Srinagar News: જમ્મુ-કાશ્મીરમાં ભારે વરસાદે વિનાશ (Jammu Kashmir Cloudburst) સર્જ્યો છે. પુંછ અને કિશ્તવાડ જિલ્લામાં વાદળ ફાટવાની (Poonch Rain) ઘટનાને કારણે પૂર અને ભૂસ્ખલન સર્જાતા (Landslide Jammu Kashmir) અત્યાર સુધીમાં 11 લોકોના મોત થયા છે. અનેક મકાનોને નુકસાન પહોંચ્યું છે, જ્યારે રાજૌરી જિલ્લામાં પૂરનાં પાણીમાં 200થી 250 જેટલા વાહનો તણાઈ ગયા છે. ખરાબ હવામાનને ધ્યાનમાં રાખીને અમરનાથ અને વૈષ્ણોદેવી યાત્રા અસ્થાયી રીતે સ્થગિત કરવામાં આવી છે.
પુંછમાં ભૂસ્ખલનથી પરિવાર પર આફત
પુંછ જિલ્લાના સુરનકોટ વિસ્તારમાં (Kishtwar Cloudburst) ભારે વરસાદ બાદ થયેલા ભૂસ્ખલનથી એક રહેણાંક મકાન કાટમાળ નીચે દબાઈ ગયું હતું. ઘટનાના સમયે ઘરમાં આઠ લોકો હાજર હતા. બચાવ કામગીરી દરમિયાન બે વર્ષના બાળક સોફિયાન યાસીર સહિત પાંચ લોકોના મૃતદેહ બહાર કાઢવામાં આવ્યા હતા, જ્યારે અન્ય લોકોને સુરક્ષિત સ્થળે ખસેડવાની કામગીરી હાથ ધરાઈ હતી.
રાજૌરીમાં પૂરથી 250 વાહનો તણાયા
રાજૌરી જિલ્લામાં (Rajouri Flood) શનિવારે મોડી રાત્રે ભારે વરસાદ બાદ ધારહાલ નદીમાં અચાનક પાણીનો પ્રવાહ વધી ગયો હતો. જેના કારણે ન્યૂ બસ સ્ટેન્ડ બેલા વિસ્તારમાં પૂર જેવી સ્થિતિ સર્જાઈ હતી. પાણીના જોરદાર પ્રવાહમાં લગભગ 200થી 250 વાહનો તણાઈ ગયા, જ્યારે અનેક વિસ્તારોમાં પાણી ભરાતા જનજીવન અસ્તવ્યસ્ત બન્યું હતું.કિશ્તવાડ જિલ્લાના દચ્છન વિસ્તારના સુરનુ ગામમાં વાદળ ફાટવાની ઘટનાથી રહેણાંક મકાનો અને ખેતીલાયક જમીનને ભારે નુકસાન પહોંચ્યું છે. સ્થાનિક પ્રશાસન દ્વારા અસરગ્રસ્ત વિસ્તારોમાં રાહત અને બચાવ કામગીરી તેજ કરવામાં આવી છે.
અમરનાથ અને વૈષ્ણોદેવી યાત્રા અસ્થાયી રીતે રોકાઈ
જમ્મુ-કાશ્મીરમાં સતત વરસાદ અને ભૂસ્ખલનની સ્થિતિને ધ્યાનમાં રાખીને 19 જુલાઈથી અમરનાથ (Amarnath Yatra) અને માતા વૈષ્ણોદેવી યાત્રા અસ્થાયી રીતે સ્થગિત કરવામાં આવી છે. યાત્રાળુઓની સુરક્ષાને પ્રાથમિકતા આપતાં પ્રશાસને આ નિર્ણય લીધો છે.
કેદારનાથ અને કૈલાસ-માનસરોવર યાત્રા પણ પ્રભાવિત
ઉત્તરાખંડમાં પણ ભારે વરસાદ અને ભૂસ્ખલનની અસર જોવા મળી છે. કેદારનાથ યાત્રા (Kedarnath yatra) માર્ગ પર અનેક સ્થળોએ ભૂસ્ખલન થતાં ઘોડા-ખચ્ચરની સેવાઓ બંધ કરવામાં આવી છે.તે ઉપરાંત, કૈલાસ-માનસરોવર યાત્રાના ચોથા જથ્થાના 50 યાત્રાળુઓને પિથોરાગઢ જિલ્લાના ધારચુલા બેઝ કેમ્પ ખાતે રોકવામાં આવ્યા છે. ગરબાધાર વિસ્તારમાં ભૂસ્ખલનને કારણે ગુંજી તરફ જતો માર્ગ બંધ થઈ ગયો છે.
અરુણાચલ પ્રદેશમાં પૂરની ગંભીર સ્થિતિ
અરુણાચલ પ્રદેશમાં પણ ચોમાસાએ ભારે તબાહી મચાવી છે. રાજ્યમાં પૂર અને ભૂસ્ખલનની ઘટનાઓમાં અત્યાર સુધીમાં 7 લોકોના મોત, 29 લોકો ઘાયલ થયા છે, જ્યારે 1.49 લાખથી વધુ લોકો અસરગ્રસ્ત બન્યા છે.પૂરના કારણે રાજ્યના 26 જિલ્લાઓ અને 576 ગામો પ્રભાવિત થયા છે. રાહત અને બચાવ કામગીરી યુદ્ધના ધોરણે ચાલી રહી છે.
દેશના અનેક રાજ્યોમાં ભારે વરસાદનું એલર્ટ, પુંછમાં પોલીસની એડવાઇઝરી
ચોમાસું ફરી સક્રિય બનતાં દિલ્હી, પંજાબ, હરિયાણા, જમ્મુ-કાશ્મીર, હિમાચલ પ્રદેશ, ઉત્તરાખંડ, ઉત્તર પ્રદેશ, બિહાર, પશ્ચિમ બંગાળ, સિક્કિમ, આસામ, મેઘાલય અને અરુણાચલ પ્રદેશમાં ભારે વરસાદ પડી રહ્યો છે.હવામાન વિભાગે ઉત્તરાખંડ, સિક્કિમ અને પશ્ચિમ બંગાળના કેટલાક વિસ્તારો માટે રેડ એલર્ટ જાહેર કરીને લોકોને સાવચેત રહેવાની સલાહ આપી છે.ભારે વરસાદ અને પૂરની સ્થિતિને ધ્યાનમાં રાખીને જમ્મુ-કાશ્મીર પોલીસે પુંછ જિલ્લામાં એડવાઇઝરી જાહેર કરી છે. લોકોને નદીઓ અને નાળાઓથી દૂર રહેવા, બિનજરૂરી મુસાફરી ટાળવા અને અત્યંત જરૂરી ન હોય ત્યાં સુધી ઘરની બહાર ન નીકળવા અપીલ કરવામાં આવી છે.પ્રશાસને લોકોને સત્તાવાર સૂચનાઓનું પાલન કરવા અને કોઈપણ કટોકટીની સ્થિતિમાં તાત્કાલિક રાહત એજન્સીઓનો સંપર્ક કરવા જણાવ્યું છે.
આ પણ વાંચો: મહારાષ્ટ્રમાં ફરી કોરોના વાયરસની એન્ટ્રી: 21 નવા કેસ સાથે કુલ સંખ્યા 48 પર પહોંચી, આરોગ્ય વિભાગ એલર્ટ
આ પણ વાંચો: 10 અને 20 રૂપિયાની નોટો હવે પ્લાસ્ટિકની બનશે? RBIની મોટી તૈયારી
