તાવાર વેબસાઇટ gseb.org અથવા tst.gsebht.in પર ઉપલબ્ધ કરી દેવામાં આવી છે, જ્યાંથી શાળાઓ તેને ડાઉનલોડ કરી શકશે.
શાળાઓ માટે મહત્વની સૂચના
બોર્ડની અખબારી યાદી મુજબ, તમામ માન્યતા પ્રાપ્ત માધ્યમિક શાળાઓએ વિદ્યાર્થીઓની હોલટિકિટની પ્રિન્ટ કાઢી તેની વિગતોની ચોકસાઈપૂર્વક ખરાઈ કરવાની રહેશે. ત્યારબાદ હોલટિકિટમાં પરીક્ષાર્થીની સહી, વર્ગશિક્ષકની સહી અને આચાર્યના સહી-સિક્કા ફરજિયાતપણે કરીને જ વિદ્યાર્થીઓને સુપરત કરવાની રહેશે. બોર્ડ દ્વારા તમામ સંબંધિતોને સમય મર્યાદામાં આ જરૂરી કાર્યવાહી પૂર્ણ કરવા વિનંતી કરવામાં આવી છે.
