Kuwait Airport Drone Attack: પશ્ચિમ એશિયા (West Asia) માં ચાલી રહેલો તણાવ હવે અત્યંત ખતરનાક સ્તરે પહોંચી ગયો છે. કુવૈત આંતરરાષ્ટ્રીય હવાઈ મથક પર થયેલા એક ભીષણ ડ્રોન હુમલામાં એક નિર્દોષ ભારતીય નાગરિકે પોતાનો જીવ ગુમાવ્યો છે. કુવૈતમાં આવેલા ભારતીય દૂતાવાસે (Indian Embassy) આ દુખદ ઘટનાની સત્તાવાર પુષ્ટિ કરી છે. આ હુમલાને પગલે એરપોર્ટને મોટું નુકસાન થયું છે અને સુરક્ષાના કારણોસર કુવૈતે તમામ ફ્લાઇટ્સ રોકી દઈને બીજા એરપોર્ટ તરફ ડાયવર્ટ કરી દીધી છે.
પીડિત ભારતીય પરિવારની વહારે આવ્યું દૂતાવાસ
ભારતીય દૂતાવાસે આ હૃદયદ્રાવક ઘટના પર ઊંડું દુઃખ વ્યક્ત કર્યું છે. દૂતાવાસના વરિષ્ઠ અધિકારીઓ મૃતક ભારતીય નાગરિકના પરિવાર સાથે સતત સંપર્કમાં છે. પાર્થિવ દેહને ભારત લાવવા સહિતની તમામ કાનૂની અને વહીવટી પ્રક્રિયાઓ માટે ભારતીય અધિકારીઓ કુવૈતના પ્રશાસન સાથે સતત તાલમેલ મિલાવી રહ્યા છે. આ સિવાય હુમલામાં ઘાયલ થયેલા અન્ય લોકોને પણ દૂતાવાસ દ્વારા તમામ શક્ય તબીબી સહાય પૂરી પાડવામાં આવી રહી છે.
Kuwait ઈરાન પર લગાવ્યો મોટો આક્ષેપ
આ આત્મઘાતી હુમલો કુવૈત(Kuwait) ઇન્ટરનેશનલ એરપોર્ટના પેસેન્જર બિલ્ડિંગ (T1) ને નિશાન બનાવીને કરવામાં આવ્યો હતો.
ગુનાહિત આક્રમણ: કુવૈત(Kuwait) આર્મીના પ્રવક્તા બ્રિગેડિયર જનરલ સઉદ અબ્દુલ અઝીઝ અલ-ઓતૈબીએ સત્તાવાર નિવેદન આપતા સીધો જ ઈરાની સેના પર આરોપ લગાવ્યો છે. તેમણે આ હુમલાને ઈરાનની ‘ગુનાહિત આક્રમકતા’ ગણાવી છે.
ભારે તબાહી: ડ્રોન બ્લાસ્ટના કારણે એરપોર્ટની ઈમારતનો એક મોટો હિસ્સો ધરાશાયી થયો છે અને ત્યાં હાજર અનેક મુસાફરો ગંભીર રીતે ઘાયલ થયા છે, જેમને સ્થાનિક હોસ્પિટલોમાં સારવાર અર્થે ખસેડાયા છે.
ઈરાનનો દાવો: અમેરિકા સામે કરી ‘જવાબી કાર્યવાહી’
બીજી તરફ, ઈરાનના સરકારી મીડિયા ‘પ્રેસ ટીવી’ (Press TV) એ આ હુમલા પાછળ એક અલગ જ દાવો રજૂ કર્યો છે:
અમેરિકા સાથે દુશ્મની: ઈરાનની રિવોલ્યુશનરી ગાર્ડ્સ કોર્પ્સ (IRGC) નું કહેવું છે કે આ હુમલો અમેરિકાની જોહુકમી સામે એક જવાબી કાર્યવાહી છે.
ઈરાનના આરોપ મુજબ, અમેરિકાએ સ્ટ્રેટ ઓફ હોર્મુઝ (Hormuz Strait) નજીક તેમના એક ઓઈલ ટેન્કર અને કશ્મ ટાપુ પર આવેલા કમ્યુનિકેશન ટાવરને નિશાન બનાવ્યા હતા. તેના બદલામાં ઈરાને બહેરીનમાં આવેલા અમેરિકી નૌસેનાના પાંચમા બેડા (5th Fleet) ના હેડક્વાર્ટર અને આ ક્ષેત્રના એક એરબેઝ પર મિસાઈલો અને ડ્રોન વડે હુમલા કર્યા છે, જેની ઝપેટમાં કુવૈત એરપોર્ટ પણ આવી ગયું.
હાલ કુવૈતની(Kuwait) સેનાએ જણાવ્યું છે કે તેઓ સરહદો અને દેશની સ્થિતિ પર સંપૂર્ણ નજર રાખી રહ્યા છે. દેશની સુરક્ષા અને સ્થિરતા જાળવી રાખવા માટે સેના હાઈ એલર્ટ પર છે. જોકે, આ ભયાનક હુમલા બાદ સમગ્ર મિડલ ઈસ્ટમાં યુદ્ધના વાદળો વધુ ઘેરા બન્યા છે.
આ પણ વાંચો :જાપાનમાં પરવાનગી વગર મસ્જિદ બનાવવા પર ભડકી સરકાર, પાકિસ્તાને કર્યું ઉદ્ઘાટન, ગમે ત્યારે ચાલશે બુલડોઝર
આ પણ વાંચો : ભારત, ચીન અને જાપાનથી આવતા સામાન પર અમેરિકા વધારશે ટેરિફ, USએ આપ્યા સંકેત
આ પણ વાંચો :અમેરિકાનો ઈરાનના કેશમ દ્વીપ પર હુમલો, તેહરાને કુવૈત-બહેરીન પર દાગી મિસાઇલ
