New Delhi News : દિલ્હીના રામલીલા મેદાન (Ramlila Maidan)માં રવિવારે વિપક્ષી I.N.D.I.A. ગઠબંધન દ્વારા ‘વોટ બચાવો, દેશ બચાવો’ મહારેલીનું (INDIA Rally)આયોજન કરવામાં આવ્યું છે. મતદાર યાદી સુધારણા પ્રક્રિયા અને મતદારોનાં નામ કથિત રીતે દૂર કરવાના મુદ્દે વિપક્ષે ચૂંટણી પંચ સામે મોરચો ખોલ્યો છે. આ INDIA Alliance Rallyમાં કોંગ્રેસના નેતા રાહુલ ગાંધી, સમાજવાદી પાર્ટીના અધ્યક્ષ અખિલેશ યાદવ, મલ્લિકાર્જુન ખડગે, પ્રિયંકા ગાંધી સહિત અનેક વિપક્ષી નેતાઓ એક મંચ પર જોવા મળ્યા હતા. વિપક્ષે મુખ્ય ચૂંટણી કમિશનર જ્ઞાનેશ કુમારના રાજીનામાની પણ માંગ કરી છે.
INDIA Rally : સંજય રાઉતનો દાવો, દેશમાં સત્તા પરિવર્તન થશે
રેલીમાં શિવસેના (UBT)ના સાંસદ સંજય રાઉતે (Sanjay Raut)કેન્દ્ર સરકાર સામે આક્રમક વલણ અપનાવ્યું હતું. તેમણે કહ્યું કે દેશમાં મોટી રાજકીય ક્રાંતિ આવી રહી છે અને વિપક્ષી પક્ષો એકજૂથ થઈને સત્તા પરિવર્તન માટે આગળ વધી રહ્યા છે. તેમના મતે INDIA Alliance Rally માત્ર વિરોધ પ્રદર્શન નથી, પરંતુ દેશના રાજકારણમાં નવા અધ્યાયની શરૂઆત છે. તેમણે વિશ્વાસ વ્યક્ત કર્યો કે વિપક્ષની એકતા આગામી સમયમાં સત્તાધારી પક્ષ માટે મોટો પડકાર બનશે.
રાહુલ અને અખિલેશનો ચૂંટણી પંચ સામે વિરોધ
રામલીલા મેદાનમાં પહોંચેલા રાહુલ ગાંધી (Rahul Gandhi)અને અખિલેશ યાદવે મતદાર યાદી સુધારણા પ્રક્રિયાને લઈને ચૂંટણી પંચની કામગીરી પર સવાલો ઉઠાવ્યા હતા. વિપક્ષનો દાવો છે કે મતદાર યાદીમાંથી મોટા પ્રમાણમાં નામ દૂર થવાથી લોકશાહી પ્રક્રિયાની પારદર્શિતા સામે પ્રશ્નો ઊભા થયા છે.
સમાજવાદી પાર્ટીના અધ્યક્ષ અખિલેશ યાદવે ઉત્તર પ્રદેશની ભાજપ સરકાર પર પણ નિશાન સાધ્યું હતું. તેમણે કહ્યું કે સરકારની કામગીરી સામે સવાલો વધી રહ્યા છે. એમએલસી ચૂંટણીમાં હાર અને મતદારોની સંખ્યા ઘટવાના મુદ્દાનો ઉલ્લેખ કરતાં તેમણે ભાજપના ‘ડબલ એન્જિન’ના નારા પર કટાક્ષ કર્યો હતો. અખિલેશે કહ્યું કે ડબલ એન્જિન સરકાર હવે ડબલ ઝીરો બની ગઈ છે.
ખડગેના નિવાસસ્થાનેથી નેતાઓની કૂચ
રેલી પહેલાં કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને વિપક્ષી નેતાઓ એકત્ર થયા હતા. ત્યારબાદ નેતાઓએ એકસાથે રામલીલા મેદાન તરફ કૂચ કરી હતી. આ કાર્યક્રમમાં રાહુલ ગાંધી (Rahul Gandhi), પ્રિયંકા ગાંધી, અખિલેશ યાદવ (Akhilesh Yadav), મમતા બેનરજી, તેજસ્વી યાદવ, કે.સી. વેણુગોપાલ સહિતના નેતાઓની હાજરી નોંધપાત્ર રહી હતી.
