Jamnagar Crime News: મોબાઇલમાં રમાતી ફ્રી ફાયર વીડિયો ગેમના માધ્યમથી સગીરાના સંપર્કમાં આવ્યા બાદ તેનું અપહરણ (Jamnagar Minor Kidnapping) કરવાના કેસમાં જામનગર પોલીસને સફળતા મળી છે. જામનગરના એસટી બસ સ્ટેન્ડ પરથી ગુમ થયેલી સગીરાને પોલીસે આસામ રાજ્યમાંથી શોધી કાઢી છે. આ કેસમાં 24 વર્ષીય આરોપી પ્રદ્યુત કાર્તીક ચૌધરીની ધરપકડ કરવામાં આવી છે. પોલીસે સગીરાને સુરક્ષિત રીતે તેના માતા-પિતાને સોંપી આગળની કાયદેસરની કાર્યવાહી હાથ ધરી છે.

Jamnagar Minor Kidnapping: જામનગર એસટી બસ સ્ટેન્ડ પરથી સગીરાનું અપહરણ

મળતી માહિતી મુજબ, 8 ઓક્ટોબર, 2026ના રોજ સાંજે આશરે પોણા પાંચ વાગ્યે જામનગર એસટી બસ સ્ટેન્ડ પરથી કાલાવડ તાલુકાના ગ્રામ્ય વિસ્તારની એક સગીરા ગુમ થઈ હતી. અજાણ્યો શખસ તેને લલચાવી-ફોસલાવી લઈ ગયો હોવાની ફરિયાદના આધારે જામનગર સીટી ‘એ’ ડિવિઝન પોલીસ સ્ટેશનમાં ગુનો નોંધવામાં આવ્યો હતો.

સગીરાને શોધવા માટે પોલીસે સીસીટીવી ફૂટેજની તપાસ કરી હતી. આ ઉપરાંત હ્યુમન સોર્સ અને ટેક્નિકલ એનાલિસિસની મદદથી તપાસ આગળ વધારવામાં આવી હતી.

ફ્રી ફાયર ગેમ દ્વારા સગીરાના સંપર્કમાં આવ્યો આરોપી

પોલીસ તપાસ દરમિયાન સામે આવેલી માહિતી મુજબ, સગીરા મોબાઇલમાં ફ્રી ફાયર વીડિયો ગેમ રમતી હતી. આ દરમિયાન એક અજાણ્યા શખસે ગેમમાં આઈડી બનાવી તેની સાથે રમવાનું શરૂ કર્યું હતું. ત્યારબાદ ગેમમાં મેસેજ દ્વારા વાતચીત કરી સગીરાનો મોબાઇલ નંબર મેળવ્યો હતો. ફોન પર સંપર્ક વધારી તેને લલચાવી-ફોસલાવી લઈ જવામાં આવી હોવાની વિગતો તપાસમાં સામે આવી (Online Gaming Safety) હતી.

તપાસ દરમિયાન સગીરા આસામના બોંગાઈગાંવ જિલ્લાના જોગીઘોપા ગામમાં હોવાની માહિતી મળતાં જામનગર પોલીસની ટીમ આસામ પહોંચી હતી.

આસામમાંથી આરોપીની ધરપકડ, સગીરા પરિવારને સોંપાઈ

પોલીસે આસામના જોગીઘોપા ગામમાંથી સગીરાને શોધી કાઢી હતી. આ કેસમાં પ્રદ્યુત કાર્તીક ચૌધરી (ઉંમર 24 વર્ષ)ની ધરપકડ કરવામાં આવી છે. પોલીસે સગીરાને સુરક્ષિત રીતે તેના માતા-પિતાને સોંપી હતી.

આરોપી સામે ભારતીય ન્યાય સંહિતા (BNS) અને પોક્સો કાયદા (POCSO Act) હેઠળ વિવિધ કલમો અંતર્ગત કાયદેસરની કાર્યવાહી હાથ ધરવામાં આવી છે.

ઓનલાઇન ગેમ રમતાં બાળકોની સુરક્ષા અંગે પોલીસની અપીલ

ઓનલાઇન ગેમ અને સોશિયલ મીડિયાના ઉપયોગ દરમિયાન બાળકો અજાણી વ્યક્તિઓના સંપર્કમાં આવી શકે છે. આથી વાલીઓએ બાળકોની ઓનલાઇન પ્રવૃત્તિઓ અંગે જાગૃત રહેવું જોઈએ. બાળકોને અજાણ્યા લોકો સાથે મોબાઇલ નંબર કે અન્ય અંગત માહિતી શેર ન કરવા સમજાવવું જોઈએ. જો કોઈ અજાણી વ્યક્તિ લાલચ આપે, દબાણ કરે કે ધમકી આપે, તો તેની જાણ તરત જ વાલીઓ અથવા પોલીસને કરવા પ્રોત્સાહિત કરવું જરૂરી છે.

આ પણ વાંચો: અમરોલીમાં સગીરાનું અપહરણ, કડોદરા લઈ જઈ મારપીટ-ધમકીનો આરોપ

આ પણ વાંચો: સગીરાનું અપહરણ અને દુષ્કર્મ કરનારને 20 વર્ષની કેદ

આ પણ વાંચો: લવ જેહાદ’નો આક્ષેપ, વલસાડના ધરમપુરમાં સગીરાનું અપહરણ