ગુજરાત/ જામનગરનાં બોગસ પત્રકારોને પીળું પત્રકારત્વ કરવાનું પડ્યું ભારે : બ્લેકમેઇલ કરતા પોલીસે પકડ્યા

આપણે ત્યાં એક કહેવત છે કે ‘પાપ છાપરે ચઢી પોકારે’ એટલે કે માણસ ખોટા કર્મો કરીને ગમે તેટલો છૂપાવે કે નાસવાની કોશિશ કરે આખરે તેના કર્મના ફળનો હિસાબ થઈ જતો હોય છે. એમા પણ કર્મ જો પોલીસ ચોપડે ચઢી ગયું હોય તો આજ નહીં તો કાલ એનો હિસાબ થઈ જાય છે. આવો જ એક કિસ્સો જામનગરમાં સામે આવ્યો છે. જામનગર પોલીસ વડા પ્રેમસુખ ડેલના માર્ગદર્શન હેઠળ સાયબર ક્રાઇમ પોલીસ પોલીસે ઓનલાઇન વિડીયો વાયરલ કરવાનો ભય બતાવી બ્લેકમઈલ કરી તોડ કરતાં બે બોગસ પત્રકારોને ઝડપી પાડ્યા છે. બોગસ પત્રકારોને

તા.2 / 7 / 2022 ના રોજ જામનગર પાસે લાખાબાવળ નજીક ઓનલાઇન વિડીયો વાયરલ કરવાનો ભય બતાવી બ્લેકમઈલ કરવાનો બનાવ બન્યો હતો, તે અનુસંધાને જામનગર સાયબર ક્રાઇમ પોલીસ મથકમાં ગુન્હો દાખલ થયો હતો. જેમાં આરોપીઓ દ્વારા પોતાની ઓળખ પત્રકાર તરીકેની આપી ફરિયાદી તેમજ તેની મહિલા મિત્રનો વિડીયો ઉતારીને વિડીયો વાયરલ કરી સામાજિક બદનામ કરવાની ધમકી આપી વિડીયો વાયરલ ન કરવા માટે ફરિયાદી પાસે દોઢ લાખ રૂપિયાની માંગણી કરી, બાદમાં ફરિયાદી પાસેથી ઓનલાઈન ગૂગલ – પેના માધ્યમથી 20,000 રૂપિયા પડાવેલ હોવાનું સામે આવ્યું હતું. આવા બ્લેકમેલ કરનાર આરોપીઓને પકડી પાડવા સાયબર ક્રાઈમ પોલીસની ટીમ સતત તપાસમાં હતી, દરમ્યાન સાયબર કાઇમની ટીમને ખાનગી રાહે બાતમી મળી, ફરીયાદ મુજબના બે ઇસમો લાલપુર બાયપાસ ચોકડી નજીક જયુપીટર વાહન સાથે હોય, અને બાદમાં પંચ બી ડી.વી. પોલીસ કર્મીઓની મદદથી સાયબર ક્રાઇમ પોલીસ દ્વારા આ બંને કહેવાતા પત્રકારોને પકડી પાડ્યા.

દેવભૂમિ દ્વારકા જિલ્લાના ખંભાળિયાના આંબેડકરવાસમાં રહેતા અને ધોરણ 9 સુધી અભ્યાસ કરેલા આરોપી પ્રવીણ કરશનભાઈ પરમાર નામનો કહેવતો પત્રકાર શખ્સ સામે આ પ્રકારનો બીજો ગુનો છે. આરોપી વિરૂધ્ધ જામખંભાળીયા પોલીસ મથકમાં પણ અગાઉ ગુન્હો નોંધાયેલ છે જયારે અન્ય આરોપી કે જે દેવભૂમિ દ્વારકા જિલ્લાના ખંભાળિયા તાલુકાના મોટામાંઢાં ગામનો રહેવાસી અને માત્ર ધિરાણ 1 સુધી અભ્યાસ કરેલ પ્રકાશ વાલજીભાઈ ચાવડા, આ બન્ને ઈસમો પાસેથી પોલીસે એક ટેબલેટ, 3 મોબાઈલ, 1 પેનડ્રાઈવ, 2 એકસ્ટ્રા સીમકાર્ડ, 2 મેમરીકાર્ડ -02 ડેબિટ કાર્ડ 03, અલગ અલગ ઓળખકાર્ડ -04, આંબેડકર દર્પણ લખેલ માઇક -01, ટી.વી. એસ.જ્યુપીટર -01 રોકડ રકમ 1930 કબજે કરવામાં આવ્યા છે

ઝડપાયેલા બન્ને કહેવાતા પત્રકારો પત્રકાર તરીકે ઓળખ આપી જામનગર જિલ્લાના પર્યટન સ્થળો પર ફરવા ગયેલ યુગલોના વિડીયો ઉતારી વાયરલ કરવાનો ભય બતાવી હોમગાર્ડ તેમજ પત્રકારના એક્સપાયર્ડ થયેલા આઈડી કાર્ડ બતાવી યુગલોને બ્લેકમેઇલ કરી વિડીયો વાયરલ ન કરવા અને ડિલીટ કરવાના નામે નાગરીકો પાસેથી બળજબરી પૂર્વક રૂપિયા પડાવતા હતા ત્યારે આ બંનેને પોલીસે ઝડપી અને આગળની કાર્યવાહી હાથ ધરી છે. અત્રે ઉલ્લેખનીય છે કે આવા કહેવાતા પત્રકારોના કારણે સાચા પત્રકારો બદનામ થાય છે. ત્યારે જામનગર પોલીસે પણ અપીલ કરી છે કે આવા ઈસમોથી ડર્યા વિના સીધો જ પોલીસનો સંપર્ક કરવો જોઈએ.

આ પણ વાંચો : વિરાટ કોહલી ICC મેન્સ ટેસ્ટ પ્લેયર રેન્કિંગમાં ટોપ-10માંથી બહાર, આ ખેલાડીએ લીધું સ્થાન