બીજી તરફ, ભાજપના રાષ્ટ્રીય અધ્યક્ષ નીતિન નબીને હરિયાણાના રોહતકમાં રાહુલ ગાંધી અને કોંગ્રેસ પર પ્રહાર કર્યા હતા. તેમણે વિપક્ષ પર દેશમાં અસ્થિરતા ફેલાવવાનો પ્રયાસ કરવાનો આરોપ લગાવ્યો હતો. તેમણે એવો દાવો પણ કર્યો કે કોંગ્રેસ વિદેશી શક્તિઓના ઈશારે કામ કરી રહી છે.
4 હજારથી વધુ સુરક્ષાકર્મીઓ તહેનાત
વિપક્ષની મહારેલીને ધ્યાનમાં રાખીને દિલ્હી પોલીસ દ્વારા રામલીલા મેદાન (Ramlila Maidan) અને આસપાસના વિસ્તારોમાં કડક સુરક્ષા વ્યવસ્થા કરવામાં આવી છે. સમગ્ર વિસ્તારને 14 સુરક્ષા ઝોનમાં વહેંચવામાં આવ્યો છે. 4 હજારથી વધુ પોલીસકર્મીઓ અને કેન્દ્રીય સશસ્ત્ર પોલીસ દળોની ટુકડીઓ તહેનાત કરવામાં આવી છે.
મેદાન અને આસપાસના વિસ્તારોમાં 200થી વધુ CCTV કેમેરા લગાવવામાં આવ્યા છે. પ્રવેશદ્વારો પર મેટલ ડિટેક્ટરથી તપાસ કર્યા બાદ જ લોકોને પ્રવેશ આપવામાં આવી રહ્યો છે. ભીડને નિયંત્રિત કરવા માટે બેરિકેડિંગ અને અલગ-અલગ પ્રવેશ માર્ગોની વ્યવસ્થા પણ કરવામાં આવી છે.
ટ્રાફિક વ્યવસ્થામાં ફેરફાર, વેપારીઓની પણ અપીલ
મહારેલીને કારણે મધ્ય દિલ્હીના અનેક વિસ્તારોમાં ટ્રાફિક ડાયવર્ઝન લાગુ કરવામાં આવ્યું છે. સવારે 10થી સાંજે 5 વાગ્યા સુધી ITO, દિલ્હી ગેટ, રાજઘાટ, અજમેરી ગેટ અને તુર્કમાન ગેટ સહિતના વિસ્તારોમાં વાહનચાલકોને વૈકલ્પિક માર્ગોનો ઉપયોગ કરવાની સલાહ આપવામાં આવી છે.
બીજી તરફ, દિલ્હી ટ્રેડર્સ સંગઠન CTI દ્વારા તહેવારોની મોસમમાં વેપારને અસર ન થાય તે માટે રાહુલ ગાંધીને અપીલ કરવામાં આવી હતી. તેના જવાબમાં રાહુલ ગાંધીએ રેલીમાં આવતા કાર્યકરોને સ્થાનિક દુકાનોમાંથી ખરીદી કરવાની અપીલ કરી હતી, જેથી વેપારીઓને પણ આર્થિક લાભ મળી શકે.
‘વોટ બચાવો, દેશ બચાવો’ના નારા સાથે યોજાયેલી આ મહારેલીથી દેશના રાજકારણમાં ફરી એકવાર ગરમાવો આવ્યો છે. ચૂંટણી પ્રક્રિયાની પારદર્શિતા અને મતદાર યાદીના મુદ્દે સત્તાપક્ષ તથા વિપક્ષ વચ્ચેનો રાજકીય સંઘર્ષ વધુ તેજ બનવાના સંકેત છે.
