Gujarat Monsoon Update 2026: દેશભરમાં ચોમાસાની સત્તાવાર એન્ટ્રી થઈ ચૂકી છે અને મેઘરાજા ઝડપથી આગળ વધી રહ્યા છે. હવામાન વિભાગના તાજા અહેવાલ મુજબ, દક્ષિણ-પશ્ચિમ ચોમાસું અત્યાર સુધીમાં દેશના 12 રાજ્યોમાં દસ્તક આપી ચૂક્યું છે. મધ્ય પ્રદેશ અને ઉત્તર પ્રદેશમાં સારો વરસાદ નોંધાયો છે, જ્યારે રાજસ્થાનના કેટલાક વિસ્તારોમાં કરા પડ્યા છે. દિલ્હી એરપોર્ટ પર ભારે પવન અને વરસાદના કારણે એર ઇન્ડિયાના 3 વિમાનોને નુકસાન પહોંચ્યું હોવાના અહેવાલ છે. બીજી તરફ, સેન્ટ્રલ અરબી સમુદ્ર અને મહારાષ્ટ્રના કેટલાક ભાગોમાં આગામી 3 થી 4 દિવસમાં ચોમાસું આગળ વધવા માટે એકદમ સાનુકૂળ પરિસ્થિતિઓ સર્જાઈ રહી છે.

અમદાવાદ અને રાજકોટ સૌથી ગરમ શહેરો

ગુજરાતમાં હાલ બેથી ત્રણ દિવસ વરસાદી માહોલ હળવો રહ્યા બાદ ગરમીમાં સહેજ વધારો નોંધાયો છે. છેલ્લા 24 કલાકમાં વિવિધ વિસ્તારોમાં ગરમીનો પારો 1 ડિગ્રી સુધી ઊંચકાયો છે. રવિવારે અમદાવાદ અને રાજકોટ બંને 41.9°C તાપમાન સાથે રાજ્યના સૌથી ગરમ શહેરો રહ્યા હતા. રાજકોટમાં પારો 41.0°C થી વધીને 41.9°C એ પહોંચ્યો છે, જ્યારે ડીસામાં 40.2°C અને સુરેન્દ્રનગરમાં 41.5°C તાપમાન નોંધાયું છે. બીજી તરફ ભાવનગરમાં પારો 0.8°C ગગડીને 39.7°C થયો છે, જેનાથી સ્થાનિકોને થોડી રાહત મળી છે. અમદાવાદની સ્થાનિક આગાહી મુજબ, આગામી દિવસોમાં આકાશ આંશિક રીતે વાદળછાયું રહેશે અને મહત્તમ તાપમાન 42°C આસપાસ જળવાઈ રહેશે.

આગામી 7 દિવસ  વરસાદની આગાહી

હવામાન વિભાગના જણાવ્યા અનુસાર, સમગ્ર ગુજરાત માટે આગામી 7 દિવસ સુધી કોઈ ખાસ ભારે વરસાદની ‘વેધર વોર્નિંગ’ નથી. જો કે, અલગ-અલગ વિસ્તારોમાં હળવોથી મધ્યમ વરસાદ કે ગાજવીજ સાથે ઝાપટાં પડી શકે છે. 11 જૂન પછી મોસમનો મિજાજ બદલાશે અને વરસાદનો વ્યાપ વધશે, જે અંતર્ગત 8 થી 11 જૂન દરમિયાન વરસાદનું જોર ઓછું રહેશે અને માત્ર દક્ષિણ ગુજરાતના ડાંગ, તાપી, નવસારી, વલસાડ તેમજ દમણ અને દાદરા નગર હવેલીમાં છૂટાછવાયા સ્થળોએ હળવો વરસાદ પડી શકે છે.

ત્યારબાદ 11 થી 12 જૂન વચ્ચે વરસાદી માહોલ ફરી વેગ પકડશે અને દક્ષિણ ગુજરાતના છોટાઉદેપુર, નર્મદા, સુરત, ડાંગ, તાપી, નવસારી, વલસાડ તેમજ સૌરાષ્ટ્રના અમરેલી, ભાવનગર, ગીર સોમનાથ તથા દીવમાં મેઘ મહેર જોવા મળશે. વળી, 12 થી 13 જૂન દરમિયાન ઉત્તર ગુજરાતના પંચમહાલ, દાહોદ, મહીસાગર સહિત દક્ષિણ ગુજરાતના તમામ જિલ્લાઓ અને સૌરાષ્ટ્રના દરિયાકાંઠાના વિસ્તારોમાં વરસાદની શક્યતા છે, જ્યારે 13 થી 14 જૂન વચ્ચે પંચમહાલ, દાહોદ, મહીસાગર ઉપરાંત સૌરાષ્ટ્રના પોરબંદર, જૂનાગઢ, અમરેલી, ભાવનગર, ગીર સોમનાથ અને દીવના વિસ્તારોમાં વરસાદી ઝાપટાં પડવાની સંભાવના વ્યક્ત કરવામાં આવી છે.

દેશમાં Monsoon ની વર્તમાન સ્થિતિ

દક્ષિણ-પશ્ચિમ ચોમાસું દેશના પૂર્વોત્તર ભાગો તરફ સફળતાપૂર્વક આગળ વધી ગયું છે, જેમાં સમગ્ર નાગાલેન્ડ, મણિપુર, મિઝોરમ, ત્રિપુરા, આસામ અને અરુણાચલ પ્રદેશના ભાગો કવર થઈ ચૂક્યા છે. આગામી દિવસોમાં ચોમાસું મહારાષ્ટ્ર, કર્ણાટક, તેલંગાણા, આંધ્રપ્રદેશ, છત્તીસગઢ અને ઓડિશાના વધુ વિસ્તારો તરફ આગળ વધશે. હાલમાં ગુજરાત અને તેની આસપાસના વિસ્તારો પર નીચલા સ્તરે મુખ્યત્વે દક્ષિણ-પશ્ચિમી પવનો ફૂંકાઈ રહ્યા હોવાથી વાતાવરણમાં ભેજનું પ્રમાણ અને વાદળછાયો માહોલ યથાવત રહેશે.

આ પણ વાંચો:  12 રાજ્યો સુધી પહોંચ્યું ચોમાસું, અનેક વિસ્તારોમાં વરસાદ તો ક્યાંક હીટવેવની ચેતવણી

આ પણ વાંચો:  ચોમાસું કેરળ પહોંચ્યા બાદ 4 રાજ્યોમાં આગળ વધ્યું, ગુજરાતમાં આ તારીખે થશે એન્ટ્રી

આ પણ વાંચો:  આજે કેરલ અને તમિલનાડુમાં બેસશે ચોમાસું, દિલ્હી-NCR સહિત 17 રાજ્યોમાં ઓરેન્જ એલર્ટ