એક તરફ જ્યાં દિલ્હી જેવા શહેરોમાં આકરી ગરમીના કારણે અગાઉના તમામ રેકોર્ડ તૂટી રહ્યા છે, તો ઉત્તર-પૂર્વમાં ભારે વરસાદે લોકોને તોડી નાખ્યા છે. અહીં ભારે વરસાદને કારણે પૂર અને ભૂસ્ખલનની સ્થિતિ સર્જાઈ છે, જ્યારે લાખો લોકો તેનાથી પ્રભાવિત થયા છે. હવામાન વિભાગના જણાવ્યા અનુસાર, હાલમાં વરસાદથી રાહત મળવાની કોઈ આશા નથી, આગામી 4 દિવસ સુધી વરસાદ પડશે.
મળતી માહિતી મુજબ આસામમાં પૂરથી 4 લાખ લોકો પ્રભાવિત થયા છે. 24 કલાકમાં અહીં અસરગ્રસ્તોની સંખ્યા બમણી થઈ ગઈ છે. અવિરત વરસાદથી સર્જાયેલા ભૂસ્ખલનથી આસામની બરાક ખીણ અને દિમા હસાઓ જિલ્લાઓ અને પડોશી રાજ્યો ત્રિપુરા, મિઝોરમ અને મણિપુર સાથેનો રેલ અને માર્ગ સંપર્ક તૂટી ગયો છે. આસામ સ્ટેટ ડિઝાસ્ટર મેનેજમેન્ટ ઓથોરિટી (ASDMA) બુલેટિનમાં જણાવ્યું હતું કે અસરગ્રસ્ત લોકોની સંખ્યા સોમવારે 20 જિલ્લામાં 1,97,248 થી 26 જિલ્લામાં 4,03,352 પર પહોંચી ગઈ છે.
ગૃહમંત્રીએ મદદની ખાતરી આપી
લગભગ એક લાખ અસરગ્રસ્ત લોકો સાથે કચર સૌથી વધુ અસરગ્રસ્ત જિલ્લો છે, જ્યારે દિમા હસાઓના ઘણા વિસ્તારોમાં ભૂસ્ખલન ચાલુ છે. ભૂસ્ખલનમાં માર્યા ગયેલા 5 લોકો સહિત મૃતકોની સંખ્યા વધીને 8 થઈ ગઈ છે. કેન્દ્રીય ગૃહ પ્રધાન અમિત શાહે આસામને કેન્દ્ર સરકાર તરફથી તમામ સંભવિત સહાયની ખાતરી આપી છે, જ્યારે રાજ્ય વહીવટીતંત્ર આવશ્યક ચીજવસ્તુઓની સપ્લાય સુનિશ્ચિત કરવા અને અસરગ્રસ્ત વિસ્તારોમાં સંચાર ચેનલોને પુનઃસ્થાપિત કરવા પગલાં લઈ રહ્યું છે. અમિત શાહે ટ્વીટ કરીને કહ્યું કે, આસામના કેટલાક ભાગોમાં ભારે વરસાદને જોતા પરિસ્થિતિ અંગે ચિંતિત છીએ. પરિસ્થિતિનો તાગ મેળવવા માટે સીએમ હિમંતા બિસ્વા સરમા સાથે વાત કરી. એનડીઆરએફની ટીમો પહેલેથી જ તૈનાત કરવામાં આવી છે. કેન્દ્ર સરકાર તરફથી શક્ય તમામ મદદની ખાતરી આપી.
વરસાદની ચેતવણી જારી
પ્રાદેશિક હવામાન આગાહી કેન્દ્ર, ગુવાહાટીએ બુધવાર સુધી આસામમાં “ખૂબ ભારે” વરસાદ અને આગામી પાંચ દિવસ સુધી સમગ્ર રાજ્યમાં વ્યાપક વરસાદની ચેતવણી જારી કરી છે. ઘણા પ્રભાવિત વિસ્તારોમાં લગભગ એક લાખ લોકોએ લગભગ એક હજાર રાહત શિબિરોમાં આશ્રય લીધો છે. સોમવારથી, 11 પાળા તૂટ્યા છે, જ્યારે છ અન્ય અસરગ્રસ્ત થયા છે, ઉપરાંત ઘરો, રસ્તાઓ, પુલ અને અન્ય માળખાકીય સુવિધાઓને નુકસાન થયું છે.
