Udaipur News : રાજસ્થાનના ઉદયપુરમાં એક રોમાંચક ઝિપ લાઇન (Zip Line)રાઇડ અચાનક ભયજનક ઘટનામાં ફેરવાઈ ગઈ, જ્યારે ચાર ગુજરાતી મિત્રો પૈકી બે પ્રવાસીઓ 70 ફૂટની ઊંચાઈએ હવામાં લટકતા રહી ગયા. ભારે પવનના કારણે ઝિપ લાઇન વચ્ચે અટકી જતા બંને પ્રવાસીઓ ગભરાઈ ગયા હતા. જોકે સ્થળ પર હાજર રેસ્ક્યુ ટીમે ઝડપી કામગીરી કરીને માત્ર અઢી મિનિટમાં બંનેને સુરક્ષિત રીતે નીચે ઉતારી લીધા હતા.
ભારે પવનના કારણે વચ્ચે જ અટકી રાઇડ
મળતી માહિતી અનુસાર, આ ઘટના ઉદયપુર (Udaipur)ના પિછોલા તળાવ નજીક આવેલી ઝિપ લાઇન (Zip Line)પર બુધવારે સાંજે બની હતી. ગુજરાતના ચાર મિત્રો ઝિપ લાઇનનો આનંદ માણવા આવ્યા હતા. તેઓ બે-બેના જૂથમાં રાઇડ કરી રહ્યા હતા. દરમિયાન અચાનક હવામાનમાં ફેરફાર થયો અને ભારે પવન ફૂંકાવા લાગ્યો. પરિણામે બે પ્રવાસીઓ ગંતવ્ય સ્થળે પહોંચતા પહેલાં જ ઝિપ લાઇન વચ્ચે અટકી ગયા.
હવામાં લટકતા જોઈ ગભરાયા પ્રવાસીઓ
જમીનથી આશરે 70 ફૂટની ઊંચાઈએ અટવાઈ જતા બંને પ્રવાસીઓ ગભરાઈ ગયા હતા. નીચે રસ્તા પર વાહનોની અવરજવર ચાલુ હોવાથી તેઓ વધુ ડરી ગયા અને મદદ માટે બૂમો પાડવા લાગ્યા. ઘટનાનો વીડિયો પણ સામે આવ્યો છે, જેમાં બંને પ્રવાસીઓ હવામાં લટકતા જોવા મળે છે.
રેસ્ક્યુ ટીમે અઢી મિનિટમાં કર્યું ઓપરેશન
ઘટનાની જાણ થતાં જ ઝિપ લાઇન (Zip Line)ની રેસ્ક્યુ ટીમ સક્રિય બની ગઈ. તાલીમબદ્ધ સ્ટાફ ખાસ સાધનો સાથે પ્રવાસીઓ સુધી પહોંચ્યો અને તેમને સુરક્ષિત રીતે નજીકના પોઈન્ટ સુધી લઈ આવ્યો. સમગ્ર રેસ્ક્યુ ઓપરેશન માત્ર અઢી મિનિટમાં પૂર્ણ થયું હતું.
630 મીટર લાંબી ઝિપ લાઇન
દૂધતલાઈ વિસ્તાર ખાતે આવેલી આ ઝિપ લાઇન (Zip Line)દીનદયાળ પાર્કથી માણિક્યલાલ વર્મા પાર્ક સુધી ચાલે છે. તેની કુલ લંબાઈ લગભગ 630 મીટર છે અને સામાન્ય રીતે પ્રવાસીઓ માત્ર 45 સેકન્ડમાં સમગ્ર અંતર કાપી લે છે. આ ઝિપ લાઇન સેવા ઓક્ટોબર 2025માં શરૂ કરવામાં આવી હતી અને દર મહિને સરેરાશ 600 જેટલા પ્રવાસીઓ તેનો લાભ લે છે.
સુરક્ષા વ્યવસ્થાઓ પર ભાર
સંચાલકોના જણાવ્યા અનુસાર, આવી પરિસ્થિતિઓ માટે રેસ્ક્યુ ટીમ હંમેશા તૈયાર રહે છે. હવામાનમાં અચાનક ફેરફાર અથવા અન્ય ટેક્નિકલ કારણોસર રાઇડર ફસાઈ જાય તો તરત જ બચાવ કામગીરી હાથ ધરવામાં આવે છે. તાજેતરની ઘટનાએ સુરક્ષા વ્યવસ્થાઓની અસરકારકતા પણ સાબિત કરી છે.
