Indus Waters Treaty India Pakistan Seminar: સિંધુ જળ સંધિને લઈને ભારત અને પાકિસ્તાન વચ્ચેનો તણાવ ફરી ચર્ચામાં આવ્યો છે. પાકિસ્તાનમાં પાણીની અછત અને વધતી જળ સમસ્યા વચ્ચે પાકિસ્તાને હવે આંતરરાષ્ટ્રીય સમુદાય સમક્ષ આ મુદ્દો ઉઠાવ્યો છે. અમેરિકામાં પાકિસ્તાની દૂતાવાસ દ્વારા આયોજિત એક વર્ચ્યુઅલ સેમિનારમાં પાકિસ્તાનના વિદેશ મંત્રી ઇશાક ડારે સિંધુ નદી પ્રણાલીને પોતાના દેશના કરોડો લોકો માટે અત્યંત મહત્વપૂર્ણ ગણાવી હતી. તેમણે ભારતના સંધિ સ્થગિત કરવાના નિર્ણય પર ચિંતા વ્યક્ત કરી અને આંતરરાષ્ટ્રીય સ્તરે હસ્તક્ષેપની અપીલ કરી છે.

પહલગામ હુમલા બાદ ભારતનો મોટો નિર્ણય

આ સમગ્ર વિવાદની શરૂઆત એપ્રિલ 2025માં જમ્મુ-કાશ્મીરના પહલગામમાં થયેલા આતંકવાદી હુમલા બાદ થઈ હતી. આ હુમલામાં 26 લોકોનાં મોત થયા હતા. ત્યારબાદ ભારતે સિંધુ જળ સંધિ સ્થગિત કરવાનો નિર્ણય લીધો હતો. ભારત સરકારે પોતાના નિર્ણય પાછળ આતંકવાદને મુખ્ય કારણ ગણાવ્યું હતું. નવી દિલ્હીએ સ્પષ્ટ સંદેશ આપ્યો હતો કે જ્યાં સુધી પાકિસ્તાન(Pakistan) પોતાની ધરતી પરથી ભારત વિરુદ્ધ ચાલતી આતંકવાદી પ્રવૃત્તિઓ સામે નક્કર પગલાં નહીં લે, ત્યાં સુધી સંધિને સામાન્ય સ્થિતિમાં લાવવી સરળ નહીં બને.

Pakistan માટે પાણી કેમ છે જીવનરેખા?

પાકિસ્તાનના(Pakistan) વિદેશ મંત્રીનું કહેવું છે કે તેમના દેશની કૃષિ, ખાદ્ય સુરક્ષા, વીજ ઉત્પાદન અને આર્થિક વ્યવસ્થા સિંધુ નદીના પાણી સાથે ગાઢ રીતે જોડાયેલી છે. પાણીની અછત સાથે પાકિસ્તાન પહેલેથી જ અનેક આર્થિક અને પર્યાવરણીય પડકારોનો સામનો કરી રહ્યું છે. ગ્લોબલ વોર્મિંગ, ગ્લેશિયર પીગળવાની પ્રક્રિયા અને દુષ્કાળ જેવી સમસ્યાઓને કારણે પાકિસ્તાનમાં પાણીની ચિંતા વધુ વધી રહી છે. તેથી ઇસ્લામાબાદ માટે સિંધુ જળનો મુદ્દો હવે માત્ર રાજદ્વારી નહીં પરંતુ રાષ્ટ્રીય સુરક્ષા સાથે જોડાયેલો પ્રશ્ન બની ગયો છે.

ભારતના વલણમાં હાલ કોઈ ફેરફાર નહીં

પાકિસ્તાનની(Pakistan) અપીલો છતાં ભારત પોતાના નિર્ણય પર મક્કમ દેખાઈ રહ્યું છે. ભારતનો મુખ્ય સંદેશ એ છે કે આતંકવાદ અને સામાન્ય દ્વિપક્ષીય સહયોગ એકસાથે ચાલી શકે નહીં. આગામી સમયમાં સિંધુ જળ સંધિને લઈને બંને દેશો વચ્ચે રાજદ્વારી દબાણ વધુ વધી શકે છે. પાકિસ્તાન માટે પાણીની સમસ્યા ગંભીર બની રહી છે, જ્યારે ભારત આતંકવાદના મુદ્દે પોતાના કડક વલણને કોઈપણ કિંમતે નબળું પાડવા તૈયાર નથી. તેથી સિંધુ જળ સંધિનો મુદ્દો ભારત અને પાકિસ્તાન વચ્ચેના સંબંધોમાં આવનારા દિવસોમાં પણ મોટો વિષય બની રહેવાની શક્યતા છે.

આ પણ વાંચો: તિબેટમાં પૂરથી તબાહી; લાખો લોકો લાપતા છતાં ચીને દુનિયાથી છુપાવ્યા મોત અને નુકસાનના આંકડા

આ પણ વાંચો: નેપાળે વિદેશી બચાવ મદદ અંગે બદલ્યો નિર્ણય, હવે ફોરેન્સિક તપાસમાં લેશે આંતરરાષ્ટ્રીય સહાય

આ પણ વાંચો: ગલવાન પછી કેવું છે ભારત-ચીનનું સમીકરણ? ના તો દોસ્ત, ના દુશ્મન – જાણો ભારતની નવી રણનીતિ