Middle East Tension: મિડલ ઈસ્ટમાં યુદ્ધવિરામ હોવા છતાં વિસ્તારમાં તણાવ સતત વધી રહ્યો છે. અમેરિકી (US) સેનાએ મંગળવારે દાવો કર્યો કે ઈરાન દ્વારા પાડોશી દેશો પર કરવામાં આવેલા મિસાઇલ અને ડ્રોન હુમલાઓને સફળતાપૂર્વક નિષ્ફળ બનાવવામાં આવ્યા છે.

યુદ્ધવિરામ પછી પણ શાંતિ દૂર

સાથે જ અમેરિકાએ આત્મરક્ષાના પગલાં તરીકે ઈરાનના કેશમ દ્વીપ અને આસપાસના વિસ્તારોમાં સૈન્ય કાર્યવાહી હાથ ધરી હોવાનું જણાવ્યું છે. અમેરિકી સેન્ટ્રલ કમાન્ડ (CENTCOM)ના નિવેદન મુજબ, ઈરાને કુવૈત અને બહેરીન તરફ અનેક બેલિસ્ટિક મિસાઇલ દાગી હતી.

કુવૈત અને બહેરીન બન્યા નવા નિશાના

જોકે મોટાભાગની મિસાઇલો પોતાના નિશાન સુધી પહોંચી શકી નહોતી અથવા હવાઈ સંરક્ષણ પ્રણાલીએ તેને માર્ગમાં જ નિષ્ક્રિય કરી દીધી હતી. અમેરિકાના જણાવ્યા અનુસાર, કુવૈત તરફ છોડવામાં આવેલી બે મિસાઇલ નિશાન ચૂકી ગઈ હતી અથવા વચ્ચે જ તૂટી પડી હતી.

એર ડિફેન્સ સિસ્ટમ બની ઢાલ, ટળ્યો મોટો ખતરો

જ્યારે બહેરીન તરફ દાગવામાં આવેલી ત્રણ મિસાઇલને અમેરિકી અને બહેરીનની સંયુક્ત હવાઈ સુરક્ષા દળોએ સફળતાપૂર્વક રોકી લીધી હતી. આ ઘટનામાં કોઈ જાનહાનિના અહેવાલ સામે આવ્યા નથી.

અમેરિકી સેન્ટ્રલ કમાન્ડે વધુમાં જણાવ્યું કે ઈરાનના કેશમ દ્વીપ અને ગોરુક વિસ્તારમાં આવેલા રડાર સ્ટેશનો, ડ્રોન કંટ્રોલ સાઇટ્સ અને એર ડિફેન્સ સિસ્ટમોને નિશાન બનાવીને હુમલા કરવામાં આવ્યા હતા.

અમેરિકાનો જવાબી પ્રહાર, ઈરાનના સૈન્ય ઠેકાણા નિશાને

અમેરિકાનું કહેવું છે કે આ કાર્યવાહી આત્મરક્ષાના ભાગરૂપે કરવામાં આવી હતી, કારણ કે ઈરાને અગાઉ અમેરિકી ડ્રોનને તોડી પાડ્યો હતો અને વિસ્તારમાં જહાજોની સુરક્ષા માટે ખતરો ઉભો કર્યો હતો.

આત્મરક્ષાનો દાવો, પરંતુ વધ્યો રાજકીય વિવાદ

બીજી તરફ, ઈરાની મીડિયાએ અમેરિકી હુમલાની કડક નિંદા કરી છે અને તેને આક્રમક તથા ઉશ્કેરણીજનક કાર્યવાહી ગણાવી છે. આ ઘટનાએ મિડલ ઈસ્ટમાં ફરી એકવાર સંઘર્ષની આશંકાઓને વેગ આપ્યો છે અને આંતરરાષ્ટ્રીય સમુદાયની ચિંતા વધારી છે.

આ પણ વાંચો : યુરોપના સૌથી મોટા પરમાણુ પ્લાન્ટ પર ડ્રોન હુમલો, રશિયાના આરોપ પર યુક્રેનનો મોટો પલટવાર

આ પણ વાંચો : અમેરિકાએ ઇરાનનું 1 અબજ ડોલરનું ક્રિપ્ટો ફંડ કર્યું જપ્ત, ઓપરેશન ઇકોનોમિક ફ્યુરીથી તૂટી કમર

આ પણ વાંચો : ફિલિસ્તીની કેદીઓ સાથે જેલમાં અત્યાચારના અહેવાલથી ભડક્યું ઇઝરાયલ, યુએન સાથે સંબંધો તોડ્યા!