નેશનલ ગેમ્સ પૈકીની વોલીબોલ સ્પર્ધાઓનો શનિવારથી સિદસર ખાતેના સ્પોર્ટ્સ ઓથોરીટી ઓફ ગુજરાતના ઇનડોર સ્ટેડિયમ ખાતે આરંભ થયો છે. અને પ્રારંભિક મેચોમાં મેન્સ ઇવેન્ટમાં રાજસ્થાનની ટીમને યજમાન ગુજરાતની ટીમે 3-2થી પરાસ્ત કરી હતી. જ્યારે વિમેન્સ વિભાગમાં ગુજરાતના ભાગે પ્રથમ દિવસે નિષ્ફળતા આવી છે.
વોલીબોલની મેન્સ ઇવેન્ટમાં ગુજરાતની ટીમે પ્રથમ બે સેટ 26-24, 25-22થી જીતી લીધા બાદ 21-25, 19-25થી રાજસ્થાનની ટીમે બે સેટ જીતી અને મેચમાં કમબેક કર્યુ હતુ. નિર્ણાયક પાંચમા સેટમાં ગુજરાતના ખેલાડીઓએ સારો દેખાવ કર્યો હતો અને 15-8થી જીતી અને લીગ મેચમાં વિજય મેળવ્યો હતો. વિમેન્સ વિભાગમાં પ્રથમ લીગ મેચમાં ચંડીગઢની ટીમે ગુજરાતને 3-2થી પરાસ્ત કર્યુ હતુ. ચંડીગઢે પ્રથમ બે સેટ 28-26, 25-19થી જીત્યા બાદ ગુજરાતની ટીમે મેચમાં રણનીતિ બદલી અને 23-25, 23-25થી બે સેટ જીતી લઇ મેચ નિર્ણાયક સેટમાં લઇ ગયા હતા.
પાંચમા સેટમાં ભારે રસાકસી બાદ ચંડીગઢની ટીમે 15-12થી સેટ અને મેચ જીતી લીધા હતા. મેન્સ વિભાગની અન્ય એક લીગ મેચમાં ગત નેશનલ ગેમ્સના ડિફેન્ડિંગ ચેમ્પિયન તામિલનાડુએ સીધા સેટોમાં પંજાબને 3-0થી જ્યારે વિમેન્સ વિભાગમાં રાજસ્થાનની ટીમે રોમાંચક મેચમાં 3-2થી હાર આપી હતી. મેન્સ વિભાગમાં કર્ણાટક સામે કેરળ, પંજાબ સામે તામિલનાડુનો જ્યારે વિમેન્સમાં હિમાચલ પ્રદેશ સામે રાજસ્થાનનો, પશ્ચિમ બંગાળ સામે કેરળનો લીગ મેચમાં વિજય થયો હતો.
