Rajkot News: સૌરાષ્ટ્રમાં રાજકોટ ખાતે ગુજરાત હાઈકોર્ટની બેન્ચ (Gujarat High Court Bench) સ્થાપવાની માંગ ફરી એકવાર તેજ બની છે. રાજકોટ બાર એસોસિએશનની આગેવાની હેઠળ છેલ્લા એક વર્ષથી ચાલી રહેલી લડતને હવે સમગ્ર સૌરાષ્ટ્ર-કચ્છના બાર એસોસિએશનોનું સમર્થન મળ્યું છે. આ મુદ્દે એક દિવસીય હડતાળ(Saurashtra Lawyers Strike) પાળી સરકારને આવેદનપત્ર પાઠવી લેખિત રજૂઆત કરવામાં આવી છે.
Gujarat High Court Bench: 11 જિલ્લાના બાર એસોસિએશન હડતાળમાં જોડાયા
રાજકોટ સહિત સૌરાષ્ટ્ર અને કચ્છના 11 જિલ્લાના બાર એસોસિએશનોએ કોર્ટની કામગીરીથી અલિપ્ત રહી વિરોધ (Lawyers Protest ) નોંધાવ્યો હતો. વકીલોએ જણાવ્યું કે રાજકોટમાં હાઈકોર્ટની બેન્ચ સ્થાપવામાં આવે તો લાખો લોકોને ઝડપી અને સરળ ન્યાય મળી શકશે.
40 ટકા કેસ સૌરાષ્ટ્ર-કચ્છના હોવાનો દાવો
વકીલોના જણાવ્યા અનુસાર, ગુજરાત હાઈકોર્ટમાં નોંધાતા અંદાજે 40 ટકા લિટિગેશનના કેસો સૌરાષ્ટ્ર અને કચ્છ વિસ્તારના હોય છે. આ વિસ્તારમાં 80 તાલુકા, 5,000થી વધુ ગામો અને 2 કરોડથી વધુની વસ્તી વસે છે. રાજકોટમાં બેન્ચ શરૂ થાય તો અમદાવાદ હાઈકોર્ટ પરનું ભારણ પણ નોંધપાત્ર રીતે ઘટી શકે છે.
‘અન્ય રાજ્યોમાં એકથી વધુ બેન્ચ, ગુજરાતમાં કેમ નહીં?’
બાર એસોસિએશનોએ (Gujarat Bar Association) રજૂઆતમાં સવાલ ઉઠાવ્યો કે કર્ણાટક, રાજસ્થાન, પશ્ચિમ બંગાળ, મધ્યપ્રદેશ અને આસામ જેવા રાજ્યોમાં એકથી વધુ હાઈકોર્ટ બેન્ચ કાર્યરત છે, તો ગુજરાતમાં હજુ સુધી માત્ર એક જ હાઈકોર્ટ કેમ છે? વકીલોનું માનવું છે કે રાજ્યના ભૌગોલિક વિસ્તાર અને કેસોના ભારને ધ્યાનમાં રાખીને રાજકોટમાં બેન્ચ જરૂરી છે.
વર્ષોથી ચાલી રહી છે લડત
ગુજરાત બાર એસોસિએશનના પૂર્વ ચેરમેન અને બાર કાઉન્સિલ ઓફ ઇન્ડિયાના સભ્ય દિલીપભાઈ પટેલે જણાવ્યું કે રાજકોટમાં હાઈકોર્ટ બેન્ચ માટે વર્ષોથી રજૂઆતો થઈ રહી છે. છેલ્લા એક વર્ષથી આ અભિયાનને વધુ મજબૂત બનાવવામાં આવ્યું છે અને વિવિધ બાર એસોસિએશનો સાથે સંકલન કરીને આંદોલન આગળ ધપાવવામાં આવી રહ્યું છે.
કાયદામંત્રી અને જનપ્રતિનિધિઓને પણ કરાઈ રજૂઆત
વકીલોના જણાવ્યા મુજબ, રાજ્યના કાયદામંત્રી સમક્ષ પણ આ મુદ્દે રજૂઆત કરવામાં આવી હતી અને હકારાત્મક અભિગમ મળ્યાનો દાવો કરવામાં આવ્યો છે. ઉપરાંત સૌરાષ્ટ્રના તમામ સાંસદો, ધારાસભ્યો તેમજ અન્ય સંબંધિત અધિકારીઓને પણ લેખિત રજૂઆત મોકલવામાં આવી છે. આગામી સમયમાં ગુજરાત હાઈકોર્ટના મુખ્ય ન્યાયાધીશ સમક્ષ પણ ફરી રજૂઆત કરવાની તૈયારી છે.
રાજકોટ બાર પ્રમુખે ગણાવ્યા લાભ
રાજકોટ બાર એસોસિએશનના પ્રમુખ સુમિત વોરાએ જણાવ્યું કે રાજકોટમાં હાઈકોર્ટ બેન્ચ શરૂ થશે તો કેસોની પેન્ડન્સી ઘટશે, અમદાવાદ સુધી જવાનો ખર્ચ અને સમય બચશે તથા સામાન્ય નાગરિકોને ઝડપી અને સસ્તો ન્યાય ઉપલબ્ધ બનશે.રાજકોટના સરકારી વકીલ સમીર ખીરાએ જણાવ્યું કે ન્યાય મેળવવો દરેક નાગરિકનો અધિકાર છે. સૌરાષ્ટ્ર-કચ્છના વિશાળ વિસ્તાર અને મોટી વસ્તીને ધ્યાનમાં રાખીને રાજકોટમાં હાઈકોર્ટ બેન્ચની જરૂરિયાત છે. તેમણે પણ અન્ય રાજ્યોમાં એકથી વધુ બેન્ચ હોવાનો ઉલ્લેખ કરીને ગુજરાતમાં પણ સમાન વ્યવસ્થા કરવાની માંગ કરી હતી.
લડતને વધુ મજબૂત બનાવવાની તૈયારી
વકીલ સંગઠનોએ સ્પષ્ટ કર્યું છે કે આ માંગને લઈને આગળ પણ કાયદાકીય અને લોકશાહી રીતે લડત ચાલુ રહેશે. જરૂર પડશે તો વધુ વ્યાપક આંદોલન પણ કરવામાં આવશે. તેમનું કહેવું છે કે સૌરાષ્ટ્ર-કચ્છના લોકોને સમયસર, સરળ અને સસ્તો ન્યાય મળે તે માટે રાજકોટમાં હાઈકોર્ટ બેન્ચની સ્થાપના જરૂરી બની ગઈ છે.
આ પણ વાંચો: સિહોર પાલિકામાં 47 કરોડના ભ્રષ્ટાચારનો આક્ષેપ, ગટર લાઈનના કામના રેકોર્ડને લઈને વિપક્ષના સવાલો
આ પણ વાંચો: ગુરુ પૂર્ણિમાએ ગુરુ પર કલંક! સુરતમાં માસૂમ બાળકને ઢોર માર મારવાનો આરોપ
આ પણ વાંચો: માંજલપુર પેટા ચૂંટણી 2026: 2.19 લાખ મતદારો માટે 260 મતદાન મથકો, પ્રથમ વખત મોબાઇલ ડિપોઝિશન સેન્ટરની વ્યવસ્થા
