સીએમ વિજય રૂપાણીના કેબિનેટમાં મંત્રીમંડળના ગઠન બાદ મંત્રીઓની નારાજગીઓનો દોર યથાવત જોવા મળી રહ્યો છે. ઉપ-મુખ્યમંત્રી નીતિન પટેલને નાણા મંત્રાલય આપવામાં ન આવતા તેઓએ નારાજગી દર્શાવી હતી ત્યારબાદ હવે વધુ એક મંત્રીએ નારાજગી દર્શાવી છે. સરકારમાં રાજયકક્ષાના મંત્રી પરસોત્તમ સોલંકીએ તેમના મંત્રાલયની ફાળવણીને લઇ નિરાશા દર્શાવતા બાયો ચઢાવી છે.
રાજ્ય સરકારમાં પરસોત્તમ સોલંકીને મત્સ્ય ઉદ્યોગ આપવામાં આવ્યું છે, ત્યારે તેઓએ ખાતાની ફાળવણી અંગે નારાજગી દર્શાવતા જણાવ્યું કે, “હું પાંચ ટર્મથી ધારાસભ્ય છું તો પણ માત્ર એક જ ખાતું ફાળવવામાં આવ્યું છે. આ મારા કોળી સમાજના લોકોનું અપમાન છે. હવે હું આ અંગે સીએમ વિજય રૂપાણીને મળીને રજૂઆત કરીશ અને ત્યારબાદ કોળી સમાજ જે નિર્ણય કરશે તે અંતિમ રહેશે”.
મહત્વનું છે કે, આ પહેલા રૂપાણીના કેબિનેટમાં ઉપ-મુખ્યમંત્રી નીતિન પટેલને માર્ગ અને મકાન, આરોગ્ય, પરિવાર કલ્યાણ જેવા ખાતાની ફાળવણી કરવામાં આવી હતી અને મહત્વના ગણાતા નાણા અને ઉર્જા મંત્રાલય પાછા લેવામાં આવ્યા હતા અને ત્યારબાદ તેઓએ નારાજગી બતાવી હતી અને અંતે તેઓને મોવડીમંડળ દ્વારા નાણા મંત્રાલય પાછું આપવામાં આવ્યું હતું.
