ભારતીય પુરૂષ હોકી ટીમે બર્મિંગહામ કોમનવેલ્થ ગેમ્સમાં તેમની પૂલ બી મેચમાં ઘાનાને 11-0થી હરાવ્યું. કોમનવેલ્થ ગેમ્સના ઈતિહાસમાં ભારતની આ સૌથી મોટી જીત છે. અગાઉ 2006 મેલબોર્ન કોમનવેલ્થ ગેમ્સમાં ભારતે ત્રિનિદાદ અને ટોબેગોને 10-1થી હરાવ્યું હતું. કોમનવેલ્થ ગેમ્સમાં એકંદરે સૌથી વધુ જીતનો રેકોર્ડ ઓસ્ટ્રેલિયાના નામે છે. તેઓએ 2002 માન્ચેસ્ટર કોમનવેલ્થ ગેમ્સમાં બાર્બાડોસને 20-1થી હરાવ્યું.
ભારત માટે આઠ અલગ-અલગ ખેલાડીઓએ ગોલ કર્યા હતા. ભારત માટે અભિષેક, હરમનપ્રીત, શમશેર સિંહ, આકાશદીપ સિંહ, જુગરાજ સિંહ, નીલકાંત શર્મા, વરુણ કુમાર અને મનદીપ સિંહે ગોલ કર્યા હતા. વાઇસ-કેપ્ટન હરમનપ્રીતે તેની 150મી આંતરરાષ્ટ્રીય હોકી મેચમાં સૌથી વધુ ત્રણ ગોલ કર્યા હતા.
ભારતીય કેપ્ટન મનપ્રીત સિંહની આ 300મી આંતરરાષ્ટ્રીય મેચ હતી. ભારતના ગ્રુપમાં ઘાના ઉપરાંત ઈંગ્લેન્ડ, વેલ્સ અને કેનેડાની ટીમો છે. ઘાના બાદ ભારતની આગામી મેચ સોમવારે યજમાન ઈંગ્લેન્ડ સામે થશે. આ પછી ભારતીય ટીમ 3 ઓગસ્ટે કેનેડા અને 4 ઓગસ્ટે વેલ્સ સામે ટકરાશે.